Read Hadiyya Hizqi'eel Kitaaba 31 Bible Online

Hizqi'eel Kitaaba 31 - Hadiyya bible

Hizqi'eel Kitaaba 31

¹Qeefadammummi tommonnee mat hiinchonnee saxxi agan aagu luxxi ballanne Waa'i iina

²«Manchi beeto, Gibxi adilinaa xigo dut ihu ixxi minaadabinaa ‹At hinkaa'nna malaayyaamo! Kiinninne ayyi akeekameena xanam hee'ukko?

³At haf mishisoo caaffuwwi yoohaannisaa qeeraa'lloomim iim'n duuba afoo Liibaanoos digiphphisaa.

⁴Wo'i ee haqqichcho mutisukko; uulli wo'l wo'im li'isukko; daajjuwwi ee haqqichchi luguminne daadukko; biir uulli haqqannem daadoo'isa issukko.

⁵Ee bikkina oo haqqichchi mulli haqqi hundiinsim lobakata qeeraa'llukko; ixxi caaffuwwim geejjuwwaa qeeraa'lluwwaa ihukko.

⁶Ee haqqichchi caafannem dut cii'i do'nna baxukko; uulli moochchim hafanne wotalla qarukko. Uulli minaadab hundim ixxi hafanne usheexxam hee'ukko.

⁷Ixxek xaph lobakat wo'i yoo beyyonne kaaxxaa hee'u bikkina geejjaahii caaffuwwi haraaraahii ixxo wereeggisaa hee'ukko.

⁸Eden gannattanne hee'u digibbuwwi ixxenne akeekamooyyo; hoo'm haqqi ixxeka caaffuwwa ihooyyo; giraa'l caaffuwwi ixxi caafinne akeekixxamoohaare mahannem xigamooyyo. Eden gannatti haqquwwiinsi matinam ixxaanni'nnoo'i dan bee'e.

⁹An ixxo lobakat caaffuwwinne mishisoohan issummo; ixxi an Waa'i kaasummi Eden gannattanne yoo haqqi hundam to'achchisoohan hee'ukko› yitaa kure.

¹⁰«Oo haqqichchi li'aa duub afimminne bolxu bikkina an Moollanni Waa'i

¹¹ixxo fissaa uunjoommo; ixxi bi'ishshisanne ixxi baxika miqisona mulli minaadaphphi gassaanchina higisaa uwwoommo.

¹²Lobakata mogaalli ikko'i mulli minaadab ee haqqichcho mutta'a ubbuussamo; ixxekim quuxxuwwi duunnuwwannee cebbuwwannee ubookko; hammuwwi iiqamaa daadoo wo'onne dufookko. Ixxi hafanne usheexxita'a hee'llam uulli minaadab hundim utta'a mattamo.

¹³Ee ubu haqqichchonne iima'n cii'i usheexxookko; caaffuwwim uulli moochchina heechchi beyyi ihookko.

¹⁴Ee bikkina kanniinsi eehid hinkaa'n wo'om aguta'nnim ka haqqichchisa uullichchi qeeraa'llaa iima'n duuba afoo haqqi hore'em hee'ooyyo; manni lehaa waammamoo'isa ixxuwwim lehina qoodanto'ookko. Si'oolam dillitamo» yukko.

¹⁵Moollanni Waa'i «Oo haqqichchi muramaa Si'oolanne dilloo ammane xilli wo'o ifiisoommaare wi'llinne waammakkamo; daajjuwwam gokkisoommo; lob daajjuwwam xoo'isoommo. Ee bikkina Liibaanoos duunnuwwanne tuunso gunguussoommo; doo'm haqqam gokkisoommo.

¹⁶An ee haqqichcho Si'oolanne dilloo'isa issoommi ammane ubukkuuyyi gugoo sagara macceesoo minaadab hundim huxe'ookko. Ede'nnekii Liibaanoos doo'llammi er haqqii oo haqqichchi Si'oolanne ixxuwwanne exxu bikkina liirantamo.

¹⁷Ee haqqichchi hafanne hee'llo'i keenii ixxena kob hee'llo'i mulli minaadabii bisa'inne beeddita'a Si'oolanne hee'llam keenonne exxiteena ixxennem dillitamo.

¹⁸«Oo haqqichchi Gibxi adilaa ixxi minaadaba hundamii kobi'lloohane; Edenanne hee'u haqqiinsi hundiinsim uullichchinnee daninnee ixxe'nnoo'ok hee'ukkoyyo. Ihukkaarem kaba Edenanne hee'u haqquwwisam Si'oolanne dillookko; eekke'em eesenne Waa'anne amma'nnitoo'n oranne beeddito'i keenonne exxookko» yukko. Moollanni Waa'i kaka wocaakko.