Read Hadiyya Hizqi'eel Kitaaba 30 Bible Online

Hizqi'eel Kitaaba 30 - Hadiyya bible

Hizqi'eel Kitaaba 30

¹Waa'i iina odim

²«Manchi beeto, an Moollanni Waa'i kiina kuroommi ka hiraago woce. ‹Ee balli bikkina aayye!› yitaa wi'lle.

³Balli hincaakko; Waa'i balli hincaakko. Oo balli duuphphi balla; Mulli minaadabinam hawwi balla.

⁴Gibxanne or ihookko; Tophphe'ennem u'nnisoo hawwi ihookko. Lobakat kee'nnek leesh Gibxanne ubookko; ee uulli amaxxi hundim bogamookko; ee uulli shooho'uuwwim heekke'ookko.

⁵«Oo orim Tophphe'iinsi, Liibiyiinsi, Liidi'iinsi, Araphphi uulliinsi, Kuubiinsii iinninne hidi'l sagara aagu i minaadabiinsii miqo'ina waaru gaadaanom edaa guullookko» yukko.

⁶Waa'i «Migdooliinsi ki'isaa Asiwaan afeebe'e Gibxina hara'mmitam keen hundim oranne beedditamo; Gibxi bolxoo malaayyim hoogookko. An Moollanni Waa'i kaka wocaammo.

⁷Gibxi udma'a ihu uulli hundiinsim lophphaa udma'i ihookko; ixxi beero'uwwim gindamu beero'uwwi hundiinsim lophphaa gindamookko.

⁸Gibxanne itoo giira xanqisoommi ammanee ixxena hara'mmoo kee'n malaayyi hoogoo ammanee an Waa'i ihummisa ixxuwwi laqqamo.

⁹Ee ammane ‹Neesenne mahim afooyyo› yita'a qulitbee'e hee'llam Tophphe'i minaadaba baa'issam asse'amaano ijaajoommo. Ixxuwwim Gibxanne afoo bichchi mashka'inne hanqo'isam u'nnantamo» yoolla.

¹⁰Moollanni Waa'i «Gibxika lobakat minaadaba guullona Baabiloo'n adila Nabukadanaxoora asse'oommo.

¹¹Ixxim mishoobee'i mogaalli gogota awwonsaa uulla bi'iseena waarookko. Ixxuwwim Gibxa bisa'inne aphphissamo. Uulloomim leeshinne wo'mmaakkoohan ihookko.

¹²Abbaayyi daajje gokkisoommo; Gibxim mogaalli manni anganne uboo'isa issoommo. Ee bikkina allaggi manni Gibxa bi'issamo. An Waa'i kaka wocaammo» yoolla.

¹³Moollanni Waa'i «Meemfoosanne yo'i qophpha'n waa'uwwaa misilluwwaa bi'isoommo; Gibxanne gassaan ka lasage hee'ooyyo; minaadabannem baachcha dilliisoommo.

¹⁴Phaaxroos beero'o udma'i issoommo; Xoo'aa'n beero'onnem giira xanqisoommo; Teebis beero'om guzumo'oommo.

¹⁵Gibxina qoxxaalli girbi ihu Pheeluusiya'm beero'onne i quunqi bala'i dillookko; Teebisikam lobakat minaadaba bi'isoommo.

¹⁶Gibxanne giira xanqisoommo; Pheeluusiyaamim kee'mmaallisa u'nnamookko; Teebis beero'i gindamookko; Meemfoosannem beeddoobee'i hawwi afookko.

¹⁷Oonikii Buubaastiis beero'ikii woraad oranne beeddookko; ee beero'uwwi mannim qeefadamookko.

¹⁸Gibxika malaayye iiqansimminne ixxuwwi bakke'llam qoxallano ixxuwwiinsi hooroommaare Xaafinaasa tuunsi ifiisookko; Gibxa duub ifiisookko. Ixxi beero'uwwi mannim qeefadamookko.

¹⁹Ee'isinne Gibxa guzumo'oommi ammane an Waa'i ihummisa laqqamo» yoolla.

²⁰Neese qeefadammummi tommonnee mat hiinchonnee luxxi agan aagu lama'l ballanne Waa'i iina

²¹«Manchi beeto, an Gibxi adilika woda iiqaammo; ixxom shomboqo'innee carqinnee cacaa fayyiisoo cireessi hee'ooyyo. Ee bikkina ka lasage bisa'a ki'isoo malaayyi hee'ooyyo.

²²Ee bikkina an Moollanni Waa'i Gibxi adilanne quunqinne ki'aammo; ixxeka kanniinsi illageen iiqamaa hee'ukkokaa fayya'i angaa lamom iiqeena gudaammo; bisa'im angiinsi uboo'isa issoommo.

²³Gibxi minaadaba mulli minaadaphphi lambe'ennee annanni annanni uullannee binnaa'oommo.

²⁴Ee'isinne Baabiloo'n adi'lleka malaayye qoxxisaa i bisa'a ixxi anganne amadiisoommo. Ihukkaarem Gibxi adi'lleka malaayye iiqoommaare ixxi diinakkichchi illagenne lehoo madaanchisa qitinookko.

²⁵Gibxi adila hoogisaa Baabiloo'n adila qoxxisoommo; an Baabiloo'n adilina uwwoommi bisa'inne Gibxinne orameena ki'oo ammane manni hundim an Waa'i ihummisa la'ookko.

²⁶Gibxi minaadaba mulli minaadaphphi lambe'ennee annanni annanni uullannee binnaa'oommo. Ee lasage an Waa'i ihummisa laqqamo» yukko.