Read Hadiyya Kichchechchi Kitaaba 1 Bible Online

Kichchechchi Kitaaba 1 - Hadiyya bible

Kichchechchi Kitaaba 1

¹Minaadabinne wo'mmaa hee'u Yerusaalee'm beero'i hinkid mullam gatukko! Uulli minaadab hundim lonsam hee'ukkok busar meentichchosa hinkid mullam gatukko! Uulli hundannem lombaam hee'u beero'i oono'o, kaba agiddanonne ubaakko.

²Hiimo hundam lobakata wi'lloolla; indiiddi xabaninne daadoolla; illagee'n balale'i manniinsi hundiinsim ixxo qoxxisookkok matim bee'e; kob hee'llo'i keen hundim ixxo laggo'ookko; diina'oominnem ki'llo'ookko.

³Yihuxxi minaadab u'nnii agiddanii lophphimminne qeefadamaakko. Mulli minaadaphphi lambe'enne afuuraakko; usheexxatom siidukkoyyo. U'nnanne hee'ukkuuyyim diina'i kibbaakko.

⁴Ayyi manchim ugudduwwa lonseena waaroobee'i bikkina Xiyoo'n googguwwi diihaakko. Gooccuwwi hundim gindamaakko; qeessuwwim qitinoolla; baajaam landi kichchechchinne u'nnamoolla; Xiyoo'nnek lasaanchi qaraaraalla.

⁵Xiyoo'nnek baaxiil lophphu bikkina Waa'i ixxo u'nnisaakko; ixxi diina'im ixxena gassaan ihaakko. Ixxi diina'ina hundi luwwim makkaakko; ixxi oosom diina'i qeefadaa massaakko.

⁶Yerusaalee'mmek lombi bi'aakko; awwonsaanim a'llaa'lloo beyyo hoogu gaallisa ihaakko; diina'i hollu ammane malaayyi hoogeebe'e gibbo'o.

⁷Yerusaalee'm minaadab ixxuwwika gaassi lomba hawwii u'nnii afoo balla tiittamo; diina'i anganne ubbo'i ammane hara'mmookkok bee'u ammane ixxuwwi beero'im gindamukkisa moo'aa diina'i osarukko.

⁸Yerusaaleem kee'mmaalli baaxiilo baxaakko; ee bikkina haashaaramaakko. Ixxeka leexa'ooma moo'u bikkina lonsam hee'u keen hundim gadaakko; ixxi gagim qitinukkuuyyi ille maaxaakko.

⁹Ixxek haashaaranchi biir ihaa moo'amaakko; hanenne ixxonne afoo luwwi bikkina sawwukkoyyo. Ubimmoomim hiriraa'oohane; qoxxisookkok hore'em bee'e; diina'i kaa'u bikkina ixxi hawwo moo'ona Waa'i kollonne laaroolla.

¹⁰Yerusaalee'm minaadaphphi diina'i ixxuwwika bito xee'aalli amaxxa hundam bogukko. Waa'i minaadaphphi dummichchanne aaggambee'isa Waa'i hooraa hee'u mulli minaadab ixxuwwika Keesammi Mine aagukkuuyyi moo'amaakko.

¹¹Yerusaalee'm minaadab hurbaata hasaa qitinoolla; amma'n hurbaatina ixxuwwika amaxxa hundam biteesoolla; Yerusaalee'm minaadab «Waa'a! At neese moo'e; ni sholle'nnam moo'e» yikkuuyyi laaroolla.

¹²Waa'i ixxeka kee'mmaalli quunqa neesenne dilliisu balla neesenne afu eehido'i hawwi afu manchi yoolas hino'o araat hundim qoossitakka'a moo'llehe. Eehaare ookki hoffanennihe?

¹³Ixxi iimaniinsi giira asse'ukko; oo giirim ni miq afeebe'e shokkiisukko; ni lokkina qaasha qaashukko; neesem laso dabarukko; balla hundoomam neese hoogisaa ni tiiro huushisukko.

¹⁴Ni baaxiil ni axonne iyyiisamaakko; lobakata kee'mmaalli ihu bikkina neese hoogisaakko; Waa'i uullixxammeena xannoombee'i ni diina'ina neese higisaa uwwaakko.

¹⁵Waa'i ni gaadaano ni lambe'iinsi guullaakko; harde'uwwa guulloo gogotam weeshaakko. Waa'i Yihuxxeka baajaam Landichcho woyina ciinsakkam barenne woyina hance'akkamisa hance'aakko.

¹⁶Diina'i kaa'u bikkina ni oos mullam gataakko; qoxxisaa tiiro uullisookkok niinniinsi qee'llu bikkina indiidde'nnummuuyyi wi'llinoommuulla.

¹⁷Xiyoon is anga biddiqaa'llamo; ihukkaarem ise qoxxisoo ayyim hee'ooyyo. Is olla'i hundim Yaaqoob shumo'ina diina'i ihoo'isa Waa'i issaakko; Yerusaaleemim ixxuwwi lambe'enne haashaarammi luwwisa ihaakko.

¹⁸Ixxena ijaajamumbee'i bikkina Waa'i eesenne issu luwwanne hanqo'ane. Minaadab hundim macceessehe; eesenne afu hawwom moo'llehe; iikki harde'i oos goonii landii qeefadamaakko.

¹⁹I besha weeshummo; ihukkaarem ixxuwwi eese qawwiisso'o. Iikki qeessuwwii awwonsaanii ixxuwwina ihoo hurbaata hassu'uuyyi beero'i googguwwanne leto'o.

²⁰Waa'a, i u'nnaa hawwoo moo'e; an keese lobakata hawwodummi bikkina i wodan hoogaakko; googonnem ihukko minenne i minaadab beeddoolla.

²¹Eese qoxxisoo ayyim bee'isaa an u'nnamummisaa minaadab macceesaakko. I diina'i hundim i hawwo macceesaakko; ee at issitti luwwannem liiramaakko. Ee bikkina ixxuwwanne oogatteena qoodditti balli waarona; ixxuwwim i'isam u'nnantona.

²²Ixxuwwika jor baxo moo'e; eese i baaxiilina guzumo'llittisam ixxuwwam guzumo'e. An lobakata qitinoommuulli ihu bikkina i wodanim hoogoolla.