Read Hadiyya Ermiyaas Kitaaba 52 Bible Online

Ermiyaas Kitaaba 52 - Hadiyya bible

Ermiyaas Kitaaba 52

¹Sedeeqiyaas Yihudanne adil ihoo ammane ixxek umur lamiyyee matoo hee'ukko; ixxim Yerusaaleemanne tommoo mat hiinchoo gassukko; ixxi amakim summi Hamuuxaalatte hee'ukko; isem Libina'i uulli Ermiyaas landichchotte hee'llo'o.

²Kanniinsi illageen adil Iyyoo'aaqeem issukkisam adil Sedeeqiyaasim Waa'a kichche'isukko.

³Ee bikkina Waa'i Yerusaalee'mmaannonnee Yihuxxi minaadabannee quuqaa ixxi illagiinsi bi'isukko. Sedeeqiyaas Baabiloo'n adil Nabukadanaxooranne bangujjukko.

⁴Sedeeqiyaas adil ihu honsi hiinchonne tommi agan aagu tommi ballanne Baabiloo'n adil Nabukadanaxoor ixxeka o'l gogota awwonsaa waaraa Yerusaaleema qaseena kibbisukko. O'l gogotim beero'i kululleetanne widdanukko; ooxxi kululleetannem buchcha tuubbo'o.

⁵Sedeeqiyaas adil ihaa hee'u tommoo mat hiinchoo afeebe'e kibbito'o.

⁶Ee hiinchonnem soo'l aga'n honsi ballanne minaadab ittam luwwa hoogga'a sibaar lophphukko.

⁷Beero'i qashshuwwi iiqamukko; Baabiloo'n manni beero'o kibbita'a hee'llo'isam gaadaan hiimonne xotta'a hee'llo'o; adi'l duubbi kaashshi kollonne massoo googinne higga'a qash lamejjanne yoo goocinne fitta'a Yoordaanoos cebbi kolli gibbo'o.

⁸Ihukkaarem Baabiloo'n o'l googot Sedeeqiyaasa hollita'a Iyyaarko'i gadanonne yoo biir uullanne qeefaddo'o; gaadaan hundim ixxo lagga'a binnito'o.

⁹Sedeeqiyaasa adil Nabukadanaxoor beyyo massakko'o; ee ammane Nabukadanaxoor Haamaaxxi uullanne Riibila yakkam beero'onne hee'ukko; eekke'ennem Nabukadanaxoor Sedeeqiyaasanne oogatukko.

¹⁰Oohim Riibilanne Sedeeqiyaasik illi moo'onam ixxi ooso shukko; ee'isam daannuwwam shisiisukko.

¹¹Ee lasage Sedeeqiyaasika ille fissaa xaarinne lokko karaa Baabiloona massukko; lehoo amman afeeqaxina Baabiloonanne karukko.

¹²Nabukadanaxoor Baabiloonanne adil ihu tommonnee honsi hiinchonnee onti agananne tommi ballanne adi'l lombi waardiyyuwwi ijaajaanchi ihu Nabuzaardaan Yerusaaleema aagukko.

¹³Keesammi Mine, adilla'n mine, Yerusaaleemanne hee'llam la'antto'oo kee'nnekaa ee'isam geejji geejji minneewwaa shokkiisukko.

¹⁴Lombaam waardiyyi ijaajaanchi awwonsam hee'u gogotim Yerusaalee'mmeka qasha hundam gindukko.

¹⁵Waardiyyuwwi ijaajaanchi Nabuzaardaan minaadaphphi lambe'enne lobakata bux ikko'i keenoo beero'i woronne gatta'a hee'llo'i keenoo lagga'a Baabiloo'n gogotina anga uwwita'a yo'i keenoo angi baxo baximma laqqam keenoo hundam qeefadaa Baabiloona massukko.

¹⁶Ihukkaarem Yerusaaleemanne lasaanchi bux hee'llo'i minaadaba urukko; ixxuwwi woyi'n kaashsha shuquntam keenoo abuullitam keenoo ikkamisa issukko.

¹⁷Baabiloo'n manni Keesammi Minenne hee'u naas xaarinne baxamaakkoo utubbuwwaa mu'uta dissakkam tululoo luwwaa Naas xaarinne baxamaakkoo wo'o amadakkam loqooqo'uwwaa iiqansito'o; naas xaara hundam Baabiloona massito'o.

¹⁸Disxuwwa, giira hogoofaancho, gii'l buchcha wixxaa'akkam loqooqo'i saahinnuwwa, xiiga qolakkam gabattuwwa, aduruusa dissakkam mu'uttuwwa, cilfuwwaa Keesammi mi'n awwaadina naas xaarinne baxakko'i mulli keesammi mu'uttuwwaa massito'o.

¹⁹Waardiyyuwwa ijaajaanchim loqooqo'i saahinnuwwa, mude'uwwa, wocittuwwa, disxuwwa, caakka dissakkam mu'uttuwwa, cilfuwwa, aggi mu'uttuwwaa worqinnee kin birinnee baxamu mu'uttuwwaa hundam massukko.

²⁰Ee'isam lamem utubbuwwa, gaanda'uuwwa, moor hagaranne naas xaarinne baxamaakkoo tommoo lam mu'uttuwwaa adil Salamoon Keesammi Minenne awwaadoo'isina baxisaa hee'u mu'uta dissakkam tululoo luwwuwwaa hundam massukko. Ku mu'uttuwwi baxamu naas xaar kee'mmaalli ihu bikkina keenakkeena xanakko'oyyo.

²¹Lamem utubbuwwim matem hagar yoohan ihaa annannichchinam sadeenti meetir uullichchii onti meetir haraaroomiiyoohan hee'ukko; wororoom fooqaakkoohan hee'ukko; xaaroom lamarayyee onti milii meetir geejjoomyoohan hee'ukko.

²²Lamem utuphphi shudaamannem issakkam mu'ut naas xaarinne baxamaakkoohan ihukkuuyyi lam meetir uullichchi yoohanee illaanchisa ihaakkoohaanninnee roomaa'n misha laboohaanninnee wereeggisamaakkoohanee hee'ukko.

²³Bii'l idinne honsayyee loh roomaa'n misha laboo hagar yoohan ihukkuuyyi illaancho laboohaanni kululleetanne odim xibbi roomaa'n misha labookkok hee'ukko.

²⁴Eehanninne hundinnem maqire gogoxxi ijaajaanchi Nabuzaardaan hundiinsi lob qeessichchi Saraaya, la'm beyyonne yoo qeessichchi Safooniyaasaa Keesammi mi'n gooca egettam sas mulli waardiyyuwwaa karaa massukko.

²⁵Ee beero'iinsim gaadaa'n ijaajaanchi ihu mat daanna, ee amman afeebe'e ee beero'onne hee'llo'i lamar adi'l gassaano, gaaxxi quuxina kitaabaanchi hee'u gaaxxi awwonsaanchina hara'mmaancho, mulli keenoo lohayyi mulli mannaa edaa massukko.

²⁶Nabuzaardaan ee keeno hundam Haamaaxxi gassonne Riibil beero'onne hee'u Baabiloo'n adi'l beyyo massukko.

²⁷Adil eekke'enne gansiisaahii hawwisaahii lasage lehinne guzumo'ukko. Ee'isinne Yihuxxi minaadab ixxuwwi gaqqi uulliinsi qeefadanta'a matto'o.

²⁸Nabukadanaxoor qeefadaa massu mannik xig kane; adil ihu lama'l hiinchonne 3,023 manchoo Yihudiinsi massukko.

²⁹Adil ihu tommonnee sadeenti hiinchonnee odim 832 manchoo Yerusaaleemiinsi

³⁰ee'isam adil ihu lamiyyennee sas hiinchonnee 745 manchoo Yihudiinsi Nabuzaardaan qeefadaa massukko; qeefadanta'a matto'i mannik hundikim xig 4,600 hee'ukko.

³¹Adil Ikkooniyaan qeefadamu sadennee lamar hiinchonnee tommonnee la'm aganannee aga'nnaannonnem lamiyyennee onti ballannee Baabiloo'n Adil Eeweel Maroodaak adil ihu hiinchonne Yihuxxi adil hee'u Ikkooniyaana karatiinsi tirukko.

³²Eeweel maroodaak Ikkooniyaana eroomminne atoorassukko; ixxesam Baabiloonanne qeefadanta'a afuutto'i adilluwwi hundiinsim loboka lombi beyyo uwwukko.

³³Ee bikkinam Ikkooniyaan karaxxi minenne edde'aa hee'u eddechcha dabassaa umu'l lasaanchi afeebe'e adi'l hurbaatiinsi hundi ammanem itoo'isa issukko.

³⁴Hee'oo doolli hundannem uroo'n hundi ammanem itoo hurbaata uwwam hee'ukko.