Read Hadiyya Hizqi'eel Kitaaba 12 Bible Online

Hizqi'eel Kitaaba 12 - Hadiyya bible

Hizqi'eel Kitaaba 12

²«Manchi beeto, at hee'lloottok boqqi ikko'oo minaadaphphi lambe'ennette; ixxuwwim boqquwwi ikko'aanniinsi ki'ukkok illi hee'ukkuuyyi moo'llamoyyo; macci hee'ukkuuyyim macceessamoyyo.

³Ee bikkina manchi beeto, kiikka yaayyanchi mu'uta kattaa gudise; ixxuwwi moo'llu'uuyyim yaayyanchi dooyya ballanne asheere; yaayyamu mannisa ka beyyiinsi ki'llaa mulli beyyo mare; boqqi keen ikkota'nnim qoossitam hee'llo'o.

⁴Yaayyamu mannisa ixxuwwi moo'llu'uuyya kiikka dooyyi mu'uta ballanne gudissootto; yaayyanto'i keen issitamisam ixxuwwi moo'llu'uuyyim maaro'onne fittaa mare.

⁵Keese moo'akkam ammane ki mi'nneka gortanna huruuttaa afo'o axise; ki mu'utam ee afo'inne shullaa'llaa fisse.

⁶At mattoo beyyo moo'lloobee'isa ki mu'uta iyyitaa ki illi kollom gunguu'llitaa tuunsonne mattittuuyya keese moo'akkona; anim keese Isra'ee'l minaadabina mare'i issaammo» yukko.

⁷Anim Waa'i eese ijaajukkoka hundam issummo. Ee ballam yaayyamu mannisa i mu'uta ka'llummo. Balli hiimaa lasonne gortanna i anginne huruuraa afo'o axisaa ee kollinne i mu'uta fissummo. Manni hundim eese moo'ukkuuyyi iikka karamu mu'uta gudumonne iyyaa tuunsonne marummo.

⁸La'm balla daram Waa'i iina

⁹«Manchi beeto! Oo boqqi Isra'ee'l minaadab ‹Oono'o, ku issitoo luwwi hundim maruwwa?› yita'a keese xa'mmito'oyyonnihe?

¹⁰Ee bikkina an Moollanni Waa'i wocoommi woshsha kure. Ku hiraaqqi sagar Yerusaaleemanne ihaa gassoo gassaanchinaa eehe'enne hee'oo minaadabina hundinattemee.

¹¹Ku at issitti luwwi hundim ixxuwwanne hanenne iheena hincu luwwina mare'i ihukkisa ixxuwwina la'isoommo; ixxuwwim yaayyanto'oo keenoo qeefadanto'oo keenoo ikkamo.

¹²Ixxuwwa gassoo gassaanchi ixxi mu'uta ka'llaa gudumonne iyyimminne ixxuwwi gortanna gindita'a fissitam afo'inne luxuunxaa tuunsonne hollamookko. Ixxeka ilkollo ifiisoo bikkina ka uulla moo'ooyyo.

¹³Ihukkaarem an iikka shikka biddiqaa'aa ixxo qaashoommo. Ixxi illinne moo'oo'n lehoo Baabiloo'n beero'i kolli ixxo woroommo.

¹⁴Ixxi sogaanoo lombe egettam waardiyyuwwaa hundam kolli hundannem binnaa'oommo. Ixxuwwi lasonnem ihaa bisa'inne hollansoommo.

¹⁵Ixxuwwam ‹mulli uulli minaadaphphi lambe'enne binnaa'oommi ammane an Waa'a ihummisa laqqamo.

¹⁶Ihukkaarem ixxuwwiinsi hofqaxam oriinsi, sibaariinsii boobaniinsii gattamisa issoommo. Ka'isinne minaadaphphi lambe'enne hee'llu'uuyyi ixxuwwik bax hinkaa'nna shigigaa'oohan hee'uda'e tiittamo; anim Waa'a ihummisa laqqamo» yukko.

¹⁸«Manchi beeto! Ittoo ammane baddimminne ite. Aggoo ammanem baddimminnee huxechchinnee age.

¹⁹Uullanne hee'llam minaadabina Moollanni Waa'i Isra'ee'l uullanne Yerusaaleemanne hee'llam minaadabina ‹Ka uullanne hee'llam manni boqqoo'm mashka'inne ku uulli hundoomim maxaramoo bikkina ixxuwwi hurbaata ittamok baddimminnette. Wo'o aggamokim neeyyato murimminnette.

²⁰Kaba minaadabinne wo'mmita'a moo'antam beero'uwwi bi'llamo; uulloomim udma'i ihookko. Ee ammane an Waa'i ihummisa laqqamo› yaa kuraakko» yukko.

²¹Waa'im iina

²²«Manchi beeto! Kaaltoom hundoomim baxonne hosoo'n ayyaammuwwi qeeraa'llukko yamamaa Isra'ee'l uulli bikkina kuramoo ku kobi'llishshi maruwwa?

²³An adil Waa'i ka quuxina wocoommoka ixxuwwina kure; ku kobi'llishshi ka beyyonnem uulloo'isa issoommo. La'mmeka Isra'eelanne kuramooyyo; eehanni bikkenne ‹Oono'o, amman afaakko; hiraaqqi sagar hundim wo'mmeenatte!› yitaa ixxuwwina kure.

²⁴Isra'ee'l minaadaphphi lambe'enne qophpha'n kaalti te'im gennimmi kanniinsi eehid hooraa hore'em kuramooyyo.

²⁵An Waa'i xabbaa'aa wocoommo; wocoommi woshshi hundim wo'mmookko. Ka lasage hore'em dasooyyo. Ki'nnuwwi boqquwwa, ‹Ki'nnuwwi hanenne woroommo› yaa qoxxisaa wocummi luwwi hundam ki'nnuwwi hee'llakkam doollenne wo'mmoo'isa issoommo. Kaka wocummok an adil Waa'a» yukko.

²⁶Waa'im iina

²⁷«Manchi beeto! Isra'ee'l minaadab ki kaaltii hiraagii ‹Lobakat doolliinsi lasonne wo'mmoohane› yita'a woccamuulla.

²⁸Ee bikkina an Waa'i kuroommi woshsha ixxuwwina kure. An wocummok hundim wo'mmookko; hore'em dasooyyo. Kaka wocummok an adil Waa'a» yukko.