Read Hadiyya Hizqi'eel Kitaaba 17 Bible Online

Hizqi'eel Kitaaba 17 - Hadiyya bible

Hizqi'eel Kitaaba 17

²«Manchi beeto, Isra'ee'l oosina booyyaansa kure; kobi'llishshinnem caakkissaa

³‹Moollanni Waa'i, lob qeeraa'l bararoo lad yookkok ee'isam ixxi orachchi hundoomim ladinne eddeesamaakkoo gadar geejji gaaqichchi Liibaanoosa waaraa digiphphi caafanne afuurukko.

⁴Ee Liibaanoosika hanaan yoo caaf ludo muraa daddaraan yoo uulla massukko. Eekkam mu'uta daddarakkam beero'onne kaasukko.

⁵Ee lasage Isra'ee'l uulliinsi sire'e massaa xoo'oobee'i wo'o agukkuuyyi li'oo mat harish beyyonne kaasukko.

⁶Oo kaashshim uulliinsi lobakata iim li'oo'nnim haraarisa baaqaakkoo woyi'n kaashshi ihukko. Ixxi caaffuwwim ee gaaqichchi kollonne iim li'ukko. Ixxi nigguwwim uullanne aad aagukko. Oo woyi'n kaashshim caaffuwwaa buyyuwwaa danaamisa eebaa hee'ukko.

⁷Odim «Lob lad yookkok ixxi orachchi hundoomim lado edde'aakkoo mulli geejji gaaqichchi hee'ukko. Oo woyi'n kaashshim kaasamu beyyiinsi nigga wo'o siixxeena ee gaaqichchi kolli massukko. Caaffuwwam ixxi kolli biddiqaa'ukko.

⁸Caaffuwwa li'isaa misha mishoo'isinaa mishisoo woyi'n kaashshi ihoo'isinaa gadanonne lobakat wo'i yoo harish uullanne kaasamaa hee'ukko.

⁹Adi'l Waa'i ‹Ku kaasamu woyi'n kaashshi li'oohonnihe? Luxxi amma'n gaaqichchi ixxeka nigga xoqolaa mishoom shamoo'isaa gogoo'isaa ee'isam lataakkoo buyyi quuboo'isaa issooyyonnihe? Ixxi nigga xoqolimmina qoxxaalli o'l mu'ut te'im malaayyaam gogot hasisooyyo.

¹⁰Mulli beyyonne kaasakkota'n li'oohonnihe? Eelliinchi firinne waaroo udma'i hafachchi aphphisoo ammane ixxi li'u beyyonnem hore'em gogooyyonnihe?› yitaa woce» yukko.

¹²«Ka boqqi minaadabina ‹Ka woshshuwwik tiratoom mada'e ihukkisa laqqakkamoyyonnih? Baabiloo'n adil Yerusaaleema maraa adilaa gassaanoo qeefadukko; ixxuwwam Baabiloona massukko.

¹³Ee adi'l abaroosiinsi mato massaa ixxenne iittamukkisa moo'isoo hidi'l sagara aagukko. Ee uullikam la'amaakkoo manna qeefadaa massukko.

¹⁴Kakam issukkok Yihuxxi adil maashaalloominnee ijaajanchinnee hidi'l sagaranne qoxxaa hee'oo'isa issimminatte.

¹⁵Ihukkaarem Yihuxxi adil bangujjaa faradoo lobakat gogotaa ixxena eebakkona Gibxi uulla manna asse'ukko. Eehannah ku ixxi qoodo'i makkoohonnihe? Kannindu xoreena xanoohonnihe? Hidiro gindulas guzumo'anchiinsi xoreena xanoohonnihe?

¹⁶Moollanni Waa'i «Hanqinam an hee'oommi Waa'a; ku adil ixxi adilla'n barcumanne dissu Baabiloo'n adilinne hide'aa iittamu hidi'l sagara gindu bikkina Baabiloonanne lehookko.

¹⁷Baabiloo'n manni lobakat manna shiteena beero'i kululleetanne kireeta hinta'a buchcha shiraashittu'uuyyi girba baxxam ammane Fari'oon ixxi malaayyaam gogotinnee lobakat o'l manninnee waaraa oramaa hara'mmeena xanooyyo.

¹⁸Ixxim hidiro gadimminne hidi'l sagara gindu bikkinaa ixxi anga uwwaa lasagem ka keeno hundam issu bikkinaa guzumo'anchiinsi xorooyyo» yukko.

¹⁹Ee bikkina Moollanni Waa'i «Hanqinam an hee'oommi Waa'a; i summinne hide'u hidiro gadaa hidi'l sagara gindu bikkina ee hidiro ixxi gagannem eeboommo.

²⁰Iikka shikka ixxi hanenne qaashaa qaashinne amadamoo'isa issoommo. Eese lagu bikkina Baabiloona eebaa ixxonne oogatoommo.

²¹Ixxek doo'llanto'oo gaadaan o'l beyyonne letamo. Ee lehiinsi xottam keenim kolli hundannem binnitamo. Ee ammane eekka wocummi Waa'i anette ihummisa laqqakkamo» yoolla.

²²Moollanni Waa'i «Liibaanoos haqqi hammiinsi mat caafa massoommo; eehanni quuxxuwwiinsi mato qomboommo. An i gagoomim lob duunanne kaasoommo.

²³Kaasoommokim Isra'ee'l uullanne yoo lob duunannette. Eekkam issoommok caaffuwwi li'aa moo'amoo'isa issaa misha mishimminne mishisoo Liibaanoos haqqi ihoo'isinatte. Ixxi lugumonnem annanni annanni haqquwwi hee'ookko; ixxi haf lugumonnem lad yoo qooccanchi hundim do'nna baxookko.

²⁴Ee uullanne yoo haqqi hundim an Waa'i ihummisa la'ookko. An qeeraa'l haqquwwa gundisoommo. Gundi haqquwwam iim shiqaa li'oo'isa issoommo. An buyyaam haqquwwa gokkisoommo; gogaalli haqquwwam latisoommo. An Waa'i kaka wocaammo; ‹Issoommo› yummoka hundam issoommo» yoolla.