Read Hadiyya Hizqi'eel Kitaaba 34 Bible Online

Hizqi'eel Kitaaba 34 - Hadiyya bible

Hizqi'eel Kitaaba 34

²«Manchi beeto, Isra'ee'l allaaraanonne hiraago woce. An Moollanni Waa'i ixxuwwina yoommi luwwi hundam ‹Allaachcha abooyyimmaa egerimmaa uttakka'a ki'nnuwwi gaga abooyyaqqitakkam Isra'ee'l allaaraanina aayye!

³Di'iru keeno ittakkamo; ixxuwwi oddinne baxamu eddechcham edde'llakkamo. Geejju keeno duttakka'a ittakkamo. Ihukkaarem allaachchooma er hix yoo beyyonne allaattakkamoyyo.

⁴Hoogu keeno qoxxissakko'oyyo; xissu keenina qaraare agissakko'oyyo; iiqamu keeno caccakko'oyyo. Huushamu keeno dabattakko'oyyo; bi'u keenom hassakko'oyyo. Eekka issitakkam bikkenne wor amajjinnee monginnee gassitakko'o.

⁵Gereebbi allaaraancho hoogaa binnu bikkina bii'l moochchina hurbaat ihaakko.

⁶Ee bikkina i gereebbi duunnuwwanne hundannem karkaadaakko; uulli hundannem binnaakko. Hasaa wixxaa'oohim bee'e› yitaa hiraage.

⁷«Kabadem allaaraano, an Waa'i ki'nnuwwina wocoommi woshsha macceessehe.

⁸An heer heerina hee'oommi Moollanni Waa'a! I allaaraan i gereebba allaarimmaa egerimmaa utta'a xale'i ixxuwwi gaga abooyyaqqitam bikkina bi'u i gereebba hasaa egeroo allaaraanchi bee'u bikkina bii'l moochchina hurbaat ihaakko.

⁹Ee bikkina allaaraano, macceessehe.

¹⁰An Moollanni Waa'i i gereebbi allaaraano guzumo'oommo; i gereebba od hore'em allaattambee'isa issoommo. Ee lasage oo allaaraan ixxuwwi gaga abooyyaqqitamoyyo; i gereebbim ixxuwwina hurbaat ihoobee'isa ixxuwwi suumiinsi ubbuusisoommo.

¹¹«Moollanni Waa'i ‹An i gagim i gereebba hasoommo; ixxuwwam erisa allaaroommo.

¹²Gereebba allaaraan ixxuwwi gereebba binnu beyyiinsi wixxaa'aa woroo'isam anim i gereebba hasoommo; duubannee gambabbaakkoo tuunsi ballannee binnu beyyi hundiinsim wixxaa'oommo.

¹³Mulli minaadaphphi lambe'iinsii uulli hundiinsii wixxaa'aa ixxuwwi uulla woroommo; wo'i yoohanee heechchina danaamoo ihu Isra'ee'l uulli er duunnuwwanne allaaroommo.

¹⁴Er allaachchi biiranne allaaroommo; allaachchi biirim Isra'ee'l duunnuwwannetti ihookko. Ee duunnuwwannem allaa'llaa er beyyonne gii'mmookko.

¹⁵An gagoomim i gereebbina allaaraanchi ihoommo; usheexxoo'isam issoommo. An Moollanni Waa'i kaka wocaammo› yoolla.

¹⁶«Bi'u keeno hasoommo; huushamu keeno dabaraa woroommo; iiqamu keeno caccoommo; hoogu keeno qoxxisoommo. An hanqo'i allaaraanchi ihummi bikkina mulli keeno hawwodimminne di'iru keenoo malaayyaammuwwaa bi'isoommo.

¹⁷«Moollanni Waa'i ‹I gereebba, an ki'nnuwwanne oogatoommo; er gereebbannee jor gereebbannee fella'annee mulli gereebbannee oogatoommo.

¹⁸Er allaachchi biiriinsi ittakko'ok hoffe'ukkaarennihe gatukkoka hancaacantakko'ok? Lintaalli wo'om aggakka'a lasonne mulleka borqisimmi hasisoohonnihe?

¹⁹Ee bikkina mulli i gereebbi ki'nnuwwi hancaacantakko'i hixe itoollaa borqissakko'i wo'o agoollaa› yoolla.

²⁰Ee bikkina an Moollanni Waa'i di'irukkaannonnee nacu gereebbannee oogatoommo.

²¹Ki'nnuwwi hoogu gereebba midaadinnee guduminnee gafe'llakkamo; buudinne qassakkaahim hollitakkamo.

²²Ihukkaarem an i gereebba gatisoommo; ka lasage ayyim bogaa massooyyo. Er gereebbannee jor gereebbannee oogatoommo.

²³Iina awwaadaanchi Daawiiti'nnoo'i adila allaaraanchi issaa ki'isoommo; ixxim abooyyukkuuyyi allaarookko.

²⁴An Waa'im ixxuwwina Moollanni ihoommo; iina awwaadaanchi ihu Daawiiti'nnoo'i adilim ixxuwwa awwonsookko. An Waa'i kaka wocaammo.

²⁵Xumminne hee'llam hidi'l sagara ixxuwwinne aagoommo; ee uulliinsim bii'l moochcha holloommo. Ee bikkina i gereebbi xumminne allaa'llaa hee'oo'isaa haqqor hundanne gareenaa xanookko.

²⁶«Ixxuwwaa i duu'n kululleetanne yoo uulluwwaa maasse'oommo; xeenam ixxuwwina ammaninne ga'nnisoommo; oohim maassi xeen ihookko.

²⁷Haqqi mishookko; abuulli uullim danaam atoota uwwookko. Annannichchim ixxi gaqqi uullanne xumminne hee'ookko; i minaadaphpheka gaanjaqqa iiqaa agiddaninne gassitam kee'n angiinsi gatisoommi ammane an Waa'i ihummisa laqqamo.

²⁸Ee lasage mulli minaadab bogooyyo; moochchi shaa gosaasooyyo; xumminne hee'llamo bagaan ma'lluwwim baddisooyyo.

²⁹Ee'isam od sibaaraan ikkambee'isa danaam atoota wixxaa'llam harish uulla ixxuwwina uwwoommo; mulli minaadabim gadooyyo.

³⁰Ee ammane an ixxuwwina Moollanni Waa'i ixxuwwinnetti ihummisaa Isra'eel iina minaadab ihukkisaa manni hundim la'ookko. An Moollanni Waa'i kaka wocaammo.

³¹«Kinnuwwi i gereebba; i allaachchi gereebba yummi Isra'ee'l minaadaba; an ki'nnuwwina Moollanna» yoolla Moollanni Waa'i.