Read Hadiyya Kichchechchi Kitaaba 2 Bible Online

Kichchechchi Kitaaba 2 - Hadiyya bible

Kichchechchi Kitaaba 2

¹Waa'i quuqu bikkina Xiyoo'n Landichcho tuunsinne ifiisukko; Isra'ee'l wereeggaalli lombam iimaniinsi uullanne ubbuusukko; ixxeka lokko usheexisoo beyyi ihukkisam ee quunqi ayyaamonne tiireena hasukkoyyo.

²Waa'i Isra'ee'l minaadab hee'oo beyyi hundam qishixxat bee'eka bi'isukko; Yihuxxi minaadaphphi girbuwwam ixxi quunqinne gindukko; Yihuxxeka adillanoo gassaanoo uullanne ubbuusaa sholliisukko.

³Ixxi malaayyaam quunqinne Isra'ee'lleka malaayye hoogisukko; diina'i moo'onam ixxuwwina hara'mmimma sabukko. Yaaqoob shumo'onnem aphphoo gii'llisa ixxeka quunqa dilliisukko; oo quunqim olla'uwwam edaa bi'isukko.

⁴Diina'isa xiyya chokkorukko; ixxi makki angam neesenne ki'isukko. Yerusaalee'm beero'onne neese bakke'nnoommi keeno hundam shukko; ixxi quunqam gii'llisa aphphoo'isa issukko.

⁵Waa'i diina'isa ihaa Isra'eela bi'isukko; ixxuwwika adilla'n minneewwa bi'sukko girbuwwam gindansukko. Yihuxxi minaadabinam wi'lloo kichchechchaa lonsukko.

⁶Keesammi Mine duubbi kaashshi beyyonne yoo godo'isa gindukko; Xiyoonanne ihoo ugudduwwii usheexxaxxi ayyaammuwwii xadamoo'isa issukko; ixxaanninne malaayyaam quunqinne adilaa qeessichchoo sholliisukko.

⁷Ixxena kitima hincaa'akkam beyyo gadukko; Keesammi Minem urukko; is adilla'n mi'n qashshuwwam diina'ina higisaa uwwukko; uguxxi ayyaammuwwanne ihoohaannisa Keesammi Minenne diina'i lobakata shuurukko.

⁸Waa'i Xiyoo'n Landichchoka qasha gindeena sawwukko; keennaanchi heechchom qeeraa'llisukko; angam bi'isimmiinsi dabarukkoyyo. Girbii ootii gindamukko; mateeyyam bi'ukko.

⁹Ooxxi gooccuwwi uulli woronne waammamukko; xufakkam laqqo'uwwim iiqamaa ubukko; adilii gassaanii mulli minaadaphphi lambe'enne qeefadanta'a yo'o; Waa'i see'l losanim kanniinsi eehid uwwamooyyo; hiraagaaninam Waa'iinsi kaalti moo'amooyyo.

¹⁰Xiyoo'n lommanni sa'aa uullanne afuuraakko; horoorenne gii'l buchcha issaa xiddi eddechcha edde'aakko. Yerusaalee'm baajaam landim gaanje aad heeshaa'aakko.

¹¹Wi'llimmi lophphu bikkina i illi jaamukko; anim u'nnannette; i wodan kichchechchinne hoogukko; i minaadab beeddaakko; oosii ciilluwwii beero'i goog hundannem hoogaakko.

¹²Sibaatta'atii xeebe'lla'atii ixxuwwi ammo'i kolli laattamo; oranne madu manchisa hoogga'a goog hundannem ubbamo; ixxuwwi ammo'i anganne hee'llo'isam letamo.

¹³An ki'nnuwwina mayyo? Ki'nnuwwa mahinne akeekiso? Doo'llantakko'oo Yerusaalee'm beero'i minaadaba! Ki'nnuwwa qoxxisoo'isina mahinne kobi'lliso? Annannam Yerusaalee'm minaadaba! Ki'nnuwwanne afoo hawwi dambalaqi'nnoo'i haraar ihu bikkina ayyi fayyiiseena xanookko?

¹⁴Ki'nnuwwi hiraagaa'nnek kaalti qophphanoo awwaad bee'ane; qeefadanchiinsi gattakkamisina ki'nnuwwi baaxiilo caakkisso'oyyo. Qophphanoo awwaad bee'i woshshaa ki'nnuwwina kutto'ookko.

¹⁵Araat hundim keesenne anga aphphisookko; «Hanqinam hore'em danaamoo uulli hundinam liiranchaa hee'u beero'i kanennihe?» yikkuuyyi ixxuwwi horoore heekkeesookko; Yerusaalee'm Landichchonne naacookko.

¹⁶Ki diina'i hundim keese game'llitamo; fiinqeessu'uuyyii inqe iiccu'uuyyii «Egellummi amman kane! Oono'o, ise bi'insummo; eeham ni illinne moo'nnummo» yitamo.

¹⁷Waa'i sawwukkoka issukko; lobakat ammaniinsi illageen wocu sagaram wonshukko; keesem qishixxoo'n bi'isukko. Ki diina'i keesenne liiramoo'isa issukko; ki diina'i malaayyem qoxxisukko.

¹⁸Minaadab Waa'i kollonne laarukko. Xiyoo'n Landichchi qasha, ballaa hiimoo indiidda dirisisa daasse. Usheexxato uwwititte; ki illem usheexxissitte.

¹⁹Ki'llaa luxxi baqitenne laare; ki sawwixxeka Waa'i illagenne hincaa'e; ki oos goog hundannem sibaarinne hoogu bikkina ki anga Waa'i kollonne biddiqaa'e.

²⁰Moollanna, qoossitaa moo'e; kanniinsi illageen at ka'isa moggitti minaadab hannonne yookko? meenti iittitam ixxuwwi gaqqi ooso ittonannihe! Qeessuwwaa hiraagaanoo ki minenne shakkonannihe!

²¹Ee'isam harde'ii lommannii goog hundannem leta'a ubbo'ookko; iikki woraadii baajaam landii diina'i bisa'inne beeddito'ookko; ki quunqi ballanne shitto; Qishixxitoo'nnim halaalissitto.

²²Uguxxi ayyaamo maaddina weeshshoohaannisa kolli hundinnem eesenne dambaqa weeshshitto; Waa'i quunqi ballanne bichchiinsi ayyim xorukkoyyo te'im gatukkoyyo; an abooyyaa li'isummi i ooso i diina'i guullukko.