Read Hadiyya Hizqi'eel Kitaaba 14 Bible Online

Hizqi'eel Kitaaba 14 - Hadiyya bible

Hizqi'eel Kitaaba 14

¹Isra'ee'l awwonsaaniinsi eese sogitano xa'mmiteena waatta'a i illagenne afuutto'o.

²Ee ammane Waa'i iina

³«Manchi beeto! Ku manni ixxuwwi wodano qophpha'n waa'uwwina uwwito'ookko; ixxuwwik hawwojji ixxuwwi illagenne qolat ihoo'isina issito'ookko; ku hundim ihaa lasonne iikka doo'lla xa'mmito'is hanqannihe?» yukko.

⁴Ee bikkina Moollanni Waa'i «Isra'ee'l minaadabiinsi ixxuwwi wodano qophpha'n waa'ina uwwito'i keenii qophpha'n waa'anne otossimmi ixxuwwi illagenne qolat ihoo'isa issito'i keenii yo'o. Ku manni hiraagaanchi beyyo waattaman ihulas an Waa'i qophpha'n waa'uwwi dutukkisinnem laboo dabachcha uwwoommo.

⁵Kaka issoommok eese utta'a ixxuwwi qophpha'n waa'uwwi beyyo marimminne iinniinsi annanni ikka'a hee'llo'i Isra'ee'l minaadaba hundikam wodano dabarimminatte.

⁶«Ee bikkina Isra'ee'l oosina ‹Moollanni Waa'i «Ki'nnuwwika qophpha'n waa'uwwa uttakka'a joriinsi daba'llehe; shigigaa'oo baxiinsi hundiinsim daba'llehe!» yoolla› yihe.

⁷«Isra'ee'l minaadabiinsi mat te'im ixxuwwi lambe'enne hee'oo mulli uulli manniinsi mat iinniinsi annanni qophpha'n waa'uwwina otossi yimminne baaxiilo baxoohan ihuta'n, oo ixxi hawwojji ixxi illagenne qolat ihoo'isa issuta'nnii odim la'mmeka sogitano xa'mmeena hiraagaa'n beyyo waaroohan ihuta'nnii an Waa'i i gagoomim dabachcha uwwoommo!

⁸Anim ixxi hanenne xishshaa guzumo'oomm'isaa ixxonne osarakkamisaa issoommo; i minaadaphphi lambe'iinsim ixxo hooroommo. Ee lasage an Waa'i ihummisa laqqakkamo.

⁹«Mat hiraagaanchi xa'mmamaa qophpha'n dabachcha uwweena ki'uta'n an Waa'i eekka issona cawwaa uroommo. Eehamdu issulas Waa'i minaadaphphi lambe'iinsi ixxo bi'isoommo.

¹⁰Hiraagaanchii ixxeensi sogitano xa'mmeena waarookkokii lamim gudaanchom guzumo'antamo.

¹¹Kakam issoommok Isra'ee'l minaadab i beyyo afisoo googo ka lasage huushantambee'isaa hawwojjinne hundinnem ka lasage ixxuwwi gaga huushissambee'isaa. Kannonnemdu qoxxito'aa'lleensi an ixxuwwina Waa'i ihoommo; ixxuwwim i minaadaba ikkamo› yoolla Moollanni Waa'i» yukko.

¹³«Manchi beeto, Mat uulli minaadab eesenne amma'nnamoobee'an ihaa baaxiilo baxuta'n hurbaaxxeka atoota hooraa sibaarinne guzumo'oommo; mannaa diinatee guulloommo.

¹⁴Oo sasem manchim Nohe'i, Iyyoobii Daani'eelii ixxuwwi woronne siidantota'nnim ixxuwwi eroomminne gatisseena xantamok xale'i ixxuwwi gaga. Kaka wocukkok Moollanni Waa'a.

¹⁵«Ee uullanne moochcha asse'aa manni bee'an iheebe'ee ayyi manchim eeheen higeena xanoobee'i qaxa afeebe'ee ee uulla udma'isoommo.

¹⁶Hanqinam an hee'oommi Waa'a; oo sasem mannim ee beyyonne hee'llota'nnim ixxuwwi gagiinsi bagaan ixxuwwi oosom gatisseena xantamoyyo. Oo uullim diihookko.

¹⁷«Te'im ee uullanne ora eebaa mannii diinatii ee orinne bi'oo'isa issumta'n

¹⁸Hanqinam an hee'oommi Waa'a; oo sasem mannim ee beyyonne hee'llota'n ixxuwwi gagiinsi bagaan ixxuwwi oosom ihuta'n gatisseena xantamoyyo. Kaka wocukkok Moollanni Waa'a.

¹⁹«Te'im ee uullanne boobana asse'aa i quunqinne lobakat mannaa diinatee guulloommo.

²⁰Hanqinam an hee'oommi Waa'a; Nohe'i, Daani'eelii Iyyoobii ee beyyonne hee'llota'nnim ixxuwwi muccuroominne xale'i ixxuwwi gaga gatixxitamo bagaan ixxuwwi gaqqi oosom ihuta'n gatisseena xantamoyyo» yukko. Kaka wocukkok Moollanni Waa'a.

²¹«Moollanni Waa'i ‹Minaadabaa diinatee mateeyyoominne guulleena ora, sibaaro, moochchaa jabboo ka soorem kee'mmaalli boobanam Yerusaaleemanne eeboommo.

²²Ihukkaarem Yerusaaleemanne ee hundiisim baraara fitto'i qax ki'nnuwwi beyyo waattamo. Ixxuwwikam haalataa baxoo moo'llakkam ammane ixxuwwi hinkido'i manda'e laqqakkamo› yoolla» yukko. Kaka wocukkok Moollanni Waa'a.