Read Hadiyya Hizqi'eel Kitaaba 36 Bible Online

Hizqi'eel Kitaaba 36 - Hadiyya bible

Hizqi'eel Kitaaba 36

¹Waa'i iina «Manchi beeto, Isra'ee'l duunnuwwina hiraago woce. An Moollanni Waa'i ixxuwwina kuroommi woshsha macceessona kure.

²Isra'ee'l diina'i ‹Oono'o, oo gaassi duunnuwwi niihan ihaakko!› yitamuulla.

³«Ee bikkina an Moollanni Waa'i Isra'ee'l duunnuwwina ‹Allaggi minaadab kolli hundinnem ki'nnuwwi uulla gindita'a udma'i issito'i bikkina ki'nnuwwi uulli mulli minaadaphphan ihaakko. Ki'nnuwwannem manni osaroo'isaa naacoo'isaa ikkakko'ookko› yoommoka hiraago woce.

⁴Ee bikkina Isra'ee'l duunnuwwa, i sagara macceessehe; ki'nnuwwi lob duunnuwwii hoffi duunnuwwii, daajjuwwii cebbuwwii udma'aa diihaa ihaa mulli minaadab boganchinaa osachchinaa ikkakko'i beero'uwwim macceessehe.

⁵«Kaba an Moollanni Waa'i Eedoomanne hundannemii mulli minaadabannee malaayyaamisa quuqaa wocaammo; ixxuwwi lobakat liiranchinnee gado'innee i uulla ixxuwwi gulummi issito'ookko.

⁶«Ee bikkina Isra'ee'l duunnuwwina, hoffi duunnuwwina, daajjuwwinaa cebbuwwinaa hiraago woce; mulli minaadab ixxuwwa game'llito'i bikkina an malaayyaam quunqinne ixxuwwanne ki'aammo.

⁷Ee bikkina ki'nnuwwi kululleetanne hee'llam mulli minaadab hundim sholle'llaman ihukkisa an Moollanni Waa'i hide'aa kuroommo.

⁸Ihukkaarem Isra'ee'l duunnuwwa, i minaadab Isra'eel daba'lloo amman afaakkoo bikkina ki'nnuwwi lattakkamo; misham ixxuwwina uwwitakkamo.

⁹Oono'o, an ki'nnuwwinnette; ki'nnuwwam er illinne moo'oommo. Ki'nnuwwi uulli abuullamaa wix wixamookko.

¹⁰An Isra'ee'l minaadaba fikkaannisoommo; diihaa hee'u beero'uwwi hundim daba'llaa baxamoohaare ki'nnuwwi hee'llakkamo.

¹¹Mannaa diinatee fikkaannisoommo; dut ooso qattakkamo. Eekke'em gaassi hee'llakko'aanniinsi loboka hee'llakkamo; eraa'llaanniinsi loboka goddaan ikkakkamisa issoommo. Ee ammane an Waa'i ihummisa laqqakkamo.

¹²I minaadab Isra'eela, odim ki'nnuwwi gulummanne hee'llakkona ki'nnuwwa dabaraa woroommo. Uullim daba'llaa ki'nnuwwan ihookko; od manni bee'an ihooyyo.

¹³«An Moollanni Waa'i yoommok kane. Minaadab ‹Ku uulli manna itoohane; minaadabam qachchi bee'i gatisoohane› yam hee'ukkok hanqame.

¹⁴Ihukkaarem ka lasage ku uulli manna itoohane ihooyyo; minaadabam qachchibee'an issooyyo. An Moollanni Waa'i kaka wocaammo.

¹⁵Od mulli minaadab keesenne naacooyyo; gado'innem keese ayyim moo'ooyyo. Ki minaadabinam od qolat ikkooyyo. An Moollanni Waa'i kaka wocaammo» yukko.

¹⁶Waa'i iina

¹⁷«Manchi beeto, Isra'ee'l minaadab ka uullanne hee'llu'uuyyi awwaad bee'i heechchinnee jor baxinnee uullooma haashaassito'o; i illagennem ixxuwwik taakki mat meentichchok aga'n xur waaraa haashaaranto'aannis hee'ukko.

¹⁸Ixxuwwi ka uullanne xiiga dunto'i bikkinaa qophpha'n waa'uwwina otossito'uuyyi haashaassito'i bikkinaa iikka malaayyaam quunqa ixxuwwanne dilliisummo.

¹⁹Ixxuwwik heechchi ogorii baxii jor ihu bikkina ixxuwwanne oogatummo; allaggi manni uullannem binnitamisa issummo.

²⁰Oo allaggi uulli minaadabim ‹Ku keen Waa'ina minaadaba ikko'aarem ixxuwwina uwwu uulliinsi fitto'ookko› yita'a iikka keesammi summa haashaassito'ookko.

²¹Ihukkaarem Isra'ee'l minaadab matto'i minaadaphphi lambe'enne iikka keesammi summa haashaassiisso'is eese kichche'isoolla.

²²«Oono'o, an Moollanni Waa'i ixxuwwi bikkina yoommi luwwi hundam ‹Ka lasage ki'nnuwwina issoommi luwwi, ki'nnuwwi mattakko'i beyyi hundannem haashaassiissakko'i i keesammi summi bikkinatte bagaan ki'nnuwwina Isra'eelinayyo.

²³Mulli minaadaphphi lambe'enne haashaaramaa hee'ukkoka ki'nnuwwi haashaassiissakka'a hee'llakko'i i lob summi keesammooma moo'isoommo. Ee lasage ki'nnuwwinne ixxuwwi illagenne iikka keesammooma la'isoommi ammane ixxuwwi an Waa'a ihummisa laqqamo.

²⁴Adilla'n gassi uulli hundiinsim fissaa wixxaa'imminne ki'nnuwwi uulla dabaraa woroommo.

²⁵Ki'nnuwwanne muccur wo'o wiximminne qophpha'n waa'ina otossimmiinsii haashaaranchiinsii hundiinsim muccuttakkamisa issoommo.

²⁶Ki'nnuwwina haareechchi wodano uwwoommo; haareechchi ayyaanam ki'nnuwwi woronne dissoommo. Ki'nnuwwiinsi ki'nnisa qoxxaakkoo wodano fissaa maa'llisa qacaakkoo wodano uwwoommo.

²⁷I Ayyaana ki'nnuwwanne gassoommo. Ki'nnuwwina uwwummi seeraa siyya'aa hundam qoxxitakka'a egettakkamisa issoommo.

²⁸Ee lasage gaassi ki'nnuwwi anno'ina uwwummi uullanne hee'llakkamo. Ki'nnuwwi i minaadaba ikkakkamo; anim ki'nnuwwina Moollanna ihoommo.

²⁹Haashaassoo luwwi hundiinsim gatisoommo. Kanniinsi eehid sibaar ki'nnuwwanne afoobee'isa hurbaat ki'nnuwwina lophphoo'isa issoommo.

³⁰Sibaa'l mashka'inne mulli minaadab ki'nnuwwa game'llitambee'isa haqqi mishii hurbaaxxi atootii lophphoo'isa issoommo.

³¹Ki'nnuwwika jor haalataa jor baxoo hundam sawwitakkamo; ki'nnuwwi baaxii'l bikkinaa haashaarammi bax bikkinaa ki'nnuwwi gaga shigigitakkamo.

³²An ka hundam issoommok ki'nnuwwi bikkinatti ihubee'isa laqqehe. Isra'eela, ki'nnuwwi bax bikkina tuullehee sholle'llehee› yihe» yukko. Kaka Moollanni Waa'i wocaakko.

³³Moollanni Waa'i «An ki'nnuwwa baaxiil hundiinsim muccussoommi ammane gindamu beero'uwwi hundam dabattakka'a baximminne ki'nnuwwi beero'uwwi hundannem hee'llakkamisa issoommo.

³⁴Ki'nnuwwi uullinne higoo manni moo'am hee'u udma'i uulli abuullamookko.

³⁵Moo'oo manni hundim ‹Udma'i ihaa hee'u ku uulli hinkid Ede'nnisa ihukko! Illageen udma'a, gindammaa diihaa hee'u beero'uwdu hinkid manni hee'oohanee girbamaakkoohanee iheena xanukko?› yookko.

³⁶Ee ammane bichchiinsi gatta'a ki'nnuwwi kululleetanne hee'llam mulli minaadab gindamu beero'uwwa dabaraa baxummohii udma'i uulluwwam latoo'isa issummohii an Waa'i ihummisa laqqamo. An Waa'i ka hundam issoommisa wocaammo; eekkam issoommo» yukko.

³⁷Moollanni Waa'i «Mat ammane Isra'eel odim eese uunxitamisa issoommo; ixxuwwi xigom gereebbi allaachchisa fikkaannisoommo.

³⁸Ugudduwwanne kitimina hincoo gereebbi Yerusaaleemanne wo'mmoo'isam gindamaa hee'u beero'uwwannem manni wo'mmaakkoohan ihookko. Ee ammane an Waa'i ihummisa laqqamo» yoolla.