Read Hadiyya Hizqi'eel Kitaaba 10 Bible Online

Hizqi'eel Kitaaba 10 - Hadiyya bible

Hizqi'eel Kitaaba 10

¹Kiruubeel horoolluwwiinsi hanaan yoo iimane moo'ummo; kiruubeel hanennem sanpheer yakkam bito xee'aal kininne baxamaakkoo adillani'nnoo'i luwwa moo'ummo.

²Waa'im talbiinsi dadamaakkoo wereeggi eddechcha edde'u manchina «Fooraam qooccanchuwwiinsi woroon yo'i shafe'e laboo luwwi lambe'inne higgaa mare; ee fooraam qooccanchuwwi lambe'enne yoo gii'l kashariinsi ki anginne fooccaa massitaa ka beero'onne binnaa'e!» yukko. An ixxo moo'ummuuyyim aagukko.

³Ixxim woro aagoo ammanenne kiruubeelluwwi Keesammi miniinsi woroo'n qarinne yoo kollinne uullaa hee'ukko; woro'l kollinne yoo wixxixxi beyyonnem umbu'l wo'mmukko.

⁴Waa'i lombi kiruubeeliinsi ki'aa Waa'i mi'n wororonne awwaadina uullakkam beyyo marukko. Umbu'llim ee minenne wo'mmukko. Wixxixxi beyyim Waa'i lombi belellaatinne wo'mmukko.

⁵Kiruubeelluwwim ixxuwwi ladinne macceesissam sagar bii'l kollinne yoo wixxixxi beyyonne macceesamam hee'ukko. Oo sagarim hundam xanoo Waa'i sagara labam hee'ukko.

⁶Waa'i ee talbiinsi dadamu wereeggi eddechcha edde'u mancho kiruubee'l koofanne shafe'e laboo luwwi lambe'iinsi giira aa'oo'isina ijaaju ammanenne qaqqisaa woro aagaa ee shafe'e laboo luwwaannonne mat gadanonne uullukko.

⁷Ee kiruubeelluwwiinsim mat ixxuwwi lambe'enne yoo giiranne anga aagisaa hofqax gii'l kasharam ki'isaa talbiinsi dadamaakkoo wereeggi eddechcha edde'u manchi anganne issukko; oo manchim ee gii'l kashara amadaa marukko.

⁸Kiruubeelina annannichchinam manni anga laboo luwwi ladiinsi woroon yoo'isa moo'ummo.

⁹Ee kiruubeelluwwaannonne annannichchi gadanonnem soor shafe'e laboo luwwi yookkoka moo'ummo. Ee shafe'e laboo luwwikim hagar belecce'oo inqu yakkam kina laboohan hee'ukko.

¹⁰Ee soorem shafe'uwwa laboo luwwikim hagar kobi'llamoohan hee'ukko; mat shafe'e laboo luwwik mulli shafe'e laboo luwworinne higoo laboohan hee'ukko.

¹¹Oo shafe'e laboo luwwi illaqqi kolli maroo ammane hinka'i kollonnem daba'lloo'n xabbaa marookko. Illagenne yoo shafe'e laboo luwwi hassu kolli hundannem maruta'n mulli keen hinka'i kollonnam daba'llitoo'n awwo'nnanta'a mattamhee'no'o.

¹²Kiruubeelluwwika afare, ladaa angaa edaa ixxuwwi orachchi hundoomannem ee shafe'uwwa laboo luwwannem gatoo'n illi wo'mmaakkoohan hee'ukko.

¹³Oo shafe'uwwa laboo luwwim an macceesummuuyyim tululitam shafe'uwwa yamanto'o.

¹⁴Kiruubeelluwwina annannichchinam soor ilkolli hee'ukko. Luxxek mirgo'ika la'mmek mannika saxxek hobbichchika soo'llekim gaaqichchika laboohan hee'ukko.

¹⁵Kiruubeelluwwim iim ki'llo'o; ixxuwwim Keebaar daajji gadanonne moo'ummi fooraam qooccanchuwwa.

¹⁶Kiruubeelluwwi mikmikoohaare ixxuwwi midaadinne yoo shafe'e laboo luwwim maqirem mikmikam hee'ukko; kiruubeelluwwi iim ki'lleena ixxuwwi lado biddiqaa'llamaare ixxuwwi midaadinne yoo shafe'e laboo luwwim ixxuwwiinsi annanni iham hee'ukkoyyo.

¹⁷Ee fooraam qooccanchuwwikim ayyaan ee shafe'e laboo luwwi woronne yoo bikkina oo qooccanchuwwi uulloohaare shafe'e laboo luwwim uullam hee'ukko; kiruubeelluwwi ki'llamaare shafe'e laboo luwwim maqirem ki'am hee'ukko.

¹⁸Ee lasage Waa'ik lombi Keesammi mi'n mikkiriinsi ki'aa kiruubeeliinsi hanaan yoo beyyonne firaa uullukko.

¹⁹An eekka moo'ummuuyyim kiruubeelluwwi ixxuwwi lado biddiqaa'lla'a uulliinsi iim ki'llam ammane ixxuwwi midaadonne hee'u shafe'e laboo luwwim maqirem ki'am hee'ukko. Ixxuwwim Keesammi Mi'nneka eelliinchi firinne yoo gooca affa'a uullito'o; Isra'ee'l Waa'ikim lombi ixxuwwi hanenne hee'ukko.

²⁰Oo keenim Keebaar daajji gadanonne Isra'ee'l Waa'iinsi woroon moo'ummi fooraam qooccanchuwwa; anim oo keen kiruubeelluwwi ikko'isa la'ummo.

²¹Ixxuwwina annannichchinam soor ilkollii soor ladii hee'ukko; ladduwwaannonne annannichchi lugumonnem manni anga laboo luwwi hee'ukko.

²²Ixxuwwikim ilkolli ee Keebaar daajji gadanonne moo'ummi ilkolluwwa laboohan hee'ukko; kiruubeel annannichchim xabbaa illagenne maram hee'ukko.