Read Hadiyya Hizqi'eel Kitaaba 20 Bible Online

Hizqi'eel Kitaaba 20 - Hadiyya bible

Hizqi'eel Kitaaba 20

¹Neese qeefadammummi lama'l hiinchonne, onti agan aagu tommi ayyaamonne Isra'ee'l awwonsaaniinsi hofqaxim Waa'i doo'l bikkina xa'mmiteena i beyyo waatta'a i illagenne afuutto'o.

²Ee ammanenne Waa'i iina

³«Manchi beeto, an Moollanni Waa'i ‹Waattakko'ok i doo'lla laqqakkeenannihe? Hanqinam an hee'oommi Waa'a; eese maham xa'mmitakkona hasoommoyyo; an Moollanni Waa'i kaka wocaammo› yoolla yitaa ka mannina kure.

⁴«Manchi beeto, ka mannanne oogattoohonnihe? Hanqinam oogattoohonnihe? Eehidette ihulas ixxuwwi anno'i baxxo'i shigigaa'oo luwwa tiittamisa isse.

⁵Ee'isam Moollanni Waa'i «Isra'ee'l minaadaba doo'llummi ammane Yaaqoob shumo'ina Gibxanne i gaga la'isaa ‹An Waa'i ki'nnuwwina Moollanna› yaa ixxuwwinne hidi'l sagara aagummo.

⁶Ee balla ixxuwwa Gibxiinsi fissaa adii marabii daadoo heer uulliinsi hundiinsim lobakata danaam uulla uwweena hide'ummo.

⁷Ixxuwwinam ‹Ki'nnuwwi annannichchim ille ubbussakko'i shigigaa'oo misilluwwa bi'issehe. Gibxi uulli qophpha'n waa'uwwinnem ki'nnuwwi gaga haashaassitakkotte. Kaka wocummok an ki'nnuwwi Moollanni Waa'a› yummo.

⁸Ihukkaarem ixxuwwi eesenne boqqito'o bagaan i woshsha macceesso'oyyo; ille ubbusso'i shigigaa'oo misilluwwam ixxuwwi illagiinsi hootto'oyyo. Gibxi uulli qophpha'n waa'uwwinam otossimma utto'oyyo. Ee bikkina Gibxanne hee'llo'i ammane ixxuwwanne i quunqa dilliiseena sawwaa hee'ummo.

⁹Ihukkaarem ixxuwwinne hee'llo'i mulli minaadaphphi illagenne Isra'ee'l minaadaba Gibxiinsi fisseena sagara aagaa hee'ummo; ee bikkina i summi haashaaramoobee'isa eekka issummo.

¹⁰«Ee bikkina ixxuwwa Gibxiinsi fissaa udma'i uullanne awwonsummo.

¹¹Ijaajamookkok hundim foorinne hee'eena xanoo'isina iikka seeraa ijaajoo losisummo.

¹²Ixxuwwa keesoommok anette ihummisa laqqamisina ihaannonnee ixxuwwi lambe'ennee mare'i ihoo'isina i Usheexxaxxi Ayyaamo uwwummo.

¹³Ihukkaarem Isra'ee'l minaadab uulli udma'anne hee'llu'uuyyi eesenne boqqito'o; ijaajamookkok hundim foorinne hee'eena xanoo i seeraa ijaajoo egetto'oyyo; Usheexxaxxi Ayyaamo hore'oomam haashaassito'o. Ee bikkina udma'i uullannem i quunqa ixxuwwanne dilliisaa bi'iseena sawwaa hee'ummo.

¹⁴Ihukkaarem Isra'ee'l minaadaba Gibxiinsi awwonsaa fissummuuyyi moo'llo'i mulli minaadaphphi illagenne i summi haashaaramoobee'isa ee hundam iyyaqqummo.

¹⁵Odim heer uulliinsi hundiinsim lobakata danaam ihaakkoo adii marabii daadoo uulla ixxuwwina uwweena hide'aa hee'ummo. Ihukkaarem ee lasage ixxuwwi uulli udma'anne hee'llu'uuyyim ee uulla ixxuwwi aaggambee'isa hide'ummo.

¹⁶Mashka'oomam ixxuwwi wodano qophpha'n waa'uwwina uwwito'ookko; i seeraa ijaajoo gindito'ookko; Usheexxaxxi Ayyaamom bushisso'ookko.

¹⁷«Ihukkaarem an qishixxummi bikkina ixxuwwa bi'isummoyyo; uulli udma'annem ixxuwwa guullaa bi'isummoyyo.

¹⁸Ixxuwwi oosinam ‹Gaassi ki'nnuwwi anno'ika heechqaanqaa jor googoo awwontakkotte; ixxuwwi qophpha'n waa'uwwinnem haashaarantakkotte.

¹⁹An ki'nnuwwina Moollanni Waa'a. I see'llisanne hee'llehe; i ijaajom qoxxitakka'a egellehe.

²⁰An ki'nnuwwinne aagummi hidi'l sagarina mare'i ihoo'isinaa ee'isam an Waa'i ki'nnuwwina Moollanni ihummisa tiittakkamisinaa Usheexxaxxi Ayyaamo keesamaakkoohan issehe› yummo.

²¹«Ihukkaarem ixxuwwik oos eesenne boqqito'o; Ijaajamookkok hundim foorinne hee'eena xanoo'isina uwwummi i seeraa ijaajjoo egetto'oyyo. Usheexxaxxi Ayyaamom bushisso'o anim uulli udma'anne hee'llu'uuyyim ixxuwwanne i quunqaa boobanaa dilliisaa bi'iseena sawwaa hee'ummo.

²²Ihukkaarem Isra'ee'l minaadaba Gibxiinsi fissummisa moo'llo'i mulli minaadaphphi illagenne i summi gadamoobee'isa eekka issoombee'isa iyyaqqummo.

²³Odim annanni annanni uullanne mulli minaadaphphi lambe'enne binnaa'oommisa uulli udma'anne hee'llu'uuyyim qoxxisaa kuraammo.

²⁴Mashka'oomim i seerina ijaajjanto'oyyo; Usheexxaxxi Ayyaamom haashaassito'ookko; ixxuwwi wodanom gaassi anno'i qophpha'n waa'uwwina uwwito'ookko.

²⁵«Anim ixxuwwa eran ihubee'i heechqaanqinaa hee'llambee'i seerinaa higisaa uwwummo.

²⁶An Waa'i ihummisa laqqonaa muggitonaa ixxuwwika won ooso shokkoo kitim issita'a hincaa'imminne haashaarantamisa issummo.

²⁷«Eebikkina manchi beeto, an Moollanni Waa'i yoommi luwwa Isra'ee'l minaadabina kure. Ixxuwwi anno'i eese laggo'ookkoo sholliisso'ookkoo.

²⁸Ixxuwwina uwweena hide'ummi uulla uwwummo. Ihukkaarem ixxuwwi qoffit beyyuwwaa buyyaam haqquwwaa moo'lla'a ee beyyuwwanne kitima hincaa'llo'o. Ixxuwwim shokkoo kitiminne, enje'oo aduruusinnee kitimina duntam agginnee eese quuqisso'o.

²⁹Anim ‹Ku ki'nnuwwi otossitakkeena mattakkam duunnuwwi mahane?› yaa xa'mmummo. Oo beyyuwwim kaballi afeebe'em ‹Qoffit beyyuwwa› yamamookko.

³⁰Kabadem an Moollanni Waa'i Isra'ee'l minaadabina ‹Ki'nnuwwi anno'isam ki'nnuwwi gaga haashaassimminnee ixxuwwaannina haashaarammi qophpha'n waa'uwwina otossimminnee mahina huushantakkammuulla?

³¹Kabadem ee qophpha'n waa'uwwina kitima hincaa'imminnee ki'nnuwwi ooso giiranne kitim issitakka'a hincaa'imminnee ki'nnuwwi gaga ee waa'uwwinne haashaassitakkamuulla. Ee hundam issitakka'a lasage i doo'lla xa'mmitakkeena i beyyo waattakkamo. An Moollanni Waa'i hanqinam hee'oommi Waa'i ihummi bikkina ma'lluwwam eese xa'mmitakkona hasoommoyyo!

³²Haqqinaa kininaa otossitam mulli minaadaphphisaa heer uulli minaadaphphisaa ikkakkeena hassakko'ookko. Ihukkaarem ki'nnuwwi sawwitakkam sawwit hore'em iheena xanooyyo› yoommoka kure» yukko.

³³Moollanni Waa'i «Hanqinam an hee'oommi Waa'a; i malaayyinne, wodinnee quunqinnee ki'nnuwwa gassoommo.

³⁴Binnitakka'a hee'llakkam uulluwwiinsii mulli minaadaphphi lambe'iinsii wixxaa'oommo. Ki'nnuwwa wixxaa'oommokim i malaayyinnee wodinnee dilliisoommi quunqinnette.

³⁵Ki'nnuwwam ‹Mulli minaadaphphi Udma'a› yakkam beyyo woraa ki'nnuwwi illi moo'ukkuuyyim ki'nnuwwanne oogatoommo.

³⁶Gibxi uulli udma'anne ki'nnuwwi anno'onne oogatummisam ki'nnuwwannem oogatoommo. Kaka wocummok an Waa'a.

³⁷«I ijaajonne gassoommo; i hidi'l sagarinnem karoommo.

³⁸Boqquwwaa eese hawwodu keenoo ki'nnuwwiinsi annanni issoommo. Hee'llam uulliinsim fissoommo. Ihukkaarem Isra'ee'l uulla hore'em aaggamoyyo. Ee ammane an Waa'i ihummisa laqqakkamo» yoolla.

³⁹Isra'ee'l minaadaba, Moollanni Waa'i ki'nnuwwi bikkina «I woshsha macceessakkambeelas annannichchim mattakka'a ki'nnuwwi qophpha'n waa'uwwina otossi'llehe! Ihukkaarem iikka keesammi summa ka lasage ki'nnuwwi qophpha'n waa'innee uwwitakkam luwwinnee haashaassitakkamoyyo.

⁴⁰Keesammi i duunanne Isra'ee'l lob duunanne ee uullanne Isra'ee'l minaadab hundim iina otossookko. Ee beyyonnem ixxuwwa aa'oommo. Ee'isam ee beyyonne iina uwwitakkam doo'l luwwa, wonaa keesammi kitimaa ki'nnuwwiinsi hasoommo.

⁴¹Binnitakka'a mulli minaadaphphi lambe'enne hee'llakko'i uulliinsi fissaa wixxaa'oommi ammane erisa enje'oo aduruusisa ki'nnuwwa aa'oommo. Mulli minaadab moo'llu'uuyyim ki'nnuwwina i keesammooma la'isoommo.

⁴²Gaassi ki'nnuwwi anno'ina uwweena hide'ummi Isra'ee'l uullanne ki'nnuwwa dabaraa woroommi ammane an Waa'i ihummisa laqqakkamo.

⁴³Ki'nnuwwi baxxakko'i tuussiisoo luwwaa haashaarantakko'isaa tiittakkamo. Baxxakko'i jor luwwiinsi ki'ukkok ki'nnuwwi gaga shigigitakkamo.

⁴⁴Isra'ee'l minaadaba, ki'nnuwwi jor taakkisaa jor baxisaa ihoo'n i summi lombi bikkina ki'nnuwwina issoommi luwwinne an Waa'i ihummisa laqqakkamo» yoolla.

⁴⁵Waa'i iina

⁴⁶«Manchi beeto, Woroo'n qaranne daba'llitaa ee qaranne woce; woroo'n qaranne yoo haqqi doomina qooxxaalli hiraago woce.

⁴⁷Woroo'n qaranne yoo haqqi doomina an Moollanni Waa'i ‹Moo'e! Oono'o, an keesenne giira xanqisoommuulla. Oo giirim aashaallaa gogaallaa annanni issoo'n haqqi hundam shokkiisookko; giiram xoo'iseena xanookkok hee'ooyyo. Woroo'n qariinsi hanaa'n qar afeebe'em maham gatisoo'n shokkiisookko.

⁴⁸Ee giiram an Waa'i xanqisumman ihukkisaa ayyim xoo'iseena xanoobee'an ihukkisaa manni hundim moo'ookko› yoommoka macceese yitaa kure» yukko.

⁴⁹Ihukkaarem an «I Moollanni Waa'a! Hundim ‹Amman hundam ixxi losisookkok kobi'llishshinnette› yitu'uuyyi quunquuntamuulla; ee bikkina iina mah ee'llookko?» yummo.