Read Hadiyya Kichchechchi Kitaaba 4 Bible Online

Kichchechchi Kitaaba 4 - Hadiyya bible

Kichchechchi Kitaaba 4

¹Worqi hinkid xurukko! Muccur worqim hinkid dabassamukko! Keesammi min baxamu bito xee'aalli kin goog hundannem binnaakko.

²Lombaam Xiyoo'n oos muccur worqisa xee'aalluwwi hee'llo'o; ihukkaarem kaba buchchi mu'uta baxxam keen baxxo'i buchchi mu'uxxisa ikko'ookko.

³Wengereellim ihuta'n wotallina anuuna iicisaa li'isookko; ihukkaarem i minaadab udma'anne hee'oo guchchekkichchisa mogaalluwwi ikko'ookko.

⁴Wo'o xeebe'immiinsi ki'ukkok ixxuwwi ciilluwwik allab aqoronne amaxxamaakko; ixxuwwik oos hurbaata uunxookko; ihukkaarem ixxuwwina maham uwwookkok bee'e.

⁵Xee'oo er hurbaata ittam hee'llo'i minaadab hawwita'a goog hundannem karkaaddo'o; baar kashar eddechcha edde'lla'a li'llo'i keen kaba gii'l buchchi tuubbanne iinse'llo'o.

⁶I minaadabanne afu guzumo'i ayyi angim hara'mmoo'n dangonnem himbiriiqamu soddomanne afu guzumo'iinsi lobane.

⁷Adi'l mi'n daannuwwi haashaaranchi bee'i baradiinsi loboka muccutto'oohanee adiinsim loboka qadaallito'oohanee hee'llo'o. Ixxuwwi hagarim sanpheera yakkam kiniinsi loboka mishisoohane hee'ukko.

⁸Ihukkaarem kaba ixxuwwik illi kolli shiinshisa heemachchu bikkina goog hundannem ubbo'i beyyonne ixxuwwa la'ookkok bee'e; haqqisa gogaakkoo ixxuwwi omachchi miqenne amaxxamaakko.

⁹Bisa'inne leto'i keen sibaarinne leto'i keeniinsi e'llitamo; ku keen uullanne hurbaata hoogga'a beeddito'ookko.

¹⁰I minaadab beeddito'i ammane ixxuwwina hurbaat ihoo'isina qishixxaalli meenti angi ixxuwwi gaqqi ooso sarukko.

¹¹Waa'i ixxeka malaayyaam quunqa moo'isukko; Xiyoo'n shooho'o itoo'isinam aphphoo giiri'nnoo'i boobana dilliisukko.

¹²Uulli adilluwwii heer uulli minaadabii hundim Yerusaalee'm ooxxi gooccuwwinne diina'i aagookko yita'a amma'nnito'oyyo.

¹³Kukim ihukkok ixxuwwi lambe'enne muccur xiiga dunto'i qeessuwwi hawwojjinnettee hiraagaa'n baaxiilinnettee.

¹⁴Ixxuwwi xiiginne haashaaranto'oo keen ikko'i bikkina manni ixxuwwika eddechcham ihuta'n nakkaa iggooyyo; ihukkaarem ixxuwwi qooqquwwisa googonne timtimitamo.

¹⁵Ee bikkina minaadab «Ekkid mallehe; haashaarantakko'oo bikkina neese nakkitakkotte» yitu'uuyyi ixxuwwanne shuuttamo. Ee bikkina ixxuwwi yaayyanto'oo keenoo karkaadaanoo ikko'o; mulli minaadabim «Kannii eehid ni lambe'enne hee'llamoyyo» yito'o.

¹⁶Waa'i ixxi gagim binnaa'aakkoo keen ikko'i bikkina kanniinsi eehid ixxuwwi bikkina sawwooyyo. Qeessuwwinam lomba uwwooyyo; lommanninam annanni hamannaat hee'ooyyo.

¹⁷Kora'am hara'mmaancho egerimminne ni illi hoogukko; gatiseena xanoobee'i mulli minaadabiinsim hara'mmato qulunxinne egellummo.

¹⁸Diina'im googguwwanne taakke'ammoombee'isa malloommi beyyi hundam egetto'o; ni doolli hincaakko; ni doollim beeddaakko; lasaanchim afaakko.

¹⁹Neese hollitam keen iimaninne bararoo gaaqiinsi loboka qare'llamane; neese duunnuwwanne hollito'o; udma'i uullannem maaxanta'a egetto'o.

²⁰Mulli minaadaphphi lambe'enne ixxi haf lugumonne hee'nnoommo yinaa sawwinaammoo Waa'i doo'llaakkoo ni foo'l lubbato qaashanne amaddo'o.

²¹Ki'nnuwwi Uuxanne hee'llakkam Eedoo'm minaadaba, liirammehe; lobakatam liirammehe. Ihukkaarem ki'nnuwwanne hawwi humbulli Kore egeraa waaroolla; ki'nnuwwim dimbitakka'a maxarantakkamo.

²²Yerusaalee'm minaadaba, ki'nnuwwi hawwojjik guzumo'i beeddaakko; kanniinsi eehid yaayyanchinne hee'llakkamisa issooyyo. Ihukkaarem Eedoo'm minaadaba, ki'nnuwwika hawwojja guzumo'ookko; ki'nnuwwi baaxiilom caakkanne fissookko.