Read Hadiyya Hizqi'eel Kitaaba 32 Bible Online

Hizqi'eel Kitaaba 32 - Hadiyya bible

Hizqi'eel Kitaaba 32

¹Neese qeefadammummi tommonnee la'm hiinchonnee tommikii la'm aganii aagu luxxi ballanne Waa'i iina

²«Manchi beeto, Gibxi adilina ‹At mulli minaadaphphi lambe'enne hobbichchisa hee'llitto; ihukkaarem at dambalaq woronne hee'oo baddisoo moochchichchisa; wo'om ki lokkinne hambaaccittuuyyi borqissaatto.

³Lobakat minaadab wixxoo ammane kiina i shikka qaashoommo; ixxuwwim ee shikkinne keese gosaassa'a fissitamo.

⁴Keesem biir uullanne buchchanne biddiqaa'oommo; ki maaram iima'n ammarii uulli moochchii itoo'isa issoommo.

⁵Duunii cebbii shamu ki leeshinne wo'mmoo'isa issoommo.

⁶Ki xiigim duunannee boohe'uuwwannee wo'mmaa daadoo'isa issoommo.

⁷An keese bi'isoommi ammane iimane ifiisoommo; boollaankam tuunsiisoommo; eelliincho duubinne ifiisoommo; aganim caakka uwwooyyo.

⁸Ki hanennem belecce'oo iima'n caakkuwwa tuunsiisoommo; ki uullim tuunsoo'isa issoommo. An Moollanni Waa'i kaka wocaammo› yitaa sottittuuyyi kure.

⁹«At laqqoobee'i minaadaphphi lambe'enne kiikka bichchi alallaatoommi ammane lobakat minaadab u'nnamookko.

¹⁰Lobakat minaadab keesenne ihu luwwa moo'aa muggoo'isa issoommo; i bisa'a ixxuwwi illagenne ki'isoommi ammane ixxuwwi adilluwwi ki mashka'inne baachchinne huxe'llamo. At ubboo balla annannichchim amman hundam ixxuwwi gagina baddimminne batbatitamo» yukko.

¹¹Moollanni Waa'i Gibxi adilina «Baabiloo'n adi'llek bisa'i ki hanenne waarookko.

¹²Uulli minaadab hundiinsim lobakata mogaalli ihu malaayyaam kee'nnek bisa'i ki minaadaphpheka duta guullookko; Gibxikam bolxooma sholle'nnanne dabarookko; xigo dut ihu ixxi minaadab bi'ookko.

¹³Lobakat wo'i hee'oo gadanonne allaa'lloo diinat hundam bi'isoommo; ee lasage Gibxika wo'o borqisoo minaadab te'im diinat hore'em hee'ooyyo.

¹⁴Ee'isam wo'uwwa xaliilsoommo; daajjuwwim zayixxisa cagagaa daadoo'isa issoommo. An Moollanni Waa'i kaka wocaammo.

¹⁵An Gibxa diihaa udma'aa issoommi ammanee Gibxanne hee'oo luwwi hundam bi'isoommi ammanee atii ki minaadabii an Waa'i ihummisa laqqakkamo.

¹⁶Kuk Gibxi bikkina sorakkam wi'llo. Mulli uulli minaadaphphi meenti Gibxinaa xigo dut ihu Gibxi minaadabinaa sottu'uuyyi wi'llitamo. An Moollanni Waa'i kaka wocaammo» yoolla.

¹⁷Qeefadammummi tommonnee la'm hiinchonnee luxxi agan aagu tommonnee onti ballannee Waa'i iina

¹⁸«Manchi beeto, Gibxi minaadaba mulli malaayyaam minaadabinne maqirem sottittuuyyi Si'oolanne geegeese» yukko.

¹⁹Ixxuwwinam «Ki'nnuwwi mulli keeniinsi danonne lophphitakkamonnihe? Xillanne aad dillitakka'a eesenne Waa'anne amma'nnitobee'i keeninne maqirem daabaayyehe.

²⁰«Gibxina bisa'i gudaakko; xigo dut ihu Gibxi minaadab bisa'inne beeddu kee'n lambe'enne ubookko.

²¹Gibxi minaadab Si'oolanne dillitam ammane ee beyyonne hee'llam geedduwwi aa'llamo; aa'lla'a lasagem ‹Ki'nnuwwi beshinnem waallehe, dillehe! Bisa'inne beeddito'i Waa'anne amma'nnitobee'i keeninne maqirem daabaayyehe!› yitamo.

²²«Aasoor bisa'inne beeddu ixxi gogoxxi waamminne kibbamaa ee beyyonne yookko.

²³Waammoomim Si'ooliinsi woroon xillannette. Uullanne minaadaba dambaqissam hee'llo'i oranne beeddito'i gaadaa'n waammim ixxuwwi kululleetannette.

²⁴«Xig dut ihu Eelaa'm gaadaa'nnekim waammi ee beyyonne hee'ukko; uullanne minaadaba dambaqissu'uuyyi hee'llo'i ixxuwwim bisa'inne beeddita'a eesenne Waa'anne amma'nnito'nnim Si'oolanne dillito'ookko; sholle'nne gunguu'lta'ahim waammanto'ookko.

²⁵Eelaa'm gaadaaninaa xig dut ihu ixxi minaadabinaa bisa'inne beeddu kee'n lambe'enne beyyi gudaakko; ixxuwwi waammim ee kee'n kululleetannette. Hundim eesenne Waa'anne amma'nnitobee'i keenoo bisa'inne beeddito'i keenoo; ixxuwwim uullanne minaadaba dambaqissam hee'llo'i bisa'inne beeddito'i keeno; ihukkaarem kaba sholle'nne gunguu'llita'a waammanne dillitam keeninne maqirem Si'oolanne daabaayyitamo.

²⁶«Meesheekikii Tuubaal minaadabii ixxuwwi gaadaa'n waamminne kibbanta'a ee beyyonne yo'o; ixxuwwim bisa'inne beeddita'a eesenne Waa'anne amma'nnito'nnim leto'i keeno; uullannem minaadaba dambaqissam hee'llo'o.

²⁷Uullanne minaadaba dambaqissam hee'llo'i bikkina ixxuwwi o'l mu'utinne maqirem oohim ixxuwwi bisa'i horoo'l kollinne ixxuwwi agiraa orachchonne issakka'a waammakkam gaassi geedduwwi waammi siyya'isa waammakko'oyyo.

²⁸«Ee'isam Gibxi iiqamookko; eesenne Waa'anne amma'nnoo'nnim bisa'inne beeddu keeninne maqirem daabaayyookko.

²⁹«Eedoo'm adilluwwikii awwonsaa'nnekii waammi ee beyyonnette; ixxuwwik malaayyaammuwwi eesenne Waa'anne amma'nnoo'nnim bisa'inne beeddu keeninne maqirem Si'oolanne daabaayyito'ookko.

³⁰«Hanaa'n qaranne gassitam keenii Siidoo'n mannii ee beyyonnette; daannoomanne bakke'lla'a dambaqa qooccitota'nnim sholle'nne gunguu'llita'a ee beyyonne daabayyito'ookko. Sholle'nne gunguu'llita'a eesenne Waa'anne amma'nnoo'nnim bisa'inne beeddita'a Si'oola dillito'i keeninne maqirem daabaayyito'ookko.

³¹«Bisa'inne leto'i Gibxi adilii ixxi gogotii ee keeno moo'lla'a Si'oolanne dillito'i kee'nnek xig dut ihu ixxi minaadabanne sabiraaxxookko» yihe yoolla Moollanni Waa'i.

³²Odim «Gibxi adil uullanne hee'oo minaadabanne dambaqa qooccoo'isa issaa hee'ummo; ihukkaarem ixxii ixxi gogotii eesenne Waa'nne amma'nnitoo'nnim oranne beeddito'i keeninne maqirem leta'a daabaayyitamo» yihe yukko. Moollanni Waa'i kaka wocaakko.