Read Hadiyya Ermiyaas Kitaaba 8 Bible Online

Ermiyaas Kitaaba 8 - Hadiyya bible

Ermiyaas Kitaaba 8

¹Ee ammane adilluwwik, daannuwwik, qeessuwwik, hiraagaa'nnekii Yerusaaleemanne hee'llam mulli minaadaphphekii hundikim miq waammi hundiinsim feeramaa firookko.

²Ixxuwwikim miq wixxaa'akka'a waammakkam bikkenne uunjakko'i haccisa beyyi hundannem binnookko; oo miqim minaadab otossimminnee sogitano xa'mmimminnee iittinne awwaaddam hee'llo'i eelliinchaannonnee aga'nnaannonnee boollaankaannonnee illagenne binnookko.

³Ka jor qaranchiinsi gatto'i qaxii an binnaa'ummi beyyonne hee'llam minaadabii hee'immiinsi leho doo'llitamo» yukko.

⁴Waa'i minaadabina «Ubu manchi la'mmaage ki'ooyyonnihe? Googo huushamaa bi'u manchidu daba'llooyyonnihe?

⁵Eehannah i minaadab i kollonne daba'llitakkam bikkenne qee'llitakko'isam hee'llakkamok mahinatte? Yerusaalee'm minaadab hundi ammanem laso daba'lloo mahinatte? I kollonne daba'llimma sabbakka'a qophpha'n waa'ina otossitakkamuulla.

⁶An ki'nnuwwi woshsha qoossaa macceesummo; ihukkaarem ki'nnuwwi hanqa woccakko'oyyo; ki'nnuwwi lambe'iinsi baxu jolla biiraa yukkok matim bee'e; ‹Baxummi jolli maha?› Yaa xa'mmukkokim bee'e; annannichchim o'l beyyo jigoo farashshisa doo'llitakko'i kollonne geettakko'o.

⁷Qadaalli qeeraa'l ammarim daba'llitam ammane laqqamo; handare'i, waaxiigee wo'agaagaanii daba'llitam ammane laqqamo. Ihukkaarem ki'nnuwwi i minaadab i seera laqqakko'oyyo.

⁸Eehannah ki'nnuwwi ‹Neese qoolluwwa; Waa'i seeram lanqoommo› yitakkamok mahinatte? Qophphano kitaabbam keen i seera boqqisso'isa moo'llakkamoyyonnihe?

⁹Qoolluwwi keen tuuttamo; sholle'llamome; qaashannem amadantamo; ixxuwwi i sagara utto'ookko; eehannah ixxuwwina hinkido'i qooroom hee'eena xanookkahe?

¹⁰Ee bikkina ixxuwwika abuulli uulla hundam mulli keenina gaqqi uulli issaa uwwoommo; ixxuwwi meentom mulli goonina higisaa uwwoommo; mashka'oomim hoffokii lobokii hundim manna qawwiissa'a diinate wixxaa'llamuulla, hiraagaanii qeessuwwii gattoo'n minaadaba qawwiissamuulla.

¹¹I minaadaphpheka iiqanto'i omara hokookanchanne xigga'a hasisoo'isa issita'a fayyiissamoyyo; ee'isam xummi bee'ekam ‹Xumma! Xumma!› yitamo.

¹²I minaadaba, kaa'n haashaarammi luwwa hundam baxxakku'uuyyi tuuttakko'i luwwi yoohonnihe? Tuurimmi gataa illem limmaa'llakko'oyyo; ee bikkina mulli keen ubbo'isam ki'nnuwwim ubbakkamo; an ki'nnuwwa guzumo'oommi ammane sholle'llakkamo; an Waa'i kaka wocaammo.

¹³Abuullaanchi atoota wixxaa'oohaannisam i minaadaba wixxaa'eena hasummo; ihukkaarem ixxuwwi mishbee'i woyi'n kaashshisa, oda'isaa buyyi giggiru kaashshisaa ikko'o; ee mashka'inne ixxuwwina uwwummi uulla allaggi manni ixxuwwi gulummi issita'a a'llitamisa issummo» yukko.

¹⁴Waa'i minaadabim «Cawwinaa afuulloommok mahinatte? Waallehe, hundim wixxinaa girbamaakkoo beero'i kollonne gimbona; eekke'em lenona; mashka'oomim ni Moollanni Waa'i ixxo hawwondummi bikkina bi'nnoommisa issaakko; shoo qaraar yoo wo'om angoommisa issaakko.

¹⁵Xummaa fayya'oomaa siindoommi amman waarookko yinaa minxaa hee'nnummo; ee bikkenne dambaq ihu bikkina ni mixan kora'an ihaa gataakko.

¹⁶Diina'ik farad korooxoo sagar Daan beero'onne macceesamookko; soorakko'i faraxxi muunim uulli hundam huxiisookko; diina'i waatto'i mashka'im ni minaadabaa ni beero'oo ee'isam woronne yoo luwwaa hundam guullita'a bi'isseenatte» yito'o.

¹⁷Waa'i «Oono'o, ki'nnuwwi lambe'enne gennaan dabareena xanoobee'i quphaam hamashshaa qasoo woraqaallaa asse'oommo; ixxuwwim ki'nnuwwa qassamo» yukko.

¹⁸Qoxxeena xanoombee'i qoxxaalli kichchechchi eesenne afaakko; i wodanim lobakata hoogaakko.

¹⁹Hino'o macceessehe; «Waa'i la'mmaagge Xiyoonanne hee'ooyyonnihe? Xiyoo'n adildu la'mmaagge ka beyyonne hee'ooyyonnihe?» yitu'uuyyi i minaadab uullanne hundannem laattu'uuyyi macceesoommuulla. Ixxuwwina adil ihu Waa'im shobakka'a baxakko'i misilluwwannee awwaad bee'i qophpha'n waa'uwwannee otossitakku'uuyyi eese quuqissakkamok mahinatte?» yaa ixxuwwina dabarookko.

²⁰Minaadabim «Oono'o, hurbaata wixxaa'akkam agan higaakko; billim beeddaakko; ihukkaarem neese gantummoyyo» yita'a laattamo.

²¹I minaadab iiqanchinne i wodanim iiqamaakko; anim baddaa wi'lloommo.

²²Gaala'aadanne laphphakkam qaraar bee'ennihe? Qaraa'l mandu eekke'enne hee'ooyyonnihe? Eehannah i minaadab fayye'llambee'ek mahinatte?