Read Hadiyya Hizqi'eel Kitaaba 35 Bible Online

Hizqi'eel Kitaaba 35 - Hadiyya bible

Hizqi'eel Kitaaba 35

²«Manchi beeto, Eedoo'm duu'n kolli daba'llitaa minaadabina hiraago woce.

³An Moollanni Waa'i ‹Eedoo'm minaadaba, oono'o, an ki'nnuwwanne ki'aammo; ki'nnuwwi uullam udma'aa diihaa issoommo.

⁴Beero'uwwam gindansoommo; uullam diihisoommo. Ee lasage an Waa'i ihummisa laqqakkamo› yoommoka kure.

⁵«Isra'eel baaxii'l mashka'inne guzumo'amu ammane gaassi baado amaddakka'a ixxuwwa bisa'ina higissakka'a uwwitakko'ookko.

⁶Ee bikkina Hanqinam an hee'oommi Waa'a; an ki'nnuwwa lehina higisaa uwwoommo; shoo keenim hollansookko. Xiiga dunimma sabbakkobee'i bikkina ki'nnuwwa shoo keen hollansookko.

⁷Edoo'mmeka duunaam uulla udma'aa diihaa issoommo; ayyim eeheen higoobee'isam issoommo.

⁸Duunnuwwa hundam leeshinne ifiisoommo; oranne beeddu manni leeshim duunnuwwanne, cebbuwwannee daajjuwwannee wo'mmookko.

⁹An ki'nnuwwika uulla heer heerinam udma'i issoommo; od ki'nnuwwi beero'uwwanne ayyim hee'ooyyo. Ee ammane an Waa'i ihummisa laqqakkamo.

¹⁰«An Moollanni eehe'enne hee'ummuuyyim ki'nnuwwi Yihuxxekaa Isra'ee'l minaadabaa ixxuwwi uullinne maqirem ni gaqqane yitakka'a lago aa'llakkeena sawwitakko'ookko.

¹¹Ee bikkina hanqinam an hee'oommi Waa'a; I minaadaphpheka baado amaddakka'a ixxuwwanne quuqqakko'i quunqisinnee to'achchisinnee ki'nnuwwa guzumo'oommo. Ixxuwwim ki'nnuwwa guzumo'oommi ammane an Waa'i ihummisa laqqamo.

¹²Ki'nnuwwi ‹Isra'ee'l duunnuwwi tigaakko; niinam hurbaat ihaa uwwamaakko› yitakka'a gado'inne woccakko'oka an Waa'i macceesummisa ee ammane laqqakkamo.

¹³Eesenne tobbe'llakko'ookko; iggimminnem woccakko'ookko; anim eekka macceesaammo» yukko.

¹⁴Ee bikkina an Moollanni Waa'i «Heer uulli hundim liiramukkuuyyi ki'nnuwwi uulli udma'i ihoo'isa issoommo.

¹⁵Isra'ee'l uulli udma'i ihu ammane liirantakko'isam anim See'iir duunaa Eedoo'm uullaa hundam udma'i issoommo. Ee lasage an Waa'i ihummisa ayyim la'ookko» yukko.