Read Hadiyya Hizqi'eel Kitaaba 21 Bible Online

Hizqi'eel Kitaaba 21 - Hadiyya bible

Hizqi'eel Kitaaba 21

²«Manchi beeto, Yerusaalee'm kolli daba'llitaa minaadab otossoo beyyuwwinaa Isra'ee'l uullinaa hiraago woce.

³Isra'eelina ‹An keesenne ki'aammo; bisa'am seejjiinsi fissaa baaxiilaanchoo muccuraa ki woriinsi bi'isoommo.

⁴Ki woriinsi Baaxiilaanchoo muccuraa woroo'n qariinsi hanaa'n qar afeebe'e bi'iseena i bisa'i seejjiinsi firookko.

⁵Bisa'a seejjiinsi fissummok an Waa'i ihummisa manni hundim la'ookko; ixxim kora'am daba'llooyyo› yihe.

⁶«Ee bikkina manchi beeto, wi'lle! Ixxuwwi illagenne kichchechchinne qaraaraallisa wi'lle!

⁷Ixxuwwim ‹Mahina wi'llitoolla?› yita'a xa'mmitota'n ‹Hanenne waaroo jor woshshi bikkinatte› yihe. Ee woshshanne manni hundikim wodan baa'ookko; wod hundim hoogookko; manni hundim neeyyato murookko; malaayyi hundim qacookko. Oono'o, oo balli waaroolla; ookki hanqinam ihoohane» yoolla. Moollanni Waa'i kaka wocaakko.

⁹«Manchi beeto, hiraago woce! An Waa'i i minaadabina ‹Bisa'i, qareesamaa shiinshamaakkoo bisa'a!

¹⁰Sheena qareesamaakko; banqisa belecce'eena shiinshamaakko. I minaadab kuramu woshshaa guzumo'oo hundam gaddo'i bikkina ka lasage liiranchi ixxuwwina hee'ooyyo.

¹¹Bisa'i shiinshamaa gudaakko; Shoo manchinam uwwamaakko.

¹²Manchi beeto, kichchechchinne laare; ku bisa'i gudukkok i minaadabaa ixxuwwi awwonsaanoo bi'iseenatte. Ixxuwwim gatto'i i minaadabinne maqirem letamo. Ee bikkina kichchechchinne ki biqe aphphixxe.

¹³I minaadab keenamoo amman afaakko; eese hawwodimmamdu uttobeelas ku hundim ixxuwwanne afookko› yoommoka kure. An Moollanni Waa'i kaka wocaammo.

¹⁴«Kabadem Manchi beeto, hiraago woce! Ki angam qashayyeese; bisa'i lam koree sas koree shoohane, dambaqisoohanee duroohanee.

¹⁵Ee bikkina i minaadaphphek wodan hoogookko; lobakat keenim qolanta'a ubbamo; ixxuwwa shoo bisa'a gooc hundannem dissaammo. Aayye! Oo bisa'i banqisa belecce'oohane; sheenam qareesamaa gudaakkoohane.

¹⁶Qare'aalli bisa'a, at iittitti kollinne qeddinnem makkinnem mure!

¹⁷Anim i anga qashayyeesoommo; i quunqim billookko. An Waa'i kaka wocaammo» yukko.

¹⁸Waa'i iina

¹⁹«Manchi beeto, Baabiloo'n adil bisa'a makkisaa amadaa waaroo lamem googonnem mare'e isse; lamem gooqqekim kichchi uulli mato; ee googguwwi lamejjanne beero'o moo'isoo beyyonne mare'e kaase.

²⁰Ora Amoo'n beero'o Raaba'aa girbamaakkoo Yihuxxi beero'o Yerusaaleemaa massoo googguwwanne mare'e isse.

²¹Baabiloo'n adil lamem googguwwi lamejjannem uullookko. Hinka'i googinne marimmi hasisooda'e la'eena saamo fissookko. Qophpha'n waa'uwwam sogitano xa'mmookko. Kitimina durakko'i diinaxxekam afare saarayyookko.

²²Oono'o, ixxek makki angi ‹Yerusaaleema!› yoo saamo ki'isookko. Oo saamim ixxi maraa girbuwwa gindakkam mu'uta gudisaa ooxxi goocanne hincaa'ona, orina ki'isanseena sha'llamona, buchcha tuubaa shiraashironaa kibbakkam girba baxonaa kurookko.

²³Yerusaalee'm minaadab hundim Baabiloonina ijaajanteena hide'llo'oo bikkina ku woshshi ixxuwwanne afookko yita'a sawwito'oyyo. Ihukkaarem Baabiloo'n adil qeefadoo ammane ixxuwwika baaxiilo tiissiisookko.

²⁴Ee bikkina an Moollanni Waa'i ixxuwwina yoommok kane. Ki'nnuwwik baaxiil la'amaakko; baaxiilaan ikkakko'isam manni hundim la'ookko; baaxiilaan ikkakko'isam baxxakkam baxinne la'issakkamuulla. Ee bikkina qeefadantakka'a mattakkamo.

²⁵«At jollinnee haashaaranchinnee wo'mmitaattoo Isra'ee'l awwonsaancho! At guzumo'antoo lasaanchi amman kaba afaakko.

²⁶An Moollanni Waa'i kaka wocaammo. Ki adilla'n mare'e ubbuuse! Shaashsham tire! Woshshuwwi hee'ukkisa hee'ooyyo. Woroon yo'i keeno ki daannoomminne iimaa'llaa kaba gassaan ikko'i keeno sholliise!

²⁷Bichcha, bichcha! Eeyya, hanqinam oo beero'i bi'oo'isa issoommo. Ihukkaarem beero'o guzumo'oo'isina doo'llummok waareebe'i kuk ihooyyo; ee ammane ixxena higisaa uwwoommo.

²⁸«Manchi beeto, hiraago woce! Amoo'n minaadaphphi bikkinaa ixxuwwi game'llanchi bikkinaa an Moollanni Waa'i ixxuwwina ‹Bisa'i bi'iseena gudaakko; shaa guulleenaa banqisam belecce'eenaa qareesamaakko› yoommoka kure.

²⁹Moo'llakkam kaalti qophpha'nnane; hiraaggakkam hiraagim qophphano. Jollii haashaaranchii ki'nnuwwanne wo'mmaakko. Lasaanchi guzumo'o guzumo'antakkam balli afaakko. Ki'nnuwwi gaanjennem bisa'i xabbaakko.

³⁰«Ki'nnuwwika bisa'a seejjanne aagissehe! Qooccantakko'i beyyonnee qarantakko'i uullannem ki'nnuwwanne oogatoommo.

³¹I quunqik malaayyi xanqu gii'llisa ki'nnuwwanne dillookko. Bi'isimmik losan yoo mogaalli mannina higisaa uwwoommo.

³²Giirinne bi'llakkamo; ki'nnuwwik xiig ki'nnuwwi gaqqi uullannem dunamookko. La'mmaagge ki'nnuwwa tiirookkok hee'ooyyo» yukko. Waa'i kaka wocaakko.