Read Hadiyya Hizqi'eel Kitaaba 29 Bible Online

Hizqi'eel Kitaaba 29 - Hadiyya bible

Hizqi'eel Kitaaba 29

¹Neese qeefadammummi tommi hiinchonne, tommi aganannee aga'nnaannonne tommonnee lamonnee Waa'i iina

²«Manchi beeto, ki ille Gibxi kolli dabattaa Gibxi adilinaa Gibxi uulli minaadabinaa hiraago woce.

³Moollanni Waa'i Gibxi adilina ‹Wo'i woronne dufitaa hee'lloo lob moochchicchcho, Gibxi adil Faari'oona! Oono'o, an keesenne ki'aammo. At «Abbaayyi daajji ihane; ixxo qooccummok anette» yitaatto.

⁴Ki gaangeeranne xaa'l hookko'o aagisoommo; ki daajji woronne yoo qurxumme'uwwam ki orachchonne amaxxamoo'isa issoommo. Qurxumme'uwwi ki hanenne amaxxamukkisam Abbaayyi daajjiinsi gosaasaa fissoommo.

⁵Keesee ki daajji qurxumme'e hundamii udma'anne uujoommo; ki leesham wixxaa'aa waammoo hee'oo bee'e bikkina uulli moochchinaa ammarinaa hurbaat ihona uullanne ubaa gatoo'isa issoommo.

⁶Ee ammane Gibxanne hee'oo hundim an Waa'i ihummisa la'ookko. Ki'nnuwwi Isra'ee'l minaadabina shomboqo'i biccisa ikkakko'ookko.

⁷Ixxuwwi anginne ki'nnuwwa amaddo'aare diqantakka'a ixxuwwika gudumo qassakko'o; ki'nnuwwanne bakke'llo'aarem iiqantakko'i bikkina ixxuwwik lamad lephlephukko.

⁸Ee bikkina an Moollanni Waa'i ki'nnuwwaa ki'nnuwwi fooraam diinatee bisa'inne guullaa bi'isoo gogota asse'oommo.

⁹Gibxi udma'aa mahimbee'e diihaa ihookko. Ee ammane an Waa'i ihummisa laqqakkamo. Mashka'oomim at «Abbaayyi daajji iihane; ixxo qooccummok anette» yitaatto.

¹⁰Ee bikkina an keesennee ki daajjennee quunqinne ki'aammo; hanaa'n qaranne yoo Migdooliinsi ki'isaa woroo'n qaranne yoo Asiwaa'n beero'i afeebe'ee Tophphe'i uulli tochchi afeebe'ee Gibxa udma'aa mahimbee'i diihaa issoommo.

¹¹Mannii diinatii ee uullanne taakke'amooyyo; sor hiinchi afeebe'e mahim ee uullanne hee'ooyyo.

¹²Gibxi heer uullanne gindamu uulluwwiinsi hundiinsim diihoo'isa issoommo; Gibxi beero'uwwi hundim sor hiinchi afeebe'e gindamaa gatookko. Gibxi uulli mannam mulli minaadaphphi lambe'enne binnita'a hee'llamisa issoommo› yoolla yihe» yukko.

¹³Moollanni Waa'i «Sor hiinchiinsi lasage Gibxi uulli manna binnaa'ummi uulli hundiinsim dabaraa woroommo.

¹⁴Gibxanne ixxuwwina gaassi heechchi beyyi hee'u woroo'n qaranne yoo Phaaxiroosanne hee'llamisa issoommo; ee beyyonnem hoogaanchi adillaninne hee'llamo.

¹⁵Mulli adilluwwiinsi hundiinsem hoogaanchi adillan ihoo bikkina ee lasage mulli adilluwwa gasseena xanooyyo; hundiinsim hoffan issoommi bikkina mulli adi'l uulla gibissiiseenam xanooyyo.

¹⁶Hore'oomam Isra'eel hara'mmatina Gibxi marimminne hawwodukkisa sawwookko bagaan hara'mmatina od Gibxanne bakke'ooyyo. Ee ammane Isra'ee'l minaadab an Moollanni Waa'i ihummisa la'ookko» yoolla.

¹⁷Neese qeefadammummi lamiyyennee lama'l hiinchonnee luxxi agananne aga'nnaannonnem luxxi ballanne Waa'i iina

¹⁸«Manchi beeto, Baabiloo'n adil Nabukadanaxoor Xiiroosa qaseena ki'aakko; ixxi gaadaa'nnek horoor murugeebe'ee gudum omareebe'ee kee'mmaalli iyyo iyyitamisa issaakko. Ihukkaarem ixxii ixxi gogotii eehid badatto'aarem maham siiddo'oyyo.

¹⁹Ee bikkina Moollanni Waa'i ‹Adil Nabukadanaxoorina Gibxa higisaa uwwoommo; ee uulliinsi bogga'a massitam amaxxa hundam ixxi gogotina miqo'i issaa uwwookko.

²⁰Ixxi gogot iina awwaadu bikkina Gibxa ixxena miqo'i issaa uwwoommo. An Waa'i kaka wocaammo› yoolla.

²¹«Ee ammane Isra'ee'l minaadaba qoxxisoommo; manni macceeseena xanoo beyyo hundannem kiikka sagara iimaa'llaa woccoo'isa issoommo. Ee'isinne an Waa'i ihummisa laqqamo» yukko.