Read Hadiyya Hizqi'eel Kitaaba 33 Bible Online

Hizqi'eel Kitaaba 33 - Hadiyya bible

Hizqi'eel Kitaaba 33

²«Manchi beeto, ki minaadabina ‹Mat uullanne or ki'oo'isa issummita'n ee uulli minaadabim ixxuwwiinsi mat mancho qoto'aa egerona doo'llitota'n

³oo manchim diina'i waarukkuuyyi moo'aa minaadab gaga ege'llona o'l xurumba fugaa lasonne

⁴ayyi manchim ee sagara macceesaa gaga ege'llimma hoogimminne diina'i daafa ubbuusaa lehuta'n bi'ishshi ixxi gaqqaneme.

⁵Ege'llimma hoogimminne lehukkok ixxi gaqqi huushanchinnetteme; ee xurumbi sagara macceesaa ege'lluta'n bichchiinsi xoram hee'ukko.

⁶Ihukkaarem oo egeraanchi diina'i waarukkuuyyi moo'aa minaadab gaga ege'llona xurumba fugubeeta'nii ee minaadabiinsim mat manchi ee oranne lehuta'nnii oo manchi ixxi baaxiilinnem lehookko. Ihukkaarem ee lehu manchi xiigina ee qoto'aa egeroo mancho an xa'mmoommo› yitaa kure.

⁷«Manchi beeto, oono'o, an keese Isra'ee'l minaadabina egeraanchi issaammo; ee bikkina an kiina kuroommi woshsha macceessaa ixxuwwina qoxxissaa kure.

⁸Baaxiilaanchina ‹Baaxiilaancho, hanqo'isam at letootto› yumta'n oo baaxiilaanchi baaxiiliinsi daba'llona qoxxissaa kuttitbeelas ixxi baaxiilinnem lehookko; ixxi xiiginam an keese xa'mmoommo.

⁹Ihukkaarem oo baaxiilaanchi baaxiiliinsi daba'llona kuttaa lasage daba'llubeelas ixxi baaxiilinnem lehookko; atim ixxi xiiqqi bikkina xa'mmantooyyo» yukko.

¹⁰Manchi beeto, Isra'ee'l minaadabina «Ki'nnuwwi ‹Ni hawwojjii baaxiilii niina kee'mmaakko; e bikkina neese bi'nneenatte; hinkid hee'nneena xannoommo› yitakko'ookko.

¹¹‹Hanqinam an hee'oommi Waa'a; baaxiilaanchi baaxiilo baximma uraa foorinne hee'onatte bagaan ixxi lehonne an liiramoommoyyo. Ee bikkina Isra'ee'l minaadaba, ki'nnuwwi jor baxo ullehe; mahina lehimma hassakkamuulla?› yitaa kure.

¹²«Kabadem manchi beeto, muccur manchi baaxiilo baximma asheerulas illagee'n er bax ixxo gatisooyyo; baaxiilaanchim baaxii'l googiinsi daba'llulas illagee'n baaxiil ixxena qolat ihooyyo. Muccur manchim baaxiilo baximma asheerulas illagee'n muccuroom ixxo gatiseena xanooyyo.

¹³Muccur manchi hanqo'isam heechcha siixxoo'isa wocumta'nnim ixxi ‹Illagee'n muccuroom iina ihookko› yaa baaxiilo baximma asheerulas ixxeka illagee'n er baxiinsi matom sawwoommoyyo. Ee bikkina ixxim ixxi baaxii'l mashka'innem lehookko.

¹⁴Ee'isam mat baaxiilaanchi hanqo'isam lehoo'isa wocumta'nnim oo manchi baaxiilo baximma uraa hanqo'i oogato'o oogatulasii xabbeen ihaakkoo luwwa issulasii

¹⁵oohim bada'n bikkina dabaa amadu luwwaa game'u luwwaa dabarulasii baaxiilo baximma uraa heechcha uwwoo seera egerulasii hanqo'isam heechcha siixxookko bagaan lehooyyo.

¹⁶Ixxi baaxiiliinsi matom sawwoommoyyo; hanqo'i oogato'o oogatulasii xabbeen ihaakkoo luwwa issulasii hanqo'isam heechcha siixxookko.

¹⁷«Ihukkaarem ki minaadab ‹Waa'ik goog hanqo'aneyyo› yoolla. Hanqoomam hanqo'an ihubee'ek ixxuwwi googo.

¹⁸Muccur manchi ixxeka muccuroo'm baxo uraa baaxiilo baximma asheerulas ixxi bax bikkina lehookko.

¹⁹Baaxiilaanchim baaxiilo baximma uraa hanqo'i oogato'o oogatulasii xabbeen ihaakkoo luwwa issulasii heechcha siixxookko.

²⁰Ihukkaarem ki'nnuwwi Isra'ee'l minaadab ‹Waa'ik goog hanqo'aneyyo› yitakko'ookko. Ee bikkina ki'nnuwwanne annannichchonnem baxis baxisam oogatoommo» yukko.

²¹Neese qeefadammummi tommonnee la'm hiinchonnee tommi agan aagu onti ballanne Yerusaaleemiinsi xoraa waaraakkoo mat manchi Yerusaaleem qeefadamukkisa kurukko.

²²Xoraa waaru manchi i beyyo afeena mat balli hee'ukkuuyyi ee hiimo Waa'ik malaayyi i beyyo waarukko. La'm balli dara oo manchi i beyyo afoo'nnim Waa'i i suume fooqaa'ukko; ee bikkina ee ammaniinsi ki'isaa an wocimma xanummo.

²⁴«Manchi beeto, Isra'ee'l uullanne gindamaakkoo beero'uwwanne hee'llam minaadab ‹Abrihaam mexxo'i mat manchi ihaa hee'ukkisam uulla lagaa'ukko; ihukkaarem neese dut inkummi bikkina hanqo'isam ku uulli ni gulumma› yitamo.

²⁵«Ee bikkina ixxuwwina ‹Maara xiiginnem ittakkamuulla; qophpha'n waa'ina otossitakkamuulla; manna shitakkamuulla. Eebikkima ku uulli ni gulumma yitakkeena hinkid xantakkamo?

²⁶Ki'nnuwwi bisa'anne amma'nnitakkamuulla; shigigaa'oo baxo baxxakkamuulla; mat mullaanni meentichchonne saa'oolla. Eebikkina ku uulli ni gullumma yitakkeena hinkid xantakkamo?› yitaa kure.

²⁷«Hanqinam an hee'oommi Waa'a; gindamu beero'uwwanne hee'llam minaadab hundim hanqinam oranne beedditaman ihukkisa qoxxissaa kure. Hax uulli minaadab bii'l moochchina hurbaat ihookko; duunnuwwannee girbuwwannee maaxanto'i keenim boobaninne beedditamo.

²⁸Uulloomam udma'aa diihaa issoommo; ixxuwwi bakke'llam malaayyim beeddookko. Isra'ee'l duunnuwwim ayyim eeheen higoobee'i diih ihookko.

²⁹Ixxuwwi issito'i shigigaa'oo luwwi hundem mashka'innem ka uulla udma'aa diihaa issoommi ammane an Waa'i ihummisa laqqamo» yukko.

³⁰Waa'i iina «Manchi beeto, ki minaadab beero'i ooxxi gadanonnee ixxuwwi mi'n nafarannee atooraroollak ki bikkinatte; ixxuwwina'i ixxuwwim ‹Waallehe, Waa'iinsi mah assi waaruda'e macceensona› yaqqantamuulla.

³¹Ee bikkina mulli minaadab issoo'isam i minaadabim at woccoo sagara macceeseena wixxookko; ihukkaarem at kuttoo woshsha baxonne hosissamoyyo. Ki woshsha iittoo labookko; ihukkaarem gagina gollimma urooyyo.

³²Oono'o, at ixxuwwina iittakkam er mazmuu'llisaa diitta'a erisa lelloo manchisaa ikkaatto; ki woshsha macceessamo bagaan baxonne hosissamoyyo.

³³Ihukkaarem ki woshshi hanqo'isam wo'mmookko; hanqi ihaa wo'mmoo ammanem ixxuwwi lambe'enne hiraagaanchi yoo'isa laqqamo» yukko.