Read Hadiyya Ermiyaas Kitaaba 9 Bible Online

Ermiyaas Kitaaba 9 - Hadiyya bible

Ermiyaas Kitaaba 9

¹Shakko'i i minaadabina ballaa hiimoo wi'lloommisina i horoor wo'i bar ihuta'n i illim indiiddina bu'i ihuta'n hinkaa'nna iittam hee'ummo!

²I minaadab amma'nnat hanqataakkoo laggo'oo kee'n wixxit ikko'i bikkina ixxuwwiinsi annanni ihaa udma'i uullanne gooqqi araat garoo beyyo siidumta'n hinkaa'nna liiramam hee'ummo!

³Ixxuwwik allab qophphano woceena hundi ammanem gudaakkoohane; ee bikkina uullanne hanqi bikkenne qophphan beyyo aa'aakko. Waa'i «I minaadab jolla edda'a edda'a baxxamuulla; an Waa'i ihummisam laqqo'oyyo» yukko.

⁴Annichchi annichchim ixxi gaqqi beshichchi hantaariinsi ege'llona; ixxi gaqqi abbaayyom ihuta'n amma'nnimmi hasisooyyo; mashka'oomim abbaayyo yakko'ok hundim Yaaqoobisa[2] ihaakko; beshichcho yakkamok hundim ixxi beshichchika summa bi'isoolla.

⁵Hundim ixxi gaqqi beshichcho qawwiisaa huushisoolla; hanqa wocookkok bee'e; ixxuwwika allabo qophphano wocimma losisso'ookko; baaxiilo baximma urimma sabba'a ixxuwwi gaga hoogissamuulla.

⁶Ixxuwwi damiganne hanenne damigaa qawwiishshanne hanenne qawwiishshaa eddu'uuyyi mattamuulla; ee qawwiishshiinsim ki'ukkok Waa'i «An ixxuwwina Moollanni ihummisam la'imma sabbo'ookko» yoolla.

⁷Eehanniinsi ki'ukkok gogoxxi Moollanni Waa'i «I minaadaba muccusseena xaa'llisa keenoommo; i minaadab jor luwwa issito'i bikkina ee'isa issimmiinsi mulli doo'l bee'e.

⁸Ixxuwwik allab hundi ammanem hantaaro wocoo bikkina hawwodoo xiyyisa; annannichchim ixxi gaqqi beshichcho iitti sagarinne wocisookko; ihukkaarem daphphanne qaasha qaashookko.

⁹Eehannah, ka hundem luwwannem ixxuwwa guzumo'eenaa kido'i minaadaphphekdu baado fireenaa labooyyonnihe? An Waa'i kaka wocaammo» yoolla.

¹⁰Anim dabaraa «Hundim diih ihu bikkinaa eekke'ennem daba'llamookkok bee'i bikkinaa duunnuwwi bikkina kichche'oommo; biir uulli bikkinam wi'lloommo. Diinaxxi sagarim od macceesamooyyo; iima'n cii'ii uulli moochchii hundim gibaa bi'aakko» yummo.

¹¹Waa'i «Yerusaaleema gindamoo'isa issoommo; wengereelli hosoo beyyom issoommo; Yihuxxi uulli beero'uwwam manni hee'oobee'i diih ihoo'isa issoommo» yoolla.

¹²Anim dabaraa «Uulloom ayyim daba'llameena xanoobee'i udma'aa diihaa ihukkok mahinatte? Kakoomdu qoossaa la'oo qoor manchi ayyette? Mulli mannina losiseena xanoo'isindu caakkissitti manchi ayyette?» yummo.

¹³Waa'im dabaraa «Ku hundim ihukkok i minaadab an uwwummi seera utto'i bikkinatte; ixxuwwi iina ijaajanto'oyyo; an ixxuwwina kurummoka hundam wonshito'oyyo.

¹⁴Eekka issitam bikkenne xiiqqaammuwwi ikko'o; ixxuwwik anno'i losisso'isannem Ba'aal yakkam misilina otossito'o.

¹⁵Ee bikkina Isra'ee'l Waa'i ihummi gogoxxi Moollanni Waa'i issoommi luwwa ki'nnuwwina kuroommo; ka minaadabina qaraaroo hurbaata itisoommo; shoo qaraar exxaakkoo wo'om agisoommo.

¹⁶Ixxuwwii ixxuwwi anno'imii laqqambee'i mulli minaadaphphi lambe'enne ixxuwwa binnaa'oommo; an ixxuwwa bi'iseembee'i afeebe'e bisa'inne holloommo» yukko.

¹⁷Gogoxxi Moollanni Waa'i «Mah waareena hincaada'ee sawwi'llehe; wi'lloo keenom wixxaa'llehe; soroo meentom weeshshehe» yukko.

¹⁸Minaadabim dabatta'a «Ni illenne indiiddi wo'mmaa dunamoo'isina ni xabaninnem indiiddi daadona soroo meentina qaqqissakka'a kullehe» yito'o.

¹⁹Xiyoonanne «Aayye, neese bi'nneenatte; hore'oomam shoolle'nnaammo; ni minneewwi gindamu bikkina ni uulla fatakinaa malleenatte» yakku'uuyyi wi'llakkam sagara macceessehe.

²⁰Anim «Meento, ki'nnuwwi Waa'i wocoo luwwa macceessehe; ixxi sagara macceessakkeena guddehe. Hinkid wi'llim hasisooda'ee ki'nnuwwi oosina losissehe; sorakkamisam ki'nnuwwi beshina losissehe;

²¹Leh ni maskoot hundinnem aagaakko; adi'l minneewwam aagaakko; ooso goog hundannem harde'i keenom wixxixxi beyyuwwannem shaakko.

²²Mannik leesh uunjakkam haccisa beyyi hundannem binnaakko; hurbaata muttam keen mutta'a ubbuusso'aannisaa ayyim wixxaa'oobee'i qarme'isaa ihaakko. An wocoommisina Waa'i ijaajukkok kane» yukko.

²³Waa'i «Qoor manchi ixxi qooroomanne bolxoone; malaayyaamim ixxi malaayyenne bakke'oone; goddaanchim ixxi goddanne bolxoone.

²⁴Bakke'eena hasookkok hee'ulas an Waa'i ihummisa la'imminne i iittim heer heerina hee'oohan ihu bikkina hanqo'i oogatoo muccuroomaa uullanne ihoo'isa issoommok anette ihummisa qoossimmanne bakke'ona; eese liiransookkok eehane; an Waa'i kaka wocaammo» yukko.

²⁵Waa'i «Qophpha'n waa'uwwi lombinaa ixxuwwika horoo'l saraata mu'llitam udma'i uullanne hee'llam Gibxikaa Yihuxxekaa Edoo'mmekaa Amoo'nnekaa Moo'aaphphi minaadabaa guzumo'oommi amman waarookko; ku minaadab hundim ballachchantoo'n yoo keeno; Isra'ee'l minaadab hundikim wodan ballachchamukkoyyo» yukko.