Read Hadiyya Kichchechchi Kitaaba 5 Bible Online

Kichchechchi Kitaaba 5 - Hadiyya bible

Kichchechchi Kitaaba 5

¹Waa'a, neesenne afukkoka sawwihe; ni sholle'nnam moo'e.

²Ni gaqqi uulli allaggi keenina uwwamaakko; ni minneewwi hundim allaggi hee'oo beyyi ihaakko.

³Niyyanno'i diina'i anginne leto'o; ee bikkina neese anni bee'an inkaammo; niyyummo'im aro'i bee'i keen ikko'ookko.

⁴Angoommi wo'o bitaa'nnoommuulla; gii'l haqqam birinne aa'nnoommuulla.

⁵Axaqqa issakko'i diinaxxisa ushe'ammummuuyyi lobakata hoongaammo; usheexxinonam uwwakkamoyyo.

⁶Ichchi hurbaatina Gibxinaa Asoorinaa anga uwwinaammo.

⁷Niyyanno'i baaxiilo baxxa'a higgo'o; ihukkaarem neese ixxuwwi baaxiilo iyyinaammo.

⁸Agid neese gassukko; ixxuwwi angiinsim neese gatiseena xanookkok bee'e.

⁹Udma'i uullanne manna shoo manni yoo bikkina neese hurbaata siindeena xannoommok ni gaga lehina higinsaatette.

¹⁰Sibaar lophphimmiinsi ki'ukkok ni orachchi shiinshisa heemachchukko.

¹¹Diina'i ni meento Xiyoonanne hoo'llukko; Yihuxxi beero'uwwannem baajaammuwwi sholle'ukko.

¹²Awwonsaa'nneka anga karakka'a saqalakko'o; ni lommannam sholliisakko'o.

¹³Ni harde'uwwinne hurbaata liitisakko'o; goo'n oosim haqqa iyyita'a tartarito'o.

¹⁴Lommanni beero'i dummichchanne bee'llo'o; harde'i keenim kajja utto'o.

¹⁵Liiranchi ni wodaniinsi bi'aakko; ni kajjim wi'llonne daba'llaakko.

¹⁶Ni lombi sheelatamaakko; neesem baaxiilo banxummi bikkina niina aayye!

¹⁷Ee bikkina ni wodan hoogaakko; ni illim jaamaakko.

¹⁸Xiyoo'n duun diihu bikkina wengereelli daba'llamoolla.

¹⁹Waa'a! At heer heerinam adila; ki adillanim qaranchiinsi qaranchi afeebe'e.

²⁰Eehannah neese mahina hore'em xadditto? Kaa'n ammane neese mahina uttitto?

²¹Waa'a! Ki kollonne neese dabare; neesem daba'llinoommo; ni doollem gaassisam haareechchise.

²²Eekka issittibeelas at neese hore'em uttaatto; qaxiinsi hanaanim neesenne quuqqaattoo yimma.