Read Hadiyya Hizqi'eel Kitaaba 27 Bible Online

Hizqi'eel Kitaaba 27 - Hadiyya bible

Hizqi'eel Kitaaba 27

²«Manchi beeto, Xiiroosina wi'lle.

³Dambalaqa massoo googonne hee'imminne dambalaq tochchonne hee'oo beero'uwwiinsi waaroo daddaraanina edanchi beyyi ihu Xiiroosina Moollanni Waa'i ‹Xiiroosa, ki danonne at bakke'llaatto.

⁴Ki heechchi beyyim dambalaqa; keese baxxo'i keenim wereeggissa'a baxxo'ookko.

⁵Saanquwwi gudukkok Heermoo'n Duu'n hoominnette; utubbuwwi uullukkokim Liibaanoos haqqiinnette.

⁶Markaba ushe'akkam laahidi'nnoo'i luwwi baxamukkok Baasaa'n uulli oda'innette. Gax axisamukkokim Qoophphiroos uulli hoo'm saanqinnette; ixxi kululleetim goolabamukkok daane'i inqinnette.

⁷Mare'i ihaa qee'llonnem moo'amona kiikki markaphphi shara'i baxamukkok wereeggisakka'a axisakko'oo Gibxi uulli er fatirinnette; Du'm eddechchi baxamukkok wo'inne kibbamaakkoo Qoophphiroos uulli lobakata mishisoo shaano'innee muulli kashar fatirinnettee.

⁸Kiikka markabbuwwa ushe'llam keen Siidooniinsii Arwaadiinsii waatto'oo keeno; Xiiroosa, kiikki lachchi manni markaba ijaajaan hee'llo'o.

⁹Iiqamu markaba dabatta'a baxxam keen Geebaa'l uulli lachchaammuwwa; dambalaq markabbuwwii markaba ushe'llam keenii kiinninne meera uulliteena waattam hee'llo'o› yoolla yihe.

¹⁰«Faariisik, Liidikii Liibiykii gaadaan ki gogoxxi woronnette; ixxuwwika agiraa o'l qoobe'ee orina wiiddantitti beyyonne saqalimminne nuutto'isa issito'o.

¹¹Arwaadik gaadaan kiikka qasha hundi kollinnem egettam hee'llo'o; Gamaaxxi mannim girbuwwa egettam hee'llo'o. Ixxuwwi agiram kininne baxamu minneewwanne saqalta'a keese nuussito'o.

¹²«Ki amaxxi lophphu bikkina Tarsees manninne daddattam hee'llitto; kin bira, xaara, qorqoro'oo irisaasaa eebba'a ki mu'uttuwwinne dabassitam hee'llito.

¹³Giriikinne, Tuubaalinnee Meesheekinnem daddattam hee'llito; ixxuwwim agidoo naas xaarinne baxamaakkoo mu'utaa eebba'a ki mu'uttuwwinne dabassitam hee'llo'o.

¹⁴Ee'isam ki mu'uta Beeti-Toogaarii'm faradinne, o'l faradinnee baqullinnee dabassansitam hee'llitto.

¹⁵Rooda yakkam uulli manninne daddattam hee'llitto; dambalaq lallabonne hee'oo mulli minaadabim daane'i inqee zoopha yakkam haqqaa eebba'a ki mu'uttuwwinne dabassitam hee'llo'o.

¹⁶Sooriy minaadab shaano'i kininne, muulli kasharinnee anginne wereeggisakka'a dadakko'oo eddechchinnee, talbi fatirinne, ereerinne wereeggisakko'oo mu'utinnee inqu yakkam bito xee'aalli kashar kininnee annanni annanni mu'uta kiinniinsi bitaa'llam hee'llo'o.

¹⁷Yihuxxekii Isra'ee'l daddaraanii Miiniixxi uulli arasinne, saratinne, marabinne, wee'l zaytinnee annanni annanni enjinnee kiinniinsi mu'uttuwwa dabassitam hee'llo'o.

¹⁸Annanni annanni mu'utinne at goddaanchi ikkitti bikkina Damaasqo'i manni Helboo'n woyi'n diqaasinnee Saahoor gereebbi oddinnee kiinniinsi mu'uta dabassitam hee'llo'o.

¹⁹Uuzaalanne hee'llam Daanikii Aawwaan minaadabii waatta'a bukkamaakkoo xaarinne, annanni annanni enjinnee ixaaninnee kiinniinsi mu'uta dabassitam hee'llo'o.

²⁰Diidaa'n minaadab gilaasinne kiinniinsi mu'uta dabassitam hee'llo'o.

²¹Araphphekii Qeedaa'l uulli gassaanii geexxuwwa, gereebbaa fella'aa eebba'a ki mu'uttuwwinne dabassitam hee'llo'o.

²²Saaba'ikii Raama'i daddaraanii bito xee'aalli kina, worqaa doo'llammi annanni annanni enjaa eebba'a ki mu'uttuwwinne dabassitam hee'llo'o.

²³Kaaraa'nnek, Kaanehikii Ede'n beero'uwwikii ee'isam Saaba'i uulliinsi Ashuurikii Kilmaad beero'uwwikii daddaraan

²⁴mishisoo eddechcha, muulli kashar carquwwa, angi baxinne wereeggisakko'oo eddechchuwwa, daqqakkam danaam jibbuwwa, erisa muuncamaakkoo muuncannuwwaa usseewwaa qoxxissa'a katta'a kiina biteessam hee'llo'o.

²⁵Tarsees uulli markabbuwwa kiikka mu'uttuwwa iyyiisseena at awwaaxxitam hee'llitto. «Ee bikkina at dambalaq lambe'enne iyyinne kee'mmixxu markaphphisa hee'llitto.

²⁶Markaba ushe'aan keese xillaalli dambalaq kolli massito'o; eelliinchi fi'l malaayyaam hafachchim ee dambalaq woronne keese iiqansukko.

²⁷Kiikki annanni annanni dadda'l mu'ut, markaba ushe'aan, markaphphi woronne awwaaddam keen, iiqamu markaba dabatta'a baxxam keen, daddaraanii markaphphi woronne hee'llam gaadaanii hundim ki markabbuwwi iiqamoo ammane hundim dambalaq xillanne xuuxamookko.

²⁸Markaba ushe'aan dambalaqanne xuuxantu'uuyyi laattam laachchi dambalaq kululleetanne yoo uulluwwa heekkeesookko.

²⁹«Ee ammane mulli markabbuwwaa wongilluwwaa ushe'aanii markaphphi ijaajaanii hundim gibba'a dambalaq gammalanne uullitamo.

³⁰Hundim ixxuwwi horoorenne dira laphphita'a gii'l buchchanne biqqiiqqitu'uuyyi sagara iimaa'lla'a ki bikkina qaraaraallisa wi'llitamo.

³¹Ki bikkina kichche'lla'a horoore hogoossaqqita'a xiddi eddechcha edde'llamo; wodaninne kichche'lla'ahim qaraaraallisa wi'llitamo.

³²Kichchechchinne ki summa weeshshu'uuyyi wi'llitamo. ‹Dambalaq lambe'enne xuuxamu Xiiroosisa bi'ukkok ayyette?

³³Kiikki dadda'l mu'ut uulli hundam afukkuuyyi hundem minaadaphphekam mixano wonsham hee'ukko. Lophphaakkoo amaxxii dadda'l mu'utii uulli adilluwwa goddaan issitaatto.

³⁴Ihukkaarem kaba at dambalaq xillanne iiqantaa xuuxantitto; dadda'l mu'utii kiina awwaaddam hee'llo'i keenii kiinninne maqirem bi'ukko› yitu'uuyyi kiina sottamo.

³⁵«Dambalaq gammalanne hee'oo manni hundim keesenne afu luwwanne muggaakko; adilluwwim lobakata baa'llo'i bikkina hambalaachchanto'ookko.

³⁶Oono'o, kiikki lasaanchi muggisoohan ihu bikkina mulli minaadaphphi daddaraan keesenne osarookko; heer heerinam bi'llootto» yukko.