Read Hadiyya Hizqi'eel Kitaaba 24 Bible Online

Hizqi'eel Kitaaba 24 - Hadiyya bible

Hizqi'eel Kitaaba 24

¹Neese qeefadammummi honsi hiinchonnee tommi aga'n tommi ballannee Waa'i iina

²«Manchi beeto, Baabiloo'n adil Yerusaaleema kibbeena asheeru balli ihu bikkina kaballi ayyaamo doonanne kitaabe.

³An Moollanni Waa'i ee boqqi i minaadabina kobi'llishshinne ‹Disxa giiranne kaassaa wo'o isse.

⁴Gubeedoo shulluudaa eddaa danaam danaam maara muransitaahii doo'l miqqeewwam iiqansitaahii ee disxanne isse.

⁵Allaachchiinsi doo'l gereechcho massitaa dure; ee kaassitti disxannem giira giire; maaraa miqem li'eebe'e sare› yitaa kure» yukko.

⁶Moollanni Waa'i «Manna shoo kee'n beero'ina aayye! Oo beero'i ci'llimmiinsi muccurubee'aannisaa hore'em muccuroobee'i xaa'l disxisaa ihaakko. Ixxi woronne yoo murammi maaram doo'llitoo'n guullitaa fisse.

⁷Ka beero'i woronne manna shakko'ookko; xiigoomim dunamukkok dir ifiisoo uullanneyyo. Ihukkaarem oo xiig dunamukkok ma'llichchim ifiisoobee'i kinannette.

⁸Oo xiig ifiisamoobee'isa kinanne dunamoo'isa issiisummok iikka lophphaakkoo quunqa ki'isaa baado miqisoo'isinatte» yukko.

⁹Ee bikkina Moollanni Waa'i «Manna shoo kee'n beero'ina aayye! Aphphoo haqqa an i gagoomim shiqaa'aa edoommo.

¹⁰Lobakat haqqa eebe! Giiram xanqise; maaram sare! Maa'l wo'ooma enja issitaa xee'ise! Miqoomim shokkona!

¹¹Ci'llimmi lophphimmiinsi ki'ukkok giirinnem fatakubee'i bikkina yakit hundim qisho'i ihaakko. Ee bikkina naas xaariinsi baxamu ma'llichchim bee'i disxa gii'l kasharanne kaase. Gii'l kashara labeebe'i afeebe'e kasharona, ee'isinne oo disxi muccurookko; ci'lloomim bi'ookko.

¹³Yerusaaleema, saa'immi keese haashaassaakko; an keese muccusseena hasummaarem at ki haashaaranchiinsi muccuttittoyyo. I quunqik malaayyi keesenne moo'ameebe'i afeebe'e od muccuttooyyo.

¹⁴An Moollanni Waa'i ‹Mat luwwa issoommi amman afaakko; eekka issimma uroommoyyo; haafoommoyyo. I sawwitem dabassoommoyyo; ki taakkisaa ki baxisaa keesenne oogatoommo› yaa kuraammo» yoolla.

¹⁵Waa'i iina

¹⁶«Manchi beeto, at iittitoo ki illinam liiranchi ikko'i ki mi'n ama dangonnem qasanta'a letamo; kannonne kichche'llitte; ki indiiddam dunimminne wi'llititte!

¹⁷Kichche'imminne hiqqitoo'isa manni macceesoone; leto'aantena wi'llititte. Ka'llitoo shaashsham ki horoorenne isse; ki caamma'am lokkonne isse; ki suume ifiissitte; hala ittitte» yaa kurukko.

¹⁸Soodaraar daranne eekka mannina kurummo. Ee maaro'onne i meentichcho leto'o; la'm ballanne an ijaajamummisannem issummo.

¹⁹Mannim «Ku issitoo luwwi niina uwwoo losan mada'e kuttooyyonnihe» yita'a eese xa'mmito'o.

²⁰Anim ixxuwwina «Waa'i iina

²¹‹Moollanni Waa'i Isra'ee'l minaadabina «Ki'nnuwwik lombi bakkechcha, illi neeyyatoo woda'n liiranchaa ihu i Keesammi Mine haashaassoommo. Yerusaaleemanne gatto'i goo'n oosii landii oranne letamo.

²²Ee ammane an issummi luwwi hundam issitakkamo. Ki'nnuwwi suume ifiissakkamoyyo; halam ittakkamoyyo.

²³Ki'nnuwwi shaashsham ti'llitakkamoyyo; caamma'am fissaqqitakka'a leexa'i lokkinne mattakkamoyyo; wi'llo amaddakkamoyyo; te'im wi'llitakkamoyyo. Ki'nnuwwi baaxiiliinsi ki'ukkokim naccakkamo. Ki'nnuwwina'i ki'nnuwwim atoorattakku'uuyyi qitintakkamo.

²⁴Ka'isinne Hizqi'eel ki'nnuwwina mare'i ihookko. Ixxi issukkisam ki'nnuwwim issitakkamo. Ku woshshi wo'mmoohaare an Moollanni Waa'a ihummisa laqqakkamo» yihe› yaakko» yaa dabarummo.

²⁵Waa'i iina «Manchi beeto, kaba an ixxuwwi hundi ammanem moo'lleenaa do'lleenaa hassamoka ee'isam bakke'llamanee liirantamanee ihu qoxxaalli Keesammi i Mine ixxuwwiinsi hooroommo; ixxuwwika goo'n oosoo landam hooraa massoommo.

²⁶An kaka issoommi balla bichchiinsi gatu manchi waaraa ee issummi luwwi hundi bikkinam kiina kurookko.

²⁷Ee balla kiikki suum fooqaa at ee manchinne woccootto; ee lasage od duuddooyyo; minaadabinam mare'i ikkootto. Ixxuwwim an Waa'i ihummisa laqqamo» yukko.