Read Hadiyya Hizqi'eel Kitaaba 3 Bible Online

Hizqi'eel Kitaaba 3 - Hadiyya bible

Hizqi'eel Kitaaba 3

¹Waa'im iina «Manchi beeto, kiina hincukkoka ite; ka kitaabamu xaaxammi omachcho ite; Isra'ee'l minaadabinam mattaa kure» yukko.

²Ee bikkina i suume fooqaa'ummo; ee kitaabamu xaaxammi omachchom itona uwwukko.

³Ixxim iina «Manchi beeto, ka kiina uwwummoka xaaxamu kitaabammi omachcho ite! Ki godabom ixxenne wonshe!» yukko. Anim itummaare maraphphisa xee'ukko.

⁴Ee lasage Waa'i iina «Manchi beeto, Isra'ee'l minaadaphphi beyyo mattaa an kiina kuroommi sagara kure.

⁵An keese asse'oommok Isra'ee'l minaadaphphi beyyo bagaan ixxuwwika suume la'akkambee'i mulli uulli manni beyyoyyo.

⁶Woccam woshshi aagoobee'i ixxuwwi suumim la'amoobee'i ixxuwwi woccam saga'l tiratom qoossiteena xantoobee'i lob minaadaphphi beyyo keese asse'ummita'n ki woshsha macceessam hee'llo'o.

⁷Ihukkaarem Isra'ee'l minaadab hundim wodan duudaakkoo keenoo xiiqqantam keenoo ikko'i bikkina i woshsha macceesseena hasso'oyyo. Ki woshsham macceessamoyyo.

⁸An keese ixxuwwi illagenne kaa'antoobee'anee qoxxaallaa issoommo.

⁹Mahim keese egedeena xanoobee'i qaxa i asso kutteena murte'aalli ikkootto. An keese lobakata qoxxaalli issummi bikkina ixxuwwi boqquwwi ikko'aarem badditoo matem mashka'im bee'e» yukko.

¹⁰Odim iina «Manchi beeto, an kiina kuroommi woshshi hundam erisa macceessaa sawwihe.

¹¹Qeefadanta'a yo'i ki minaadaphphi beyyo mattaa ki woshsha macceesso'om macceesso'oyyom an Moollanni Waa'i kuroommi luwwi hundam ixxuwwina kure» yukko.

¹²Ee lasage eese Waa'i Ayyaan iim fissukko. I lasinnem «Iimanenne hee'oo Waa'ina galatii lombii ihona» yoo guqqi sagara macceesummo.

¹³Ee fooraam qooccanchuwwikim lad ixxina'i ixxim aphphixxamukkuuyyii ee shafe'isa kululoo luwwikam gugoo sagaraa macceesummo.

¹⁴Eese Waa'i Ayyaan iim fissu ammane iikki tiir qaraarimminnee quunqinnee wo'mmaa hee'ukko. Waa'ikim malaayyi eesenne qoxxaa hee'ukko.

¹⁵Ee lasage Keebaar daajji gadanonne yoo Teeli'aabiibanne qeefadanta'a hee'llam manni beyyo waarummo. Anim ee moo'ummaannonnee macceesummi luwwanne hundannemii muggimminne duduqaa ixxuwwinne lamar balla afuurummo.

¹⁶Lamarem balliinsi lasage Waa'i iina

¹⁷«Manchi beeto, an keese Isra'ee'l minaadabina allaaraanchi issaammo. Ee bikkina an wocoommi woshsha macceesaa ixxuwwina qoxxissaa kure.

¹⁸An mat baaxiilaanchina ‹Ki baaxii'l mashka'inne at hanqinam letootto› yumta'nnii atim oo manchi baaxiiliinsi daba'llaa gatoo'isina qoxxissaa kuttibeelasii oo manchi ixxi baaxiilinnem lehookko. Ee manchikam xiiga kiinniinsi miqisoommo.

¹⁹Ee baaxiilaanchina qoxxissaa kuttoohaare ixxi baaxiiliinsi daba'llubeelas ixxi baaxiilinnem lehookko. Atim ixxi xiigina xa'mmanchiinsi ki gaga gatissootto.

²⁰«Muccur manchi muccuroo'm baxiinsi daba'llaa baaxiilo baximma asheeruta'nnii anim ixxo hawwoo'isa issumta'nnii at ee manchina qoxxissaa kuttibeelas ixxi baaxiilinnem lehookko. Ixxekim illagee'n muccuroo'm bax hundim sawwamooyyo. Ixxi xiiginam an keese xa'mmoommo.

²¹Ihukkaarem muccur mancho baaxiilo baximmiinsi ixxi gaga egeroo'isina qoxxissaa kuttita'nnii at kuttitti woshsha aa'aa baaxiilo baximmiinsi ixxi gaga ege'llulasii oo manchi hanqinam lehooyyo. Atim ixxi bikkina xa'mmanchiinsi ki gaga gatissootto» yukko.

²²Ee lasage Waa'ik malaayyi eesenne dillukko. Ixxim «Ki'e, cebba dille; ee beyyonne an kiina wocoommo» yukko.

²³Ee bikkina an ki'aa cebba dillummo. Ee beyyonnem Waa'ik lombi Keebaar daajji gadanonne caakkukkisam iina caakkukko; anim miininne uulla nakkaa otossummo.

²⁴Ihukkaarem Waa'ik Ayyaan eesenne dillaa iimmaa'aa eese lokkinne uullisukko. Waa'im iina «Ki mine mattaa u'llumma xuffaa afuure.

²⁵Manchi beeto! Usinne karantoo bikkina minaadaphphi lambe'enne fitteena xantooyyo.

²⁶Ka boqqi minaadaba axeetteena xantoobee'isa ki allab karamoo'isa issoommo; atim duuddootto.

²⁷Ihukkaarem an kiina wocoommi ammane ki suume fooqaa'oommo; atim ixxuwwina ‹Moollanni Waa'i «Ixxuwwi boqqi minaadab ikko'i bikkina macceesookkok macceesona; macceeseena hasubee'ekim macceesoone» yoolla› yitootto» yukko.