Read Hadiyya Hizqi'eel Kitaaba 28 Bible Online

Hizqi'eel Kitaaba 28 - Hadiyya bible

Hizqi'eel Kitaaba 28

²«Manchi beeto, Moollanni Waa'i Xiiroos adilina ‹Ki tiironne an waa'a yitaa bolxitaatto; dambalaq lambe'enne qophpha'n waa'uwwi adilla'n barcumannem afuuroommo yitaatto. An waa'a yittaarem at mancho bagaan waa'ayyo.

³Daani'eeliinsi loboka qoor ikkittoka labissaatto; kiinniinsi mat luwwim daphphaa gatoobee'eka labissaatto.

⁴Hanqinam at ki qooroominnee lachchinnee lobakat amaxxa wixxaa'llaatto; ki mu'uxxi minennem lobakat worqaa biraa tuubbaatto.

⁵Qoor daddaraanchi ikkitti bikkina kiikki amaxxi lophphaakko; ki amaxxi lophphu bikkinam bolxitaatto› yoolla yihe.

⁶«Ee bikkina an Moollanni Waa'i ixxena ‹Anim waa'i'nnoo'i qoora yitaa sawwitti bikkina

⁷keesenne hawwo afissam mogaalli diina'a eeboommo; ixxuwwim ki qooroominnee lachchinnee siiddaa wixxaa'llitti mishisoo luwwi hundam bi'issamo.

⁸Keesem xillaalli barenne ubbussamo; dambalaq woronnem jor leho letootto.

⁹Oo manni keese shiteena waattam ammanem ki gaga waa'isa issitaa xiggooda'e? Keese shoo manni anganne ubboo ammane at mancho bagaan Waa'i ikkibee'is la'amaakko.

¹⁰Allaggi uulli manni anganne Waa'anne amma'nnoobee'i manni leho letootto. An Waa'i kaka wocaammo› yoolla» yukko.

¹²«Manchi beeto, Xiiroos adilanne afoo hawwi bikkina sottittuuyyi wi'lle; an Moollanni Waa'i ixxena ‹Qooroominne wo'mmitaattoohanee hore'em danaamoo ikkaa muccuroominam tungi hee'llitto.

¹³Waa'ina duubbi kaashshi beyyi ihu Edenanne hee'llam hee'llitto. Saardiyoona, almaaza, birille'e, margiida, Iyyaasaaphphiida, sanpheeraa baaluuraa yakkam bito xee'aalli kinneewwii worqii kiina eddechchi hee'ukko; ku keen hundim at qooccantittaanniinsim ki'isaa kiina gudaakkoohan hee'ukko.

¹⁴At egetteena doo'llantaattoo kiruub hee'llito; keesammi i duun kiina heechchi beyyi hee'ukko. Bito xee'aalli belecce'oo kinneewwi lambe'enne daba'llantam hee'llitto.

¹⁵Qooccantitti balliinsi ki'isaa jor baxo baximma asheettitti balli afeebe'e keesenne miiqakkam luwwi hee'ukkoyyo.

¹⁶Kiikki daddar iibbu bikkina jollinne wo'mmitaa baaxiilo baxxitto; ee bikkina haashaarammi luwwisa i duuniinsi an keese darabummo. Egeraanchi hee'llitti kiruuba, ee belecce'oo kinneewwi lambe'iinsi keese fissaa hollummo.

¹⁷Ki da'n mashka'inne bolxitaa hee'llitto; lomba hasimminnem ki qoorooma haashaassitto. Ee bikkina an keese uullanne aad darabummo; mulli adilluwwinam maalallat ikkoo'isa issummo.

¹⁸Kiikki daddar iibbaa baaxiilo baxxitti bikkina ki otossaaxxi beyyuwwi haashaaramukko; ee bikkina giir kiinniinsi firaa keesem itoo'isa issummo. Uullanne keese moo'oo kee'n illagenne hundannem keese gii'l buchchi issaammo.

¹⁹Keese la'oo minaadab hundim ki bikkina maalalookko; kiikki lasaanchi muggisoohane; heer heerinam bi'llootto› yitaa kure» yukko.

²⁰Waa'i iina

²¹«Manchi beeto, kiikka ille Siidoonanne dabattaa hiraago woce.

²²Moollanni Waa'i Siidoonina ‹Siidoona, an ki'nnuwwi hanenne ki'aammo. Ki'nnuwwanne issoommi luwwinne minaadab eese galaxxitamo. I oogatom baxonne hosisoommaannonnee i keesammoomaa la'isoommi ammanennee an Waa'a ihummisa laqqamo.

²³Iikka boobana ki'nnuwwi hanenne eeboommo. Goog hundannem xiig dunamoo'isa issoommo. Kolli hundinnem ki'nnuwwanne ki'oo o'l mashka'inne ki'nnuwwi lambe'enne manni lehookko. Minaadabim an Waa'a ihummisa la'ookko» yukko.

²⁴Waa'i «Ixxo gadimminne moo'oo keeniinsi ixxi kululleetanne yoo uulli hundiinsim uttisaa halluttisaa ihimminne Isra'eela hawwodookkok ka lasage ayyim hee'ooyyo. Anim Moollanni Waa'i ihummisa la'ookko» yoolla.

²⁵Moollanni Waa'i «Isra'ee'l minaadab binta'a yo'i annanni annanni minaadaphphi lambe'iinsi wixxaa'oommi ammanee mulli minaadab moo'ukkuuyyim iikka keesammooma i minaadaphphi lambe'enne moo'isoommi ammanee ixxuwwi daba'llita'a i awwaadaanchi Yaaqoobina uwwummi ixxuwwi gaqqi uullanne hee'llamo.

²⁶Ee beyyonne matem qulitim bee'eka hee'llamo. Minneewwa baxxamo; woyi'n kaashsha kaassamo. Ixxuwwa gado'inne moo'llam hee'llo'i ixxuwwi olla'a hundam guzumo'oommo. Ihukkaarem Isra'ee'l minaadab matem qulit bee'em amma'nnanchinne hee'llamo. Ee ammane an Waa'i ixxuwwina Moollanna ihummisa laqqamo» yoolla.