Read Hadiyya Hizqi'eel Kitaaba 1 Bible Online

Hizqi'eel Kitaaba 1 - Hadiyya bible

Hizqi'eel Kitaaba 1

¹Sad hiinchaannonne soo'l aga'n onti ayyaamonne Baabiloo'n uulli Keebaar daajji gadanonne Yihudiinsi qeefadamu manninne hee'ummuuyyim iiman fooqukko. Anim Waa'ika kaalta moo'ummo.

²Ee ammane adil Ikkooniyaan qeefadamukkaanniinsi onti hiinchoo onti ballaa ihaa hee'ukko.

³Baabiloo'n uullanne Keebaar daajji gadanonne Waa'ik sagar Buuz beet ihummi qeessichchi Hizqi'eel beyyo waarukko; Waa'i malaayyim i hanenne hee'ukko.

⁴Iim xabbaa moo'ummaare malaayyaam hambu'llam hafachchi hanaa'n qariinsi waarukkuuyyi moo'ummo; kee'mmaalli duubiinsi banqik belellaat moo'amam hee'ukko. Belellaaxxi kululleetannem yoo iiman kasharukko. Banqi gugoo beyyonnem mat luwwi naas xaa'llisa caakkisukko.

⁵Hambu'llam hafachchi lambe'ennem manna laboo soor fooraam qooccanchuwwa moo'ummo.

⁶Ee qooccanchuwwina annannichchinam soor soor ilkollii soor soor ladii hee'ukko.

⁷Ixxuwwikim lokki xabbaakkoohan ihukkuuyyi lokki shuku'llim moo'l shuku'lli'nnoo'an hee'ukko. Ee lokki shuku'lluwwikim hagar shiinshakko'i naas xaa'llisa belecce'am hee'ukko.

⁸Ee soorem illi kolluwwiinsii soorem ladduwwiinsii mullek annannichchinam ixxuwwi ladduwwiinsi woroon soor mannaanni'nnoo'i angi hee'ukko.

⁹Ee qooccanchuwwik annannichchikim lam lad makkannee qeddannee biddiqaa lud edamam hee'ukko. Ee bikkina ixxuwwi ekkidii kidii ikkoo'n xabbita'a mateeyyoominne mattam hee'llo'o.

¹⁰Ee qooccanchuwwina annannichchinam soor annanni annanni ilkolli hee'ukko. Oohim illaqqi kollik mannika, makki kollik hobbichchika, qeddi kollik mirgo'ika, lasaqqi kollikim gaaqichchika laboohan hee'ukko.

¹¹Ee diinaxxek annannichchikim lam lad iim biddiqaa awwonaa yoo qooccanchi laxxi ludo nakkam hee'ukko. Ihukkaarem gatu lam lad qinxaa ixxuwwi gaqqi orachchom ifiisam hee'ukko.

¹²Oo qooccanchuwwi annannichchim soor kollinne moo'lleena xantam hee'llo'i bikkina matteena hassam kollonne ekkidii kidii daba'llitoo'n hundim mateeyyoominne barattam hee'llo'o.

¹³Ee fooraam qooccanchuwwi lambe'enne aphphoo gii'l kashara laboo luwwi hee'ukko. Oohim ee qooccanchuwwi lambe'enne ekkidii kidii mikmikoo xombora labam hee'ukko; oo giirim lobakata caakkaakkoohan hee'ukko; banqim ee giiriinsi firam hee'ukko.

¹⁴Oo qooccanchuwwim banqi belellaaxxisa ekkidii kidii darabamam hee'ukko.

¹⁵Ee soorem qooccanchuwwa moo'ummuuyyim, soor shafe'isa kululoo luwwi uullanne kululaa dillukkuuyyii fooraam qooccanchuwwi gadanonne midaad midaadinne ogorinne afuurukkuuyyii moo'ummo.

¹⁶Oo soorem shafe'uwwisa kululoo luwwim hagar kobi'llamoohan hee'ukko. Annannichchim inqu yakkam bito xee'aalli ki'nnisa belecce'oohan hee'ukko. Ee'isam annannichchim mat shafe'isa kululoo luwwi mulli shafe'isa kululoo luwworonne higoo labam hee'ukko.

¹⁷Ixxuwwim soorem kolliinsim hasso'i kollonne mulli kollonne do'lloo'n xabbita'a mattam hee'llo'o.

¹⁸Ee shafe'isa kululoo luwwikim tochchi gumu'llaallaa baddisoohanee hee'ukko. Soorem shafe'isa kululoo luwwanne tochchi kululleetoomanne hundoomannem illi yoohan hee'ukko.

¹⁹Oo qooccanchuwwi mikmikoo amman hundam oo shafe'isa kululoo luwwim maqirem mikmikam hee'ukko. Oo qooccanchuwwi uulliinsi ki'lla'a iim shiqitam ammane oo shafe'isa kululoo luwwim maqirem iim shiqam hee'ukko.

²⁰Oo qooccanchuwwim Ayyaan maroo kolli hundam barattam ammane oo shafe'isa kululoo luwwim maqirem bararam hee'ukko. Oohim ee qooccanchuwwik ayyaan ee shafe'isa kululoo luwwi woronnetti ihu bikkinatte.

²¹Ee qooccanchuwwik ayyaan ee shafe'e laboo luwwi woronne yoo bikkina oo qooccanchuwwi maroo ammane hundam maqirem maram hee'ukko. Uulloo ammanem maqirem uullam hee'ukko. Uulliinsi iimane firoo ammanem maqirem firam hee'ukko.

²²Fooraam qooccanchuwwi horooriinsi hanaan gagmoo'ixxisa belecce'oo bito xee'aalli kiniinsi baxamaakkoo iimane laboo luwwi biddiqaa hee'ukko.

²³Ee iimane laboo luwwiinsi woroonim fooraam diinat annannichchim ixxi midaadinne yoo qooccanchi moo'oo'isanne lam lado biddiqaa'aa gatu lamem ladinnem orachcho ifiisaa uullaa hee'ukko.

²⁴Ixxuwwi barattam ammanem lad aphphixxamookkoka macceesummo. Oo sagarim dambalaq womoo'l gugaa lobakat gogot corochchaa ee'isam hundam xanoo Waa'i sagaraa labam hee'ukko. Ixxuwwim bararimma uullissam ammane ixxuwwika lado qinxaa'llam hee'llo'o. Ee ammanenne ixxuwwi horooriinsi hanaan yoo iimaniinsi sagar macceesamukko.

²⁶Ee iimaniinsim hanaan sanpheera yakkam inqu'iinsi baxamaakkoo adilla'n barcuma laboo luwwi biddiqaa hee'ukko. Mancho labookkokim adilla'n barcumanne afuuraa hee'ukko.

²⁷Ixxi lamado laboo beyyiinsi hanaan gii'l woronne aagaa iibbu xaara laboo luwwi ixxi lamadiinsim woroon giira laboo luwwa moo'ummo. Belecce'oo caakkim ixxi kululleetanne aagaa hee'ukko.

²⁸Ixxi kululleetanne yoo caakkim xee'n ammane duuphphi woronne moo'amoo waadamuunchisa hee'ukko. Oohim Waa'i lombika caakka labookko. Ixxo moo'ummi ammanennem anim miininne uulla nakkaa otossummo. Ee lasagem wocakkam sagara macceesummo.