Read Hadiyya Hizqi'eel Kitaaba 25 Bible Online

Hizqi'eel Kitaaba 25 - Hadiyya bible

Hizqi'eel Kitaaba 25

²«Manchi beeto, Amoo'n kolli daba'llitaa ee uulli minaadaphphi bikkina hiraago woce.

³Moollanni Waa'i Amoo'n minaadabina ‹I Keesammi Min haashaaramu ammane, Isra'ee'l uullim udma'i ihu ammanee Yihuxxi minaadab qeefadamaa maru ammanee liirantakko'ookko.

⁴Ee bikkina eelliinchi firiinsi waaroo sulli ki'nnuwwanne weeraroo'isa issoommo; ki'nnuwwi uullannem wiiddanta'a hee'llamo. Ki'nnuwwina ihimmi hasisoo misha ixxuwwi ittamo; adom aggamo.

⁵Raaba'i beero'onne gaameela'i Amoo'n uulli hundannem gereebbi allaa'lloo'isa issoommo. Ee ammane an Waa'i ihummisa laqqakkamo› yoolla yihe.

⁶«Moollanni Waa'i ‹Isra'eela gaddakka'a ixxi ubimmanne liirantakka'a ki'nnuwwi anga aphphissakko'ookko; xophxophitakku'uuyyim kaddakko'ookko.

⁷Ee bikkina i woda ki'nnuwwanne ki'isoommo; mulli minaadab qeefadoo'isa issoommo; od minaadab ikkakka'a la'antakkambee'isa guullaa bi'isoommo. Ee ammane an Waa'i ihummisa laqqakkamo› yoolla» yukko.

⁸Moollanni Waa'i «Moo'aaphphekii Eedoo'm minaadabii ‹Yihuxxi minaadab mulli minaadaphphisam ihaakko› yito'i bikkina

⁹Beetiyaashimoota, Ba'aalma'oonaa Qiiriyaataayima yakkam la'anto'oo beero'uwwi gatoo'n Moo'aaphphi uulli tochcho egerakkam beero'uwwi hundam diina'i aphphisoo'isa issoommo.

¹⁰Ee bikkina Amoon minaadaphphisa xigamoo'bee'isa eelliinchi firiinsi waaroo sulli Moo'aabaa Amoonaa weeraraa qasoo'isa issoommo.

¹¹An Moo'aaba guzumo'oommo; ee ammane an Waa'i ihummisa laqqamo» yukko.

¹²Moollanni Waa'i «Eedoo'm minaadab Yihuxxi minaadabiinsi monginne baado miqisso'i bikkina baaxiilaan ikko'ookko.

¹³Ee bikkina kaba Edooma guzumo'oommisaa ee uulli mannaa fooraam diinatee hundam bi'isoommisaa la'isoommo. Teemaa'n beero'iinsi ki'isaa Didaa'n beero'i afeebe'e udma'i ihoo'isa issoommo; minaadabim oranne beeddookko.

¹⁴Iina minaadab ihu Isra'eelinne Eedooma guzumo'oommo; malaayyaam i quunqinne Isra'eel Eedoomiinsi baado miqisookko. Eedoo'm mannim an ixxuwwiinsi baado miqisumman ihukkisa laqqamo» yukko. Moollanni Waa'i kaka wocaakko.

¹⁵Moollanni Waa'i «Filisxee'm minaadab Yihuxxi minaadabiinsi monginne baado miqisso'ookko; beeddoobee'i diina'oominnem bi'isseena hasso'ookko.

¹⁶Ee bikkina an Filisxee'm minaadabanne i malaayye moo'isoommo; Kaarte'i mannam guulloommo; Dambalaq gammalanne gatto'i keenom bi'isoommo.

¹⁷Quunqinne wo'mmaa guzumo'inne lophphaakkoo baado miqisoommo. Ee ammane an Waa'i ihummisa laqqamo» yukko.