Read Hadiyya Hizqi'eel Kitaaba 11 Bible Online

Hizqi'eel Kitaaba 11 - Hadiyya bible

Hizqi'eel Kitaaba 11

¹Waa'ik Ayyaan uulliinsi iim ki'isaa eelliinchi fi'l kollinne yoo Keesammi Minenne yoo eelliinchi fi'l gooc kolli eese worukko. Ee beyyonnem ooxxi gooc gadanonne lamiyyee onti manchoo moo'ummo. Ixxuwwi lambe'ennem minaadaphphi awwonsaan ikko'i Aazuur beet Azaaniyaa Baanaay beet Falaaxiyaa moo'ummo.

²Waa'i iina «Manchi beeto, ku manni jor luwwa qooddamuulla; ka beero'onnem jor woshsha a'llantamuulla.

³‹La'mmaaggem daballaa minneewwa banxoommi amman qee'l ihooyyo; ku beero'i maara sarakkam harachchisa ihukkuuyya neese odim giir itoobee'isa harachchi hooroo maa'llisa inkaammo› yito'ookko.

⁴Ee bikkina manchi beeto, ixxuwwi hanenne hiraago woce; hiraago woce» yukko.

⁵Ee lasage Waa'i Ayyaan i hanenne dillukko. Iinam «Waa'i ka'isa yoolla yitaa woce. ‹Isra'ee'l minaadaba, ka woshsha woccakko'ookko. Anim ki'nnuwwi sawwitenne yoo woshsha la'oommo.

⁶Ka beero'onne lobakat manna shitakko'ookko. Beero'oo'm googom leeshinne wonshitakko'ookko› yitaa woce.

⁷Ee bikkina an Moollanni Waa'i ki'nnuwwina kuroommi woshshi kane. Harachchi woronne yoo maar ki'nnuwwi shitakko'i manna. Ku beero'im ee harachcho. Ihukkaarem ki'nnuwwi ka beero'iinsi hoorantakkamo.

⁸Ki'nnuwwi ora badditakko'ookko. Ihukkaarem an ki'nnuwwanne ora eeboommo. An Moollanni Waa'i kaka wocaammo.

⁹Ki'nnuwwa ka beero'iinsi fissaa mulli uulli mannina higisaa uwwaa ki'nnuwwanne oogatoommo.

¹⁰Ee bikkina ki'nnuwwi uulli gabalanne orinne letakkamo. Isra'ee'l gabalannem ki'nnuwwanne oogatoommo. Ee ammane an Waa'i ihummisa laqqakkamo.

¹¹Ku beero'i ki'nnuwwina harachcho ihooyyo. Ki'nnuwwim ka beero'i woronne maa'llisa ikkakkamoyyo. Isra'ee'l gabalanne ki'nnuwwanne oogatoommo.

¹²Iikka seeraa gatti ogoraa uttakka'a ki'nnuwwi olla'anne yoo manni gatti ogora egettakko'i bikkina ki'nnuwwanne oogatummok an Waa'a ihummisa laqqakkamo› yoolla» yukko.

¹³An hiraago wocummi ammanenne Baanaay beet Falaaxiy ubaa lehukko. Anim miininne uulla nakkaa laarummuuyyi «I Moollanni Waa'a! Isra'ee'l minaadaphpheka gatu qaxichchoomam guulliteenannihe?» yummo.

¹⁵«Manchi beeto! Yerusaaleemanne hee'llam manni ki qarimmanni bikkina, yaayyanto'i manni bikkinaa hore'oomam hundem Isra'ee'l minaadaphphi bikkinaa ‹Ixxuwwi Waa'iinsi qee'llita'a matto'i bikkina Waa'i ka uulla niina gulummi issaa uwwaakko› yita'a woccamuulla» yukko.

¹⁶Ee bikkina Moollanni Waa'i «Qee'l uullanne hee'llam manni lambe'enne hee'llamisa issummaaree te'im annanni uulluwwanne binnaa'ummita'nnim hofqax ammanina ixxuwwi edantam Keesammi min ihoommo.

¹⁷«Ee bikkina an Waa'i kuroommi luwwi hundam ixxuwwina kure. Oono'o, minaadaphphi lambe'iinsi binnitakko'i uulli hundiinsii ki'nnuwwa wixaa'oommo. Isra'ee'l uulla odim ki'nnuwwina uwwoommo.

¹⁸Ixxuwwim daba'llitam ammane siiddam shigigaa'ookkokaa haashaarammi ikko'oo qophpha'n waa'uwwaa ekkid hoottamo.

¹⁹An ixxuwwina mat wodanoo mat sawwitee uwwoommo; ixxuwwiinsim ki'nnisa qoxxaakkoo wodano fissaa ijaajamoo maashaalli wodano uwwoommo.

²⁰Ee ammane i seera wonshitamo; i siyya'a hundam lonsitamo; ixxuwwim i minaadab ikkamo; anim ixxuwwina Waa'i ihoommo.

²¹Ihukkaarem ixxuwwi wodan haashaarammaa shigigaa'oohanee ikko'oo qophpha'n waa'uwwa awwontam keenina ixxuwwi baxisam miqoommo» yukko.

²²Ee ammanenne kiruubeelluwwi lado biddiqaa'lla'a bararimma asheetto'o. Shafe'uwwim ixxuwwi midaadinne hee'llo'o. Isra'ee'l Waa'ik belecce'oo lombi ixxuwwi hanenne hee'ukko.

²³Waa'ik belecce'oo lombi ee beero'i woriinsi ki'aa beero'iinsi eelliinchi fi'l kollonne yoo duu'n hanenne uullukko.

²⁴Kaaltannem Waa'ik Ayyaan uulliinsi iim ki'isaa Baabiloo'n uullanne yo'i yaayyanto'i manni kolli worukko. Ee lasage oo kaalti iinniinsi annanni ihukko.

²⁵Anim Waa'i iina moo'isukkoka hundam yaayyanto'i keenina kurummo.