Read Hadiyya Hizqi'eel Kitaaba 37 Bible Online

Hizqi'eel Kitaaba 37 - Hadiyya bible

Hizqi'eel Kitaaba 37

¹Waa'ik malaayyi eesenne ihukko; ixxi Ayyaanim eese massaa miq tuubamaakkoo cebbanne dissukko.

²Ixxim ee miqqeewwa iina moo'isukko; anim lobakata gogaakkoo dut miqqeewwa moo'ummo.

³Ixxim eese «Manchi beeto, ku miqqeewwi daba'llaa fooraam iheena xanoohonnihe?» yaa xa'mmukko. Anim «I Moollanni Waa'a! Kaka laqqoottok xale'i atette» yaa dabarummo.

⁴Waa'im «Ka miqqeewwina ‹Ki'nnuwwi gogaalli miqqeewwa, Waa'ika sagara macceessehe› yitaa hiraago woce.

⁵An Moollanni Waa'i ‹Ki'nnuwwina foore uwwaa fooraammuwwi ikkakkamisa issoommo.

⁶Bu'anaa maaraa eddeesaa omachchinne eddesoommo; foorem uwwaa fooraammuwwi ikkakkamisa issoommo. Ee ammane an Waa'i ihummisa laqqakkamo› yitaa kure» yukko.

⁷An ijaajamummisam hiraago wocummo; hiraago wocimma asheerummisam hashaashshanchi sagar macceesamukko; miqqeewwim wixxaa ixxina'i ixxim beyyi beyyo amadukkuuyyi amaxxamimma asheerukko.

⁸Moo'ummuuyyim oo miqqeewwi bu'aninne, maarinnee omachchinnee ifiisamukko. Ihukkaarem foor hee'ukkoyyo.

⁹Ee lasage Waa'i iina «Manchi beeto, hafachchina hiraago woce; hafachchi soorem qariinsim waaraa ku shakko'i keen fooraam ihona ixxuwwanne hafachchona kure» yukko.

¹⁰Anim ijaajamummisam hiraago wocummo; ixxuwwannem foor aagukko; hundim fooraammuwwi ikka'a uullito'o; lobakat gogotam ikko'o.

¹¹Waa'i iina «Manchi beeto, Isra'ee'l minaadab ka miqqeewwisa; ixxuwwi ‹Oono'o, ni miq gogaakko; niina ka lasage od neeyyat bee'e; ni woshshim beeddaakko› yito'ookko.

¹²Ee bikkina i minaadabina Isra'eelina hiraago woce. An Moollanni Waa'i ixxuwwika waammuwwa fooqaa'aa ixxuwwa fissaa Isra'ee'l uulla dabaraa woroommisa kure.

¹³I minaadab waammanto'i waammi hundam fooqaa'aa fissoommi ammane an Waa'i ihummisa laqqamo.

¹⁴Foore ixxuwwina uwwaa fooraammuwwi ikkamisa issoommo; ixxuwwi gaqqi uullannem hee'llamisa issoommo. Ee lasage kaka wocummokii issoommokii an Waa'i ihummisa laqqamo. Kaka an Waa'i wocaammo» yukko.

¹⁵Waa'i iina

¹⁶«Manchi beeto, mat bicco massitaa ixxonne ‹Yihuxxanee ixxenne maqir ihu Isra'ee'llanee› yitaa kitaabe. Ee'isam mulli bicco massitaa ixxonne ‹Yooseefane oohim Efireemanee ixxenne maqir ihu Isra'ee'llanee› yitaa kitaabe.

¹⁷Ee lasage mat biccisa ikkona lamom edansitaa ki anganne amade.

¹⁸Ki minaadabim kuk mah ihukkisda'e kuttona keese xa'mmitam ammane

¹⁹an Moollanni Waa'i Efireem anganne yoo Yooseefikaa ixxuwwinne maqir ikko'i Isra'ee'l oosikaa bicco massaa Yihuxxi biccinne edansaa mat issaa i anganne amadoomman ihukkisa kure.

²⁰«Kitaabbitti lamem biccuwwam ki anganne amaddaa minaadab moo'oo'isa isse.

²¹An Moollanni Waa'i iina minaadab ihu Isra'eela mulli minaadaphphi lambe'enne binnu beyyi hundiinsim wixxaa'aa ixxuwwi gaqqi uulla dabaraa woroommisa kure.

²²Isra'ee'l uullannee duunnuwwannee mexxo'i mat adi'l minaadab ikkamisa issoommo. Hundam mat issaa gassoo xale'i mat adil hee'ookko. La'mmaagge lam minaadab ikkamoyyo; ixxuwwi adillanim lam beyyonne baxxansamooyyo.

²³Ixxuwwi od qophpha'n waa'uwwinne, shigigaa'oo luwwuwwinnee annanni annanni baaxiilinnee ixxuwwi gaga haashaassitamoyyo; boqqoominne baxxo'i baaxiil hundiinsim gatisaa muccussoommo. Ee ammane ixxuwwi i minaadab ikkamo; anim ixxuwwina Moollanna ihoommo.

²⁴I awwaadaanchi Daawiiti'nnoo'i adil ixxuwwanne adil ihookko; hundinam mat allaaraanchi hee'ookko. Iikka seeraa siyya'am amma'nnanchinne egettamo.

²⁵I awwaadaanchi Yaaqoobina uwwummaannonnee ixxuwwi gaassi anno'im hee'llo'i uullannee hee'llamo. Ee uullanne ixxuwwi, ixxuwwi oosii ixxuwwi shumo'ii heer heerinam hee'llamo. Iina awwaadaanchi Daawiiti'nnoo'i adilim heer heerinam ixxuwwanne adil ihookko.

²⁶Ixxuwwinnem xummi hidi'l sagara aagoommo; oohim heer heeran ihookko. Ixxuwwa maasse'oommo; fikkaannisoommome. Keesammi i Minim heer heerina ixxuwwi lambe'enne qoxxaa hee'oo'isa issoommo.

²⁷Anim ee beyyonne ixxuwwinne hee'oommo; ixxuwwinam Moollanni ihoommo; ixxuwwim iina minaadab ikkamo.

²⁸Keesammi i Min ixxuwwi lambe'enne heer heerina hee'oo'isa issoommi ammane an Waa'i Isra'eela iihan issaa doo'lloomman ihukkisa mulli minaadab la'ookko» yukko.