Read Hadiyya Hizqi'eel Kitaaba 26 Bible Online

Hizqi'eel Kitaaba 26 - Hadiyya bible

Hizqi'eel Kitaaba 26

¹Neese qeefadammummi tommonnee mat hiinchi aga'n aaggannee Waa'i iina

²«Manchi beeto, Xiiroos beero'i manni ‹Yerusaaleem gindamaakko; dadda'l malaayyim hoogaakko; kanniinsi eehid niinninne akeekixxameena hore'em xanoobee'i bikkina neese goddaan inkoommo› yita'a liirantamuulla.

³«Ee bikkina Moollanni Waa'i ‹Xiiroosa, an keesenne ki'aammo; dambalaqanne wo'i moor ki'oo'isa keesenne dut minaadab ki'oo'isa issoommo.

⁴Ixxuwwim ki qashaa waardiyyuwwi egettam godo'uwwaa gindansitamo. Buchchoomam fii'aa bi'isimminne xale'i kin maxaramaa gatoo'isa issoommo.

⁵Dambalaq lambe'enne qurxumme'e qaashsham keen shikka gokkissam beyyi issoommo. An Moollanni Waa'i kaka wocaammo. Mulli minaadab Xiiroosa bogookko.

⁶Lambe'i uulli hegeegguwwanne hee'oo mannim bisa'inne beeddookko. Ee ammane Xiiroos minaadab an Waa'i ihummisa la'ookko› yoolla» yukko.

⁷Moollanni Waa'i «Xiiroosa qasona adilluwwina adil ihu Baabiloo'n adil Nabukadanaxoora hanaa'n qariinsi waaroo'isa issoommo. Ixxim lobakat gogotinne, faradaaninnee faraxxi gaare'innee waarookko.

⁸Ee lambe'i uulli hegeegguwwanne hee'oo ki minaadab hundim orinne beeddookko. Diina'i kiinninne uullixamoo girbam ki kululleetanne baxookko; ki qash lud afeebe'e buchcha tuubookko; agirinnem makkixxamukkuuyyi keese hawwodookko.

⁹Girba gindakkam mu'utinne ki qasha aphphisookko; waardiyyi egeroo godo'om mu'utinne gindookko.

¹⁰Ixxuwwi faraxxi konte'iinsi ki'oo dir duuphphisa ihaa ifiisookko. Ixxi ki ooxxi gooccuwwa aagoo ammane faradaaniinsi, faraxxi gaare'iinsii shafe'i yoo tululoo luwwiinsii macceesamoo sagar gindakka'a aagakkam beero'isa ki ootam heekkeesookko.

¹¹Gogot faraxxi konte'inne ki googguwwa kade'amookko. Ki minaadaba bisa'inne shookko. Kiikki qoxxaalli utubbuwwim uullanne ubookko.

¹²Ki amaxxi qeefadamookko. Kiikki dadda'l mu'utim bogamookko. Qashim gindamookko. Mishisoo ki minneewwim gindamookko. Kiikki kinneewwi, saanquwwi gindamaa ubu luwwii hundim dambalaqanne uunjamookko.

¹³Ki kajjaa diitta'inne macceesissoo kajji sagaraa hundam sahaa'oommo.

¹⁴Qurxumme'e qaashsham keen shikka fitiissam xale'i kin maxaramaa gatookko. Beero'oomim la'mmaagge areesamooyyo. Oohim ihookkok an Moollanni Waa'i wocummi bikkinatte» yukko.

¹⁵Moollanni Waa'i Xiiroos beero'ina «Madu keen qitinukkuuyyii ki woronne manna shakku'uuyyii ubboohaare uullik tochchi heekke'ooyyonnihe?

¹⁶Dambalaq lallabonne hee'oo uulli adilluwwi hundim adilla'n barcumiinsi dillitamo; ixxuwwika adilla'n eddechchuwwaa anginne wereeggisakka'a baxakko'oo mulli eddechchuwwaa sheelaxxita'a baa'lla'a huxe'llu'uuyyi buchchanne afuuttamo. Keesenne afu hiriraa'oo duuha'anne muggita'a dambaqqamo.

¹⁷Kiinam ‹Dambalaq lallabonne hee'oo uulluwwa baa'oo'isa issittok dambalaqquwwanne malaayyaam hee'llitti la'antaattoo beero'o! Dambalaqiinsi hinkid bi'llito?

¹⁸Oono'o, kaba at ubbitti ballanne wo'inne kibbamaa hee'oo uulluwwi huxe'ukko. Ee uulluwwanne hee'oo mannim ki bichchanne muggukko› yitu'uuyyi wi'llitamo» yoolla.

¹⁹Moollanni Waa'i Xiiroosina «Ayyim hee'eena xanoobee'i gindamu beero'uwwisa udma'i issoommo; xilli cambalaq wo'innem ifiisoommo.

²⁰Illagee'n doolli manni aagu barenne aagoo keeninne atim aaggoo'isa issoommo; ee keeninne maqirem gindamu uulliinsi woroon hee'lloo'isa issoommo; ee bikkina od manni ki woronne hee'ooyyo. Ka uullannem kiina beyyi hee'ooyyo.

²¹Kiikki lasaanchi kichche'isoo'isa issoommo; ee lasage at hee'llooyyo; keese manni hasuta'nnim hore'em siidooyyo» yoolla. Moollanni Waa'i kaka wocaakko.