Read Hadiyya Ermiyaas Kitaaba 7 Bible Online

Ermiyaas Kitaaba 7 - Hadiyya bible

Ermiyaas Kitaaba 7

¹Waa'i eese minaadab otossitam Keesammi mi'n ooxxi gooc kolli asse'ukko; eekke'ennem uullaa ixxuwwina kuroommisina ijaaju sagar kane; «Ki'nnuwwi hee'llakkam heechchikaa baxxakkam baxikaa duuha'a dabassehe; anim ka uullanne hee'llakkamisina issoommo.

⁴‹Kuk Keesammi Mine! Kuk Keesammi Mine! Kuk Keesammi Mine! neesem xummanne hee'nnoommo!› yitakkam awwaad bee'i sagaranne amma'nnantakkotte.

⁵«Hanqo'isam ki'nnuwwi hee'llakkam heechchaa baxxakkam baxoo dabassehe; ki'nnuwwina'i ki'nnuwwim xabbeenoom wo'mmaakkoo iittinne mat ikkakka'a hee'llehe.

⁶Yaayyanto'i keeno, adaraar oosoo busar meentoo wor amaddakka'a boggakkotte; ka uullanne hee'llam muccur manna damigimminne shitakkotte; ki'nnuwwim bi'llakkambee'isa qophpha'n waa'uwwina otossitakkotte.

⁷Ee'isinne ki'nnuwwi dabassantakkolas gaassi ki'nnuwwi anno'ina heer heerina gaqqi uulli issaa uwwummi ka uullanne hee'llakkamisa issoommo.

⁸«Ki'nnuwwi oono'o, qophpha'n sagaranne bakke'llakkamuulla.

⁹Eehanniinsi ki'ukkok game'llakkamuulla, manna shitakkamuulla, saa'llakkamuullaa hide'llakka'atim qophphano naqqassakkamuullaa; odim ‹Ba'aal› yakkam qophpha'n waa'inam kitima kitimtakkamuulla; illageen laqqakkambee'i qophpha'n waa'inam otossitakkamuulla.

¹⁰An saboommi ee baxo hundam baxxakka'a lasonne i mine waattakka'a i illagenne uullitakka'a ‹Neese bichchiinsi gantaammo› yitakkamuulla.

¹¹I min gamaan maaxamoo daawwa'a labissakka'atennihe? Ki'nnuwwi baxxakkam baxo hundam oono'o an gagim moo'aammo.

¹²An iina otossitakkamisina gaassi doollenne doo'llummi ‹Seelo'o› yakkam beyyo mallehe; i minaadab ikko'i Isra'ee'l manni baxxo'i baaxii'l mashka'inne ee beyyo issummisa moo'llehe.

¹³Ki'nnuwwi ka kee'mmaalli hawwojji hundam baxxakko'o; edaa edaa ki'nnuwwina kurumta'nnim ‹Macceensoommoyyo› yitakko'o; weeshummi ammanem dabachcha uwwitakko'oyyo.

¹⁴Ee bikkina Seelo'onne issummisa ka ki'nnuwwi bakke'llakko'i i minennem issoommo; gaassi ki'nnuwwi anno'inaa ki'nnuwwinaa uwwummi beyyonne Seelo'onne issummoka edaatim issoommo.

¹⁵Ki'nnuwwina abbaayyuwwi ikko'i Isra'ee'l minaadaba beyyiinsi hoorummisam ki'nnuwwam i illagiinsi hooroommo; an Waa'i kaka wocaammo» yukko.

¹⁶Waa'i «Ermiyaase, an macceeseena hasoombee'i bikkina ka minaadaphphi bikkina uunxititte; ixxuwwi bikkinam uunxitittuuyya laattitte; magannaato aa'oombee'i bikkina ixxuwwika magannaato amaddaa waattitte.

¹⁷Ixxuwwi beero'uwwannee Yerusaalee'm googguwwannee baxxam baxo moo'llooyyonnihe?

¹⁸‹Iima'n adila› yamanto'i qophpha'n waa'ina hurbaata sarimmina meenti buko'o cukkitamo; oos haqqa feerookko; anno'i giira giirookko; eese quuqisseenam qophpha'n waa'uwwina woyi'n diqaasa kitim issita'a hincaa'llamo.

¹⁹Waa'im ‹Eehanninne eese quuqissamoka labissa'atennihe? Baasam ixxuwwi gaga hawwodantamo; tuullam ixxuwwi gaganne eebaqqitamo› yukko.

²⁰Ee bikkina an Moollanni Waa'i i min baxamu ka beyyonne iikka qoxxaalli quunqa dilliisoommo; mannanne, diinatenne, haqqannee wix hurbaatannee hundannem i quunqa dilliisoommo; i quunqi ayyim xoo'iseena xanoobee'i gii'llisa ihookko.

²¹«An Isra'eelina Moollanni ihummi gogoxxi Moollanni Waa'i ‹Kitima kitimakkam beyyonne hincaa'llakkam ki'nnuwwi itimmi hasisoobee'i shokkiisakkam kitimaa mulli kitimaa wixxaa'llakka'a maarooma ki'nnuwwi gagina ittehe› yummo.

²²Gibxi uulliinsi ki'nnuwwi anno'o fissummi ammane shokkiisakkam kiti'm bikkinaa mulli kiti'm bikkinaa ixxuwwa ijaajummoyyo.

²³Ihukkaarem an ixxuwwina Moollanni ihaa ixxuwwim i minaadab ikkamisina iina ijaajanchi hasisoo'is xale'e kurummo; hundem luwwim ixxuwwina makkona hassoolasim an ixxuwwina uwwummi see'llisanne hee'llamisina ijaajoommo.

²⁴Ihukkaarem ixxuwwi qoossita'a macceesseena hasso'oyyo; ee bikkenne xiiqqinnee jollinnee wo'mmaakkoo ixxuwwi wodan iittukkoka hundam issito'o; illage marimmi bikkenne laso daba'llito'o.

²⁵Gaassi ki'nnuwwi anno'i Gibxiinsi fitto'i balliinsi ki'isaa kaballi afeebe'e iina awwaadaan ikko'i hiraagaano ballina ballina asse'ummo.

²⁶Ihukkaarem ixxuwwika wodano duudisso'o bagaan i woshsha macceesseena i kollonne daba'llito'oyyo; ki'nnuwwim ki'nnuwwi gaassi anno'iinsi baassakka'a xiiqqaammuwwaa boqquwwaa ikkakko'ookko.

²⁷«Ee'isam Ermiyaase, ka sagara hundam i minaadabina kuttootto; ihukkaaremdu macceessamoyyo; at ixxuwwa weeshshootto; ihukkaarem kiina dabachcha uwwitamoyyo.

²⁸Ku minaadab iina ixxuwwi Waa'ina ijaajantambee'anee guzumo'anto'oohaannonnem losano massiteena hassambee'anee ikko'ookko; ee mashka'inne hanqi guullaa bi'aakko; hanqi bikkinam ki'isaa suuminne wocookkok bee'e.

²⁹«Yerusaalee'm minaadaba, ki'nnuwwika horoore hogoossitakka'a kichche'llehe; haqqi bee'i duunnuwwi lud hundannem fittakka'a wi'llo fissehe; mashka'oomim an Waa'i quuqaammo; i minaadabam i illagiinsi ubbuusaa uraammo.

³⁰«Minaadab jor luwwa baxxo'ookko; oohim an saboommi qophpha'n waa'uwwa keesamaakkoo i mine aagissa'a haashaassito'ookko.

³¹Ixxuwwika goon oosoo landaa shokkiissu'uuyyi kitim issita'a hincaa'lleena Hiinoo'm cebbanne ‹Tofeet› yakkam kiti'm beyyo baxxo'ookko; oohim an ijaajumbee'anee hore'em sawwubee'i luwwaa hee'ukko.

³²Ee bikkina ee beyyik summi Been-Hiinoo'm cebba te'im Toofeta yimmi gataa Duranchi cebba yamamoo amman waarookko; mulli waammi beyyi hee'oobee'i bikkina oo cebbi gagim minaadaphphi waammi beyyi ihookko.

³³Ixxuwwi leeshim iima'n cii'inaa uulli moochchinaa hurbaat ihookko; baddisaa hollokkokim hee'ooyyo.

³⁴Uullim udma'i ihookko; Yerusaalee'm googguwwannee Yihuxxi beero'uwwannee hundannem bollochcho'i kajji, liiranchikii lobakat liiranchi sagarii hore'oomam macceesamoobee'isa issoommo» yukko.