Read Hadiyya Hizqi'eel Kitaaba 19 Bible Online

Hizqi'eel Kitaaba 19 - Hadiyya bible

Hizqi'eel Kitaaba 19

¹Waa'i ka kichchechchi wi'llo Isra'ee'l gassaanina wi'llona kurukko.

²Kiyyumma hobbi lambe'enne hee'oo meentichchi hobbichchisa hee'llo'o! Hobbi geexxuwwi lambe'enne heellantu'uuyyi is wotalla li'isso'o.

³Isem ee wotalliinsi mato abooyyita'a li'isso'o; ixxim geexukko; hochchimmam losaa manna itimma asheerukko.

⁴Minaadab ixxonne laachchinne firukko; hinto'i barennem amaddo'o; xaa'l hookko'innem sane huruutta'a gosaassu'uuyyi Gibxa massito'o.

⁵Oo meentichchi hobbichchim ixxi sawwit wo'mmubee'isa moo'aa neeyyato murimminne ixxi wotalliinsi mato massaa abooyyaa li'isimminne geex hobbichchi issukko.

⁶Ixxim mulli hobbinne do'imma asheerukko. Geex hobbichchom ihukko; hochchimma losukko; mannam itimma asheerukko.

⁷Ixxuwwika girba iiqansukko; beero'uwwam gindansukko. Ixxi toxoo amman hundam oo uullii ee uullanne hee'llam mannii hambalaachchantamo.

⁸Minaadab hundim ixxonne ki'llo'o; hundim yo'i beyyi hundiinsim waatto'o; ixxuwwi shikkam qaashsho'o; hinto'i barennem amadamukko.

⁹Xaa'l hookko'inne amadda'a woshaadina baxxo'i jagaranne dissito'o; Baabiloo'n adi'l beyyom massito'o; ixxi sagar od Isra'ee'l hoffi duunnuwwanne macceesamoobee'isa karaxxi minenne aagisso'o.

¹⁰Kiyyumma wo'i gadanonne kaasamu woyi'n kaashshisa hee'llo'o; isem wo'i lophphimmiinsi ki'ukkok erisa mishaa caaf haraar ihaakkoo woyi'n kaashshisa ikko'o.

¹¹Ee woyi'n kaashshik caaffuwwi qoxxaalluwwi hee'u bikkina adilla'n bicci iheebe'e li'ukko. Woyi'n kaashshoomim tiiwwi haqqiinsi lophphaa li'ukko; ixxekim qeeraa'lloom lobakat caaffuwwinne maqirem iim shiqaa moo'amukko.

¹²Ihukkaarem quunqinne nigginnem xoqolamaa uullanne ubukko; uulli udma'iinsi ki'oo eelliinchi fi'l hafachchi gokkisukko; mishshuwwim giggirukko; qoxxaalli caaffuwwim gogukko; giirim itukko.

¹³Kaba odim uulli udma'anne wo'i bee'i gogaalli uullanne kaasamukko.

¹⁴Ixxi lob caafiinsi giir firukko; caaffuwwaa mishaa hundam itukko; ixxek caaffuwwi la'mmaagge qoxxeena xanoobee'i bikkina adilla'n bicci iheena xanooyyo. Kuk ododim kichchechchinne sorakkamane; Ixxim wi'llina awwaadookko.