Read Hadiyya Ermiyaas Kitaaba 51 Bible Online

Ermiyaas Kitaaba 51 - Hadiyya bible

Ermiyaas Kitaaba 51

¹Waa'i «Baabiloonaa minaadabaa fii'aa massoo hafachcha ki'isoommo.

²Hafachchi bura'a fii'aa massoo'isam Baabiloonam bi'isoo allaggi diina'a asse'oommo; oo bichchi amman afoo ammane kolli hundinnem uulla hawwodda'a diih issitamo.

³Gaadaanim xiyya tokkosseebe'e te'im o'l eddechcha edde'lleebe'e cawwitakkotte; harde'i keeninam qishixxitakka'a eroomma issitakkotte.

⁴Ixxuwwi beero'uwwi googonne omatta'a letamo.

⁵An gogoxxi Moollanni Waa'i Isra'ee'l keesammi ihummi eese maham hawwoddota'nnim Isra'eelaa Yihuxxi minaadabaa urummoyyo.

⁶Baabilooniinsi gibbehe; ki'n foore gatixxitakkeena xollehe; Baabiloo'n baaxii'l mashka'inne kore'a fatakitakkotte; an ixxuwwika baado fireena guzumo'eena gudaammoo ammane.

⁷Uulli hundam dimbisso'i Baabiloon i anganne yoo worqi injaffisatte; uulli minaadab hundim Baabiloo'n woyi'n diqaasa agaakko; ee bikkina minaadab gaga huushaakko.

⁸Baabiloon dangonnem ubaa bi'aakkoo bikkina kichche'llehe; ayyi la'ukko fayye'oolas omaroomina qaraare hassehe.

⁹Eekke'enne hee'llam allaggi ‹Baabiloo'n uullina hara'mmineena hansaa hee'nnummo; ihukkaarem fayye'lleenayyo. Waa'i ixxi malaayyinne hundinnem Baabiloona guzumo'aa hore'oomam bi'iseena hincu bikkina ixxuwwa ullaa ni uulla daba'llinona› yito'o» yukko.

¹⁰Waa'i «I minaadaba, ‹Waa'i niina oogataakko; Yerusaaleema mallaa ni Moollanni Waa'i issu luwwi hundam minaadabina kullona› yitakka'a laallehe» yukko.

¹¹Baabiloo'n uulla bi'iseena sawwu bikkina Waa'i Meedoo'n adilluwwa orina ki'isaakko; Keesammi mi'n gindanchikam baado firookkok ee'isinnette. Hawwo afissam ijaajaan ka'isa yita'a ijaajjona; «Ki'nnuwwika xiyya qareessehe; agiram gudissehe.

¹²Baabiloo'n ootanne hawwo afissakkam mare'e uwwehe; egechcham qoxxissehe; qoto'aanom uullissehe; gafanna egetta'a orantam keenom gudissehe; kaka issitakkamok Waa'i Baabiloo'n minaadabanne sawwukkokaa wocukkokaa wonshoo bikkinatte.

¹³At lob daajjuwwi gadanonne hee'lloo goddaanchi Baabiloona, kiina qoodamu bichchi doolli afaakko.

¹⁴Gogoxxi Moollanni Waa'i Baabiloonanne qawwaawwi'nnoo xigo dut gogota eeboo'isa ixxi summinne hide'aakko; oo gogotim kaa'aa sharookko.

¹⁵Waa'i ixxi malaayyinne uulla ixxi qooroominne odim uullanne yoo luwwa qooccukko; ixxi qooroominnem iimane biddiqaa'ukko.

¹⁶Iimanenne yoo wo'i ixxi ijaajinne heekke'ookko; duub uulli tochchiinsi waaroo'isa issookko. Xeenaam banqi belecce'oo'isa issookko; dissu beyyiinsi fissaatim hafachchi hafachchoo'isa issookko.

¹⁷Manni hundim qawwuwwaa lachchi bee'i keenoo ikko'o; baxxo'i misilluwwi tuussisoohanee foor bee'i keenoo ihu bikkina bukkaa misilluwwa baxookkok baxu qophpha'n waa'uwwanne tuuraakko.

¹⁸Ku qophpha'n waa'uwwi awwaad bee'i keenoo naacakkam mu'utaa ihaakko; Waa'i oogateena waaroo ammane bi'llamo.

¹⁹Ihukkaarem Yaaqoob Waa'i ixxuwwisayyo; ixxi hundem luwwinam qooccaancho; ixxi gagina annanni minaadab ihoo'isina Isra'ee'l minaadaba doo'llaakko; ixxi summim gogoxxi Moollanni Waa'a.

²⁰Waa'i «Baabiloona; At iina fanxiisaa o'l mu'utaa hee'llitto; keese mulli minaadaba aphphiseena awwaaxxaa hee'ummo.

²¹Faradoo faradaanoo faraxxi gaare'ee faraxxi gaare'enne afuuttam keenoo iiqanseena keese awwaaxxummo.

²²Kiinninne meentoo goonaa, lommanchoo harde'ee, woraadaa landaa iiqansaammo.

²³Allaaraanchoo allaachchaa abuullaanchoo ixxeka qaash mirgo'uwwaa gassaanoo lob daannuwwaa bi'iseena mu'ut issaa awwaaxxummo» yukko.

²⁴Waa'i «Baabiloonii Baabiloo'n minaadabii Yerusaaleemanne baxxo'i jor bax bikkina hundinam baado firaa liqaayyo miqummuuyyi moo'llakkamo.

²⁵Baabiloona, uulli hundam gojjoo gojaanchi duuna, an keese iittoombee'ane; an keesenne i anga biddiqaa'aa baalli gaangiinsi onkoroollisoommo; shokku duu'nnisam issoommo.

²⁶Lamejjina te'im uullanne dahimmina ihoo kin kiinniinsi siidamooyyo; at heer heerinam udma'i uulli ikkootto; an Waa'i kaka wocaammo.

²⁷«Hawwo afisimmina xansiisoo mare'e uwwehe; minaadab hundim macceesimma xantamisina xurumba fuggehe. Baabiloona qassamisina minaadaba gudissehe; Araaraaxxek, Miini'ikii Ashkeenaaz adilluwwii qassona kullehe. Gaaxxi awwonsaanchi ihoo mancho uwwehe; xigoom qawwaawwisa ihaakkoo farado eebbehe.

²⁸Baabiloona qassamisina minaadaba gudissehe; mannam qooddehe; meedoo'n adilluwwi beyyo, awwonsaa'n beyyo, o'l ijaajaa'n beyyoo ee'isam ixxuwwi daannoo'm woronne yo'i uullanne hee'llam gogoxxi beyyoo hundam asse'amaano asse'llehe.

²⁹Baabiloonanne ayyim hee'oobee'i udma'i ihoo'isina Waa'i sawwukkoka wonshoo amman ihu bikkina uulli heekke'amaa huxe'oolla.

³⁰Baabiloo'n gaadaan ora uullissa'a girbanne maaxanto'o qoxalla'n tiir bee'aa meentisa ikko'o; beero'oo'mmek ooxxi gooc laqqo'uwwi iiqamaakko; minneewwim giirinne shokkaakko.

³¹Ixxek beero'i tochchiinsi tochchi afeebe'e amadamukkisa Baabiloo'n adilina kureena mat geerookkok muulli geeroohaannina mat asse'amaanchi mulli asse'amaanchina assoo kureena geerookko.

³²Diina'ik gogot daajje higakkam beyyo amadaa waardiyya egerakkam beyyuwwa shokkiisukko; Baabiloo'n gaadaan dambaqqa'a batbatito'o.

³³Baabiloon hurbaata ganakkam oodo'isa ihookko; minaadabam ganakkam hurbaaxxesa diina'i ganookko; an gogoxxi Moollanni Waa'i kaka wocaammo» yukko.

³⁴Baabiloo'n adil Nabukadanaxoor Yerusaaleema bogukko; silliqukkome, diih mu'uxxisam issukko; xarakkichchisa minaadaba xuuxukko; danaam danaamooma massaa gatukkoka tufakko'i hurbaaxxisa uunjukko.

³⁵Ee bikkina Xiyoo'n beero'i minaadab «Neesenne afu hawwi Baabiloonanne afona» yitamo; Yerusaalee'm minaadab «Ni xiig dunamukkisam Baabiloo'n mannikim dunamona» yitamo.

³⁶Ee bikkina Waa'i Yerusaalee'm minaadabina «An ki'nnuwwina hara'mmoommo; Baabiloo'n mannikam baado firoommo; Baabiloo'n wo'i bu'uwwii daajjuwwii gogoo'isa issoommo.

³⁷Oo uulli gindamu luwwi tuubbaa wengereelli daabbaroo beyyoo ihookko; ayyim eekke'enne hee'ooyyo; moo'ukkok hundim gadookko.

³⁸Baabiloo'n manni hundim hobbichchisa muuntamo; hobbichchi geexisam quunquuntamo.

³⁹Agginne ixxuwwik orachchi iibboo ammane aggika maadda gudisoommo; dimbiteebee'em agisoommo; ee lasage heer heerina diriittamo; hore'em baqitamoyyo.

⁴⁰Waa'i «Ixxuwwa gereebbi geexxuwwisaa fella'i ambulluwwisaa durantam beyyo mattamisa issoommo; an Waa'i kaka wocaammo» yukko.

⁴¹Waa'i «Baabiloo'n beero'i hinkid amadamukko! Oo heer uulli hundim bakke'am hee'u beero'i hinkid qeefadamukko! Baabiloon hinkid uulli minaadab hundinam maalallatina ihukko!

⁴²Baabiloo'n diina'i cambalaq hambu'llamisa fitta'a beero'onne wo'mmito'o.

⁴³Beero'oom wo'i bee'anee ayyim hee'eenaa eeheen higeenaa xanoobee'i udma'aa ihaakko.

⁴⁴Baabiloonina qophpha'n waa'i ihu Beela guzumo'oommo; game'amu mu'uttuwwam ixxi angiinsi ubbuusisoommo; kanniinsi eehid mulli minaadab ixxonne otossitamoyyo. «Baabiloo'n oottuwwi ubaakko.

⁴⁵«I minaadaba, eekke'iinsi gibbakka'a fillehe; baddisoo i quunqiinsim ki'nnuwwi gaga gatixxitakkeena xollehe.

⁴⁶Macceessakkam kushkushshaaxxi sagariinsi ki'ukkok badditakka'a qoxallan siggoone; hiinchina hiinchina annanni annanni kushkushshaaxxi woshshi wocamookko; uullanne mat adil mulleka qasoo'isa kuroo boqqoo'm kushkushshat macceesamookko.

⁴⁷Ee bikkina Baabiloo'n qophpha'n waa'uwwa hooroommi amman waarookko; uulli hundannem tuulli ihookko; shakko'i oos hundim beero'i woronne ubbamo.

⁴⁸Baabiloon hanaa'n qariinsi waatto'i bi'issam kee'n anganne ubu ammane iimanennee uullannee yoo gogot hundim ilil yitamo.

⁴⁹Baabiloon uulli minaadab hundim beeddoo'isina mashka'i ihaakko; dut Isra'ee'l manni beeddoo'isina mashka'i ihimminne oono'o, Baabiloon gagim ubimmi hasisookko; an Waa'i kaka wocaammo» yukko.

⁵⁰Waa'i Baabiloonanne yoo minaadabina «Ki'nnuwwi lehiinsi gattakko'i i minaadaba, dassakkoo'n mallehe; qee'l uullanne ikkakka'a eese Waa'a tiillehe; Yerusaaleemam ki'nnuwwi wodanonne sawwi'llehe.

⁵¹‹Duumammummi bikkina tuullaammo; Waa'i Keesammi Minenne keesamaakkoo beyyuwwanne allaggi manni aaggo'i bikkina sholle'nnaa horoore heeshaa'nnummo› yi'llehe.

⁵²An Waa'i yoommok kane; «Baabiloo'n qophpha'n waa'uwwanne oogatoommokii uullanne yo'i omatto'i keen u'n sagara macceesissam ammanii waarookko.

⁵³Baabiloon iimane afuta'nnim iim firaakkoo girbam qoxxisuta'n bi'isookkoka asse'oommo; an Waa'i kaka wocaammo» yukko.

⁵⁴Waa'i «Baabiloo'n laachchiinsi Kalaadaawe'i uulliinsi lobakat bichchik sagar macceesamoolla.

⁵⁵Dambalaq womoo'llisa gugoo gogot dangonnem Baabiloonanne afookko; Sharukkuuyyi hawwo afisookko; ee'isenne an ixxuwwa bi'isoommo; sa'itamisam issoommo.

⁵⁶Bi'issam keen Baabiloonanne gaaddamo; Baabiloo'n gaadaanim qeefadantamo; ixxuwwikim xiyyi iiqamukko; an hundinam bito miqoommi Waa'i ihummi bikkina Baabilooninam baxu jollika barche'e miqoommo.

⁵⁷Gassaan, qoolluwwi, awwonsaan, o'l ijaajaanii gaadaanii agga'a dimbitamisa issoommo; ee lasage iinse'llamo; heer heerinam baqitamoyyo. Kaka wocummok an adila; i summim gogoxxi Moollanni Waa'a!

⁵⁸Haraar Baabiloo'n oot ubaa buchchanne hamaaramookko; qeeraa'llaa baxamu ooxxi gooccuwwim giirinne shokkookko; minaadaphphi qondoojjim awwaad bee'an ihookko; minaadab baxu luwwi hundim giirinne shokkookko. An gogoxxi Moollanni Waa'i kaka wocaammo» yukko.

⁵⁹Maahisey beetina beet ihu Neeriy beet Saaraay adil Sedeeqiyaasina hincee'n awwaadaanchi hee'ukko; Sedeeqiyaas Yihuxxi uullanne adil ihu soo'l hiinchonne Saaraay ixxenne maqirem Baabiloona marukko. An Ermiyaasim ee ammane ijaajo uwwummo.

⁶⁰Baabiloonanne iheena yoo bichchaa ee'isam ixxuwwi bikkina wocamu sagaraa kitaabanne kitaabummo.

⁶¹Saaraayinam «Baabiloona affittisam ka kitaabanne kitaabamukkoka hundam ki sagara iimaa'llaa minaadabina qananaa'e.

⁶²Ee lasage ‹Waa'a! At ka beyyo bi'issoo'isa woccaatto; ee bikkina foor yoo mikmikoo soko'i hee'ooyyo; mannii diinatii bi'oo bikkina heer heerinam udma'i ihaa gatookko› yihe.

⁶³Saaraayya, ka kitaaba minaadabina qananaa'llaa lasonne kitaabooma kinanne kattaa Efiraaxiis daajjenne uunje.

⁶⁴Ee'isam ‹Baabiloonem Waa'i ixxuwwanne eeboommi bichchiinsi ki'ukkok ubba'a gattamo bagaan la'mmaagge ki'lleena xantamoyyo› yihe» yummo. Ermiyaas hiraag ka beyyonne beeddookko.