Read Hadiyya Hizqi'eel Kitaaba 2 Bible Online

Hizqi'eel Kitaaba 2 - Hadiyya bible

Hizqi'eel Kitaaba 2

¹Ee lasage «Manchi beeto, ki'llaa lokkinne uulle; an kiinninne woceena hasoommo» yukko.

²Iina eekka wocukkisam Waa'ik Ayyaan eesenne dillaa iimaa'aa i lokkinne uullisukko. Iina wocoo luwwam macceesummo.

³Waa'im iina «Manchi beeto, iina boqqito'i Isra'ee'l minaadaphphi beyyo keese asse'oommo. Ixxuwwii ixxuwwi anno'ii kaballi afeebe'em iina boqqito'isam yo'o.

⁴Ku minaadab xiiqqamoohanee wodan duudaakkoohanee. Ee bikkina an yoommi luwwa Moollanni Waa'i ka'isa yoolla yitaa ixxuwwina kuttoo'isina keese asse'oommo.

⁵Ixxuwwi boqquwwi keen ikko'i bikkina macceesso'om macceesso'oyyom hiraagaanchi ixxuwwi lambe'enne yoo'isa laqqamo.

⁶«Manchi beeto, ihukkaarem ixxuwwaa woccam woshshaa baddititte. Uttii halluttii kibbukkokaa ginxaa yakkam daquu'l lambe'enne yoontokaa labukkaarem ee boqquwwi kee'nneka quunqee woccam woshshaa hore'em baddititte.

⁷Ixxuwwi boqqi minaadab ikko'i bikkina ki woshsha macceesso'om macceesso'oyyom an kiina kuroommi woshsha ixxuwwina kure.

⁸«Manchi beeto, an kiina kuroommi woshsha macceese; atim ixxuwwisam boqqi ikkitte; ki suume fooqaa'e; an kiina uwwoommokam ite» yukko.

⁹Ee lasage mat kitaabamaakkoo xaaxammi omachcho amadaakkoo angi i kollonne biddiqaakkoo moo'ummo.

¹⁰Oo angim ee kitaabamu xaaxammi omachcho i illagenne tiraa biddiqaa'ukko. Ee omachchonne lamem kollonnem wi'llik, kichchechchikii laachchi sagarii kitaabamaa hee'ukko.