Read Hadiyya Ermiyaas Kitaaba 6 Bible Online

Ermiyaas Kitaaba 6 - Hadiyya bible

Ermiyaas Kitaaba 6

¹Ki'nnuwwi Biiniyaam minaadaba, ki'nnuwwi foore gatixxitakkeena gibbehe; Yerusaalee'm beero'iinsi fillehe; Teeqo'annem xurumba fuggehe; Beetihakaariimanne mare'ina giira giillehe; mashka'oomim boobanii bichchii hanaa'n qarinne waareenatte.

²Mishisoohanee liiransoohanee ihu Yerusaalee'm beero'o an bi'isoommo.

³Allaaraan allaachchinne maqirem eekke'enne widdantamo; ixxuwwi dukkaanam beero'i kululleetanne uullissamo; annannichchim ixxena mishisu beyyonne allaachcha allaarookko.

⁴Biiniyaam minaadaphphek diina'i «Yerusaalee'm beero'o qanseena gundona; ki'llehe, samgud ballanne qansona; hore'em dansaammo; uulli hiimeena hincaakko; eelliinchi aageenam haf do'aakko.

⁵Ee bikkina ki'llehe; hiimonne kee'mmaalli hawwo afinsaa beero'ika girbuwwa gindinona» yito'o.

⁶Ee bikkina gogoxxi Moollanni Waa'i «Haqqa mullehe; Yerusaalee'm beero'i kululleetanne girbisa ihaa awwaadoo buchcham kaaphphehe; ku beero'i damiginne wo'mmaakkoohan ihu bikkina guzumo'anchi hasisookko.

⁷Bariinsi wo'i firoohaannisam Yerusaalee'm beero'im jolli firoo beyyo; ee beyyiinsim xale'i damiqqekii bichchi laachchii macceesamookko; hundem ammanem moo'amookkok xissoo omaraa.

⁸Ki'nnuwwi Yerusaalee'm minaadaba, ku hawwi hundim ege'llitakkamisina qoxxisoohan ihona; oobeelas i illagiinsi ki'nnuwwa hooroommo; ki'nnuwwika beero'o udma'i uulli issaa ayyim hee'oobee'isa issoommo» yukko.

⁹Gogoxxi Moollanni Waa'i «Isra'ee'l minaadabiinsi gatto'i keeno woyi'n misha feeroo manchisa feellehe; dabaransitakka'atim woyi'n misha feeroo manchisa ki'nnuwwi anga caaffuwwanne massehe» yoolla.

¹⁰Anim dabaraa «An kurumta'nnii qoxxisumta'nnii i woshsha ayyi macceesaa ha'yyookko? Ixxuwwi xiiqqaammuwwi ikko'i bikkina ki sagara macceesseena hasso'oyyo; ki sagara kuroommaare gadda'a eesenne osattamo.

¹¹Waa'a! At ixxuwwanne quuqqittaanqaxa i woronnem quunqi aphphoolla; hore'em iyyaqqeena xanoommoyyo» yummo. Waa'im «I quunqa googonne yo'i ciilluwwannee wixxito'i harde'i oosonnee fince; manchii meentichchom xoramooyyo; lommanninam qishixxat hee'ooyyo» yukko.

¹²An ka uulli minaadaba guzumo'oommi ammane ixxuwwik minneewwi, abuullii meentii hundim mulli mannina uwwamookko.

¹³Mashka'oomim hoffokii lobokii hundim seerbee'i googinne diinate wixxaa'oolla; hiraagaanii qeessuwwii gattoo'n minaadaba qawwiissamuulla.

¹⁴I minaadaphpheka iiqanto'i omara hokookanchanne xigga'a hasisoo'isa issita'a fayyiissamoyyo; ee'isam xummi bee'ekam ‹Xumma! Xumma!› yitamo.

¹⁵Kido'i haashaarammi baxo baxxa'adu tuutta'atennihe? Tuulli gataa illim aad heeshukkoyyo; ee bikkina ubbam keeninne maqirem ixxuwwim ubbamo; an ixxuwwa guzumo'oommi ammane ixxuwwina lasaanchi ihookko; an Waa'i eekka wocaammo» yoolla.

¹⁶Waa'i ixxi minaadabina «Gooqqi buranne uullitakka'a moo'llehe; gaassikii e'lloo googii hinkanda'e xa'mmitakka'a laqqehe; laqqakko'i ammanem ee googonne taakke'llehe; ki'n foorinam usheexxato siiddakkamo» yukko. Ihukkaarem minaadab «Ee googonne malloommoyyo» yito'o.

¹⁷Eehanniinsi lasonne Waa'i qoxxishshi xurumbi sagara macceesissam egeraano uullisukko; ihukkaarem ixxuwwi «Macceensoommoyyo» yito'o.

¹⁸Ee bikkina Waa'i «Ki'nnuwwi uulli minaadab hundim macceessehe; i minaadabanne issoommi luwwa hundam qoossehe.

¹⁹Uulla, atim macceese; ixxuwwaannina jor sawwixxi bikkina guzumo'eena minaadabanne bichcha eeboommo; mashka'oomim ixxuwwi an losisummi losa'nneka seera sabba'a i sagarina ijaajanto'oyyo.

²⁰Saaba'a yakkam uulliinsi eebbam aduruusii qee'l uulliinsem eebbam annanni annanni enjii iina maha issookko? Ixxuwwika shokkiissa'a hincaa'llam kitimam aa'oommoyyo; mulli kitimim eese liiransooyyo.

²¹Ee bikkina ku minaadab qolamaa uboo'isa issoommo; anno'ii oosii, beshshuwwii olla'ii mateeyyannem letamo» yukko.

²²Waa'i «Hanaa'n qarinne yoo uulliinsi weeraroo diina'i waarookko; qee'l uullanne yoo lobakat minaadab orina gudaakko.

²³Ixxuwwika xiyyaa bisa'aa ki'isso'ookko; ixxuwwim mishan bee'i mogaalli manna; faraxxi konte'ikim sagar dambalaq womoo'llesa yoohane; oono'o ixxuwwi Yerusaaleema qasseena guddo'ookko» yukko.

²⁴Yerusaaleem beero'i minaadabim «Ee woshsha macceensummi bikkina ni malaayyi hoogaakko; xuuchchi amadu meentichchosam u'n amadaakko.

²⁵Ni diina'i bisa'a lade'llo'ookko; dambaqim ni kululleetanne lophphaakko; ee bikkina beero'iinsi fillaa hax uulla malleena te'im googonne fillaa daba'llammeena igginoommoyyo» yito'o.

²⁶Waa'i ixxi minaadabina «Diina'i bi'isseena waatto'ok dangonne qasseenatte ihu bikkina kichchechchi eddechcha edde'llakka'a gii'llibuchchanne biqqiiqqehe; yoo matem beet lehoohaare mushshaa wi'lloo manchisa wi'llehe.

²⁷Ermiyaase, xaa'lleka qoxxaallooma keenakkamaannisa i minaadab hinkido'anda'ee keentaa moo'e.

²⁸Hundim naasisaa xaa'llisaa qoxxito'oo keenoo xiiqqinne beddanto'oo boqquwwi keenoo; hundim bi'llo'oo hamimmi losan yoo keenoo.

²⁹Can buufamukko; midachchi giirim baddisoo'isa ihaa kasharoolla; ihukkaarem xaaroom jor ihu bikkina bukkamaa lebecukkoyyo; ee'isam i minaadaphphi lambe'iins jor manni laa'itobee'i bikkina ixxuwwa muccussimmina yakimmi awwaad bee'ane.

³⁰An Waa'i ixxuwwa uunjaammoo bikkina ‹Muccur ihubee'i bikkina ubaakkoo bira› yakka'a weeshakkamo» yukko.