Read Hadiyya Hizqi'eel Kitaaba 22 Bible Online

Hizqi'eel Kitaaba 22 - Hadiyya bible

Hizqi'eel Kitaaba 22

²«Manchi beeto, mannika xiiga dunoo ka beero'onne oogatteena guddaahinnihe? Ixxi issu shigigaa'oo luwwi hundam caakkissaa ixxena kure.

³An Moollanni Waa'i Yerusaalee'm beero'ina ‹Lobakat kee'nneka xiiga dunti bikkinaa qophpha'n waa'uwwanne otossimminne ki gaga haashaassitti bikkinaa bi'lloo'isina qoodamu amman hincaakko.

⁴Mannika xiiga dunti bikkina hantaaraanchi ikkaatto; baxxitti qophpha'n waa'uwwinnem haashaarantaatto. Ee bikkina bi'lloo ammane gaaggaabissaatto! Ki umuram gundissaatto. Ee bikkina mulli minaadab keesenne naacamoo'isaa osaroo'isaa issoommo.

⁵Sholle'nnii dambaqii wo'mmaakkoo beero'o, abbisonnee qee'llonnee yoo uulluwwi keesenne naacamookko.

⁶Ki woronne yo'i Isra'ee'l awwonsaan hundim ixxuwwina uwwamu daannooma mannika xiiga dunimmina awwaaxxitamuulla.

⁷Ki woronne annii amaa sholle'llo'ookko. Waaraan wor amadanto'ookko; adaraarii busar meentii hawwodanto'ookko.

⁸Iina keesamu luwwa sholliissakko'ookko. I Usheexxaxxi Ayyaamom haashaassitakko'ookko.

⁹Ki'nnuwwiinsi mat mat keen mulli keeno shishiisseena qophphano woccamuulla. Mat mat keen qophpha'n waa'ina hincu kitima ittamuulla; Mat mat keen odim hundi ammanem saa'immina gaaggaabbamuulla.

¹⁰Mat mat keen ixxuwwi anno'i meentinne iinse'imminne ixxuwwi anno'ika ara'a iggitamuulla. Mat mat keen aga'n xur waaru meento malaayyissa'a iinse'imminne sholliissamuulla.

¹¹Mat mat keen ixxuwwi olla'i meentinne saa'llamuulla. Mulli keen odim ixxuwwi oos meentinne saa'llamuulla. Ee'isam ixxuwwi anno'i qaru aayyuwwa haashaassitamuulla.

¹²Ki minaadabiinsi mat mat keen diinatina bitaa'anta'a manni xiiga duntamuulla. Mat mat keen ixxuwwina moolli ikko'i Isra'eelina qaro'inne diinate liqaayyissamuulla. Ixxuwwam boggu'uuyyi laboobee'i amaxxa wixxaa'llamuulla. Eesem guullita'a xaddo'ookko» yukko. Moollanni Waa'i kaka wocaakko.

¹³«Ki bogimmi bikkinaa xiiga dunti bikkinaa i anga keesenne ki'isoommo.

¹⁴An keese guzumo'oommi ammane iggimminne uulliteena xantoohonnihe? Ki wodu qoxxeena xanoohonnihe? An Waa'i kaka wocaammo. Ee'isam issoommo.

¹⁵Ki minaadaba uulli hundannee mulli minaadaphphi woronnee binnaa'oommo. Ki jor baxim uulloo'isa issoommo.

¹⁶Mulli minaadab keese sholliissamo. Ee ammane at an Waa'i ihummisa laqqootto» yukko.

¹⁷Waa'i iina

¹⁸«Manchi beeto, Isra'ee'l minaadab iina maham awwaaddambee'i keen ikko'ookko; ixxuwwi kin bir giiranne bukkamaa gatoo xurisa; madaaphphaannisa, qorqoro'aannisa, xaa'llaannisaa irisaas ata'llisaa ikko'ookko.

¹⁹Ixxuwwi xaa'l xur ikko'i bikkina hundam Yerusaaleemanne wixxaa'oommo.

²⁰Bira, madaaba, xaara, irisaasaa qorqoro'oo bukkimmina giiranne wixxaa'akkamaannisa an ki'nnuwwa i quunqinnee bala'innee wixxaa'oommo; eekke'em wixxaa'aa bukkoommo.

²¹Eeyya, Yerusaaleemanne wixxaa'oommo; giiram xanqisaa i quunqinne bukkoommo.

²²Bir midachchanne bukkamoo'isa ixxuwwim ee beyyonne bukkantamo. Ee ammane an Waa'i iikka malaayyaam quunqa ixxuwwanne dilliisummisa laqqamo» yukko.

²³Waa'i odim iina

²⁴«Manchi beeto, ixxuwwik uulli haashaaramu bikkina i quunqinne xeen ga'nneena hooraa guzumo'eena gudummisa Isra'ee'l minaadabina kure.

²⁵Shu diinaxxi gadanonne hobbichchi toxoohaannisa Isra'ee'l awwonsaan[1] minaadaba monginne shitamo; diinatem ihukko mulli amaxxa boggamo; goona shita'a lobakat meento busar issitamo.

²⁶Qeessuwwi i seera gindito'ookko. Keesammi mu'utam keessamoyyo; haashaarammam keesammiinsi annanni issitamoyyo. Muccur luwwikaa muccur ihubee'i luwwikaa annannaato losissamoyyo; Usheexxaxxi Ayyaamom lonsitamoyyo. Ee bikkina Isra'ee'l minaadab eese sholliisso'ookko.

²⁷Oro'i amadu luwwa baqansaa itoo'isa Isra'ee'l awwonsaan hanqibee'i googinne amaxxa wixxaa'lleena manna shitamuulla.

²⁸Hiraagaanim gortannanne boorjo'o laboo manchisa baaxiilo hundam daphphaa'llamuulla; qophpha'n kaaltam ‹moo'nnaammo› yitamuulla; qophpha'n hiraago wocco'uuyyi kuk ‹Moollanni Waa'i sagara› yitamuulla. Ihukkaarem an Waa'i ixxuwwina ma'lluwwam kurummoyyo.

²⁹Ee uulli manni boggamuullaa angiinsi gossamuullaa; hawwaano, buxaa waaraanoo hanqa hoorimminne hawwoddamuulla.

³⁰Uulla bi'isoombee'isa gindamu oota dabaraa ootookkoka, gindamu kollinne i illagenne uulloo mancho ixxuwwiinsi hasummo; ihukkaarem matom siidummoyyo.

³¹Ee bikkina i quunqe ixxuwwanne dilliisoommo; gii'llisa shokkiisoo i quunqinnem bi'isoommo; ixxuwwi jolle ixxuwwi gagannem dabaroommo» yukko. Kaka wocukkok Moollanni Waa'a.