Read Hadiyya Hizqi'eel Kitaaba 18 Bible Online

Hizqi'eel Kitaaba 18 - Hadiyya bible

Hizqi'eel Kitaaba 18

²«Isra'ee'l uullanne lobakat ammane minaadab ‹Anno'i hamaraar woyi'n misha itto'o; ihukkaarem ookki ixxuwwi oosika inqe sigillaa'ukko› yukkuuyyi wocoo kobi'llishshi mahane?.

³«Hanqinam an hee'oommi Waa'a; ka kobi'llishsha Isra'ee'l uullanne manni od wocooyyo. Kaka wocummok an Moollanni Waa'a.

⁴Oono'o, foor hundim iihane. Anno'anem ihukko oosik foor iihane; baaxiilo baxoo foor ixxi gagoomim lehookko.

⁵«Manchi muccura, hanqa egeroohanee hanqo'anee ihuta'n

⁶Isra'eel qophpha'n waa'uwwina otossooyyo; te'im hooramaakkoo otossakkam beyyuwwanne kitimakko'i maara itooyyo. Mulli manni meentinne, te'im aga'n xur moo'amu meentichchonne maqire saa'ooyyo.

⁷Ayyem wor amadooyyo; ihukkaarem dabaa amadu luwwa annichchinam dabarookko, bogooyyo. Sibaarukkaannina hurbaata itisookko; habiillukkaannina eddeesookko.

⁸Ixxi diinate qaro'ina liqaayyisooyyo; jor baxo baximmiinsi ixxi gaga ege'llookko. Joramu manna iittanseena hanqo'i oogato oogatookko.

⁹Kido'i manchi i seera egerookko; i siyya'am lonsookko; oo manchi muccur ihu bikkina heechchanne hee'ookko. Kaka wocummok Moollanni Waa'i anette.

¹⁰«Ihukkaarem ka muccur manchina boqqaa manna shoohanee ihaa te'im kanniinsi woroon yoo keeniinsi mato issoo beet hee'uta'n

¹¹oo beet ixxi anni baxubee'i jor baxo hundam baxuta'n, duunanne qophpha'n waa'uwwina otossakkam beyyuwwanne durakko'oka ituta'n, manni meentonnem igguta'n,

¹²buxaa hawwaanoo u'nnisuta'n, boguta'n, diinate liqaayyo massu manniinsi dabaa amadu luwwa ixxi gagina gatixxuta'n, qophpha'n waa'uwwina otossuta'n, shigigaa'oo luwwa hundam issoohan ihuta'nnii

¹³ixxi diinate kee'mmaalli qaro'o edaa miqiseena liqaayyisoohan ihuta'nnii eehannah eehido'i manchi hee'immi hasisoohonnihe? Hore'em hee'immi hasisooyyo. Ka shigigaa'oo luwwa hundam issu bikkina hanqo'isam lehookko. Ee lehinam xa'mmamookkok ixxi gagame.

¹⁴«Ihukkaarem ka baaxiilo baxoo beetina goonchi beet hee'uta'n, ixxim anni baxoo baaxiilo hundam moo'aa ixxi anni googo awwonubeelas

¹⁵Isra'ee'l qophpha'n waa'uwwina otossubeelas, ee waa'uwwinam kitimakko'i ayyi luwwam itubeelas, mulli manni meentinne saa'ubeelas

¹⁶ayyem woramadubeelas, te'im manni amaxxa bogubeelas, diinate liqaayyisoo ammane dabaa aa'u luwwa gatisubeelas sibaarukkaannina hurbaata uwwuta'n, leexa'ukkaannina eddeesuta'n,

¹⁷bux keeno barche'e issubeelas, diinate qaro'inne liqaayyisubeelas shiqqeen diinate edaa miqisubeelas, i seera egerulasii i siyya'a awwonulasii hanqinam eehido'i manchi foorinne hee'ookko bagaan ixxi anni baxu baaxii'l mashka'inne lehooyyo.

¹⁸Ihukkaarem ixxi anni mulli keeno qawwiisu bikkina, ixxi abbaayyo bogu bikkinaa minaadabina jor baxo baxu bikkinaa ixxi baaxii'l mashka'inne ixxi lehookko.

¹⁹«‹Eehaare beet anni baaxii'l mashka'inne guzumo'amubee'ek mahinatte?› yitakkeena xantakkamo. Beet eroomma issaa hanqaa i seeraa egeraakko. Ee bikkina ixxi hanqo'isam foorinne hee'ookko.

²⁰Baaxiilo baxookkok ayyim lehookko; beet anni baaxii'l bikkina guzumo'amooyyo; annim beet baaxii'l bikkina guzumo'amooyyo. Er manchi ixxi eroomminnem er bito siixxookko; jor manchim ixxi jollinnem guzumo'amookko.

²¹«Baaxiilaanchi baaxiilo baximma uraa i seera egerulas, hanqaa eroommaa issulas hanqinam ixxi foorinne hee'ookko bagaan lehooyyo.

²²Hanqi ihaakkoo baxo baxu bikkinam ixxi baaxiil hundim haafamaa foorinne hee'ookko.

²³Hanqinam an baaxiilaanchi manchi lehonne liiramoommonnihe? Ee'isayyo, an liiramoommok manni baaxii'l googiinsi daba'llaa foorinne hee'immannette. Kaka wocukkok Moollanni Waa'a.

²⁴«Ihukkaarem er manchi er luwwa issimma uraa baaxiilaan issitam jor luwwaa shigigaa'oo luwwaa issimma asheeruta'n foorinne hee'eena xanookkoka labissakka'attennihe? Ee'isayyo! Hore'oomam issu eroommi bax hundim sawwamooyyo; amma'nnancha hoogu bikkinaa baaxiilaanchom ihu bikkinaa lehookko.

²⁵Ki'nnuwwim ‹Eehid ihulas Waa'i goog xabbeenayyo› yitakkeena xantakkamo. Isra'ee'l minaadaba, macceessehe. Hanqinam i goog xabbeenayyonnihe? Xabbeen ihubee'eka'i ki'nnuwwi googo.

²⁶Muccur manchi muccuroo'm baxo baximma uraa baaxiilo baxuta'n lehookko; lehookkokim ee baaxii'l mashka'innette.

²⁷Ee'isam baaxiilaanchi baaxiilo biiraa yaa hanqi ihaakkookkokaa er baxoo baxulas ixxi foore gatixxookko.

²⁸Mashka'oomim oo manchi ixxi baaxiilo xassaa la'aa baaxiiliinsi daba'llu bikkina hanqinam foorinne hee'ookko bagaan lehooyyo.

²⁹Ihukkaarem Isra'ee'l minaadab ‹Waa'ik goog xabbeenayyo› yitakkamuulla. Hanqinam i goog xabbeenayyonnihe? Xabbeen ihubee'eka'i ki'nnuwwi googo.

³⁰«Kabadem an Moollanni Waa'i, Isra'ee'l minaadabina ‹Ki'nnuwwi jor baxinne ki'nnuwwa hundam guzumo'oommo. Ee bikkina baxxakkam jolliinsi daba'llehe. Ee bikkina baaxiilo biiraa yi'llehe; eebeelas ki'nnuwwi baaxiilim ki'nnuwwa bi'isookko.

³¹Isra'ee'l minaadaba, mahina letakkamane? Ki'nnuwwika baaxiilo biiraa yi'llehe; haareechchi tiirii haareechchi sawwitii ki'nnuwwanne hee'ona.

³²An ayyi manchim lehona hasoommoyyo. Ee bikkina ki'nnuwwi hundichchim baaxiilo biiraa yitakka'a foorinne hee'llehe› yoolla» yukko. Moollanni Waa'i kaka wocaakko.