Read Hadiyya Kichchechchi Kitaaba 3 Bible Online

Kichchechchi Kitaaba 3 - Hadiyya bible

Kichchechchi Kitaaba 3

¹Waa'i quunqi biccinne hawwo aa'ummi manchi anette.

²Ixxi eese caakki bee'i tuunsonne maroommisa issukko.

³Hanqo'isam ballooma hundoomam edaa edaa ixxeka anga i kollonne dabarukko.

⁴I orachcho ebeessukko; i miqem iiqansukko.

⁵Eese qaraaraalli kichchechchinnee hawwinnee ootukko.

⁶Lobakat ammaniinsi illageen leto'i mannisa gambabbaakkoo tuunsonne hee'oommisa issukko.

⁷Xoreena xanoommi bee'isa iikka kululleeta ootukko; kee'mmaalli chimchiminnem karukko.

⁸Hara'mmato siideena weeshaa laarummaarem i uunxato macceeseena hasukkoyyo.

⁹I googo cabbaramaakkoo kininne xufukko; taakke'amoommi googom boqqisukko.

¹⁰Ixxi iina dugaa egeru tibbekkichchisaa maaxamu hobbichchisaa.

¹¹Googiinsi gosaasaa fissukko; muransaatim hara'mmoo bee'i beyyonne uunjukko.

¹²Eesenne xiyya chokkorukko; tokkaashshe'inam elel issukko.

¹³Xiyya chokkoraa i orachcho huruuraa aagoo'isa issukko.

¹⁴I minaadab eesenne osarukko; kajjinnem ballooma hundam eesenne naacanto'o.

¹⁵Qaraaroo luwwa iina itisukko; dambom goddisukko.

¹⁶Uullanne ubbuusaa eese hance'ukko; i inqem kinanne iiqukko.

¹⁷I foor xumma hoogukko; liiranchi mah ihuda'em xadummo.

¹⁸Ee bikkina «I lombi bi'aakko; Waa'anne issummi neeyyat hundim qee'llaakko» yummo.

¹⁹Iikka hawwoo karkaadimmaa sawwimmi iina geneeno'isaa dambisaa ihukko.

²⁰Eekka sawwoommi amman hundam i tiirim u'nnamookko.

²¹Ihukkaarem an mat luwwa sawwoommo; neeyyatom issoommo.

²²Bi'nnummi bee'ek tungibee'i Waa'i qishixxatiinsii heer heerina hee'oo ixxi iittiinsii ki'ukkaanninnette.

²³Oo keenim darina darina haareechcho; kiikki amma'nnantaattoohaannoomim lobakata.

²⁴Waa'i iina sharada; ee bikkina an xale'i ixxo neeyyato issoommo.

²⁵Waa'i ixxo hassam keeninaa ixxonnem neeyyat issitam keeninaa hundinam biijaalla.

²⁶Manni Waa'ika gatisimma cawwaa neeyyatinne egeruta'n erane.

²⁷Manchi harde'oominne iyyaqqimminne gaanjaqqa iyyuta'n erane.

²⁸Waa'i iyyiisaakkoo bikkina iyyaqqimminne cawwaa mullam afuurona.

²⁹Odim neeyyat hee'eena xanoo bikkina ixxi gaga heeshaa'aa hee'ona.

³⁰Shiine aphphisoohaannina uwwona; sholle'nnam aa'ona.

³¹Waa'i manna heer heerina uunjooyyo.

³²Hawwi afoo'isa issukkaarem qishixxookko; lophphaakkoo ixxi iittim dabassamoobee'ane.

³³Ixxi hasaa mannanne hawwo te'im qedda eebooyyo.

³⁴Uulli minaadaba karaxxi minenne hance'amakkam ammane

³⁵Hundam xanoohaanni illagenne mannik hanqi bi'oo ammane

³⁶mat manchi hanqa hoogoo ammane hanqinam Waa'i eekka moo'ooyyonnihe?

³⁷Waa'i ijaajubeelas wocaa wonsheena xanookkok ayyette?

³⁸Joram ihukko erok hundam xanoo Waa'i suumiinsi firoohaneyyonnihe?

³⁹Eehannah baaxii'l mashka'inne guzumo'amoo ammane manchi beet qunquunoo mahinatte?

⁴⁰Ni googo saarayyinaa moo'nnona; ni Waa'i kollonnem daba'llinona.

⁴¹Ni wodano ni anginne maqirem iimanenne yoo ni Waa'i kollonne iimaa'nnona

⁴²«Ni Waa'a! Neese baaxiilo banxaammo; keesennem boqqinaammo; atim haafitittoyyo.

⁴³«At neese quunqinne wo'mmitaa hollitto; qishixxat bee'ekam shitto.

⁴⁴Uunxat ki beyyo afoobee'isa ki gaga duuphphi woronne maaxxitto.

⁴⁵Mulli minaadaphphi illagenne neese haccaa hururaa issitto.

⁴⁶«Ni diina'i hundim neesenne suume fooqaa'llo'o.

⁴⁷Baachchii gindanchii ee'isam hawwii dambaqii neesenne afaakko.

⁴⁸I minaadab beeddu bikkina i illiinsi indiiddi dirisisa daadoolla.

⁴⁹«I indiiddim uroo'n cawwaa daadoolla.

⁵⁰Oohim Waa'i iimaniinsi aad moo'eebe'inatte.

⁵¹I beero'i meentonne hundannem afu sholle'nna moo'aa lobakata kichche'ummo.

⁵²«Mashka'i bee'ekam eese sabbam diina'i cii'isa hochchito'o.

⁵³Foorinne hee'ummuuyyim ba'l woronne darabba'a barooma kininne ifiisso'o.

⁵⁴Wo'i wo'mmaa i samminne dunamukkaare lehoommi amman afukkoka labisummo.

⁵⁵«Waa'a, xilli barenne ihaa ki summa weeshummo.

⁵⁶I laachcha macceese; iina agaaggaa eese usheexxise» yoommi i uunxato macceessaatto.

⁵⁷Keese weeshummi ammane i kollonne hincitto; ee'isam ‹‹Baddititte›› yitto.

⁵⁸«Waa'a! I bikkina fitantaa i foore gatissitto.

⁵⁹Waa'a! Eesenne issakko'i damiga moo'llaatto; iina oogate.

⁶⁰I diina'i eesenne baado fitteena sawwito'isaa jora issiteena a'llanto'isaa moo'llaatto.

⁶¹«Waa'a! Ixxuwwi eese game'llito'isaa eesennem jora issiteena sawwita'a a'llanto'isaa macceessaatto.

⁶²Ixxuwwi balla hundoomam i hanenne hashaashshantamuullaa quunquuntamuullaa.

⁶³Afuutta'atim ihukko uullita'a kaddu'uuyyi eesenne naacantamisa moo'e.

⁶⁴«Waa'a! Ixxuwwi baxxo'i hawwojjina ixxuwwina laboo luwwa uwwe.

⁶⁵Ki duunchi ixxuwwanne ihona! Neeyyato muttamisam isse!

⁶⁶Ki quunqinne ixxuwwa hochchitaa amade; uulliinsim bi'llamisa isse» yummo.