Read Hadiyya Hizqi'eel Kitaaba 38 Bible Online

Hizqi'eel Kitaaba 38 - Hadiyya bible

Hizqi'eel Kitaaba 38

²«Manchi beeto, Maagoog uullanne hee'oo Meesheekikaa Tuubaal minaadabaa awwonsaanchi ihu Googanne hiraago woce.

³An Moollanni Waa'i ixxonne diina'oominne ki'oomman ihukkisa kure.

⁴An ixxi aqonne hookko'o aagisaa ixxoo ixxi gogotaa hundam laso dabaroommo. Ixxek gogot faradinnee o'l eddechcha edde'llo'oo faradaaninnee dut hee'llo'o; ee'isam gaadaan annannichchim hoffokaa lob agiraa amadda'a bisa'a lade'llo'oo keen hee'llo'o.

⁵Agira amadda'a o'l qoobe'e horoorenne issito'oo Faariisika, Tophphe'ikaa Liibiyikaa gaadaano hundam,

⁶Goomeeraa ixxi gogotaa hundam, hanaa'n qaranne qee'llonne hee'oo Beet-Toogaarii'm minee ixxi gogota hundamii ee'isam lobakat minaadabaa kiinninne maqirem fissoommo.

⁷Ee bikkina ixxii ixxi ijaacci woronne yo'i gogotii hundim guddona. Ixxim ixxuwwina awwonsaanchi ihona kure.

⁸Gudoohim udma'i ihaa hee'u Isra'ee'l uulla lobakat ammaniinsi lasonne qasona ijaajoommi bikkinatte; uulloomim lobakat ammanina udma'i ihaa hee'ukko; minaadabim mulli uullanne hee'oo beyyiinsi waaraa Isra'ee'l uullanne yoo duunnuwwanne xumminnem yookko.

⁹Ixxii ixxi gogotii ee'isam ixxenne yo'i dut minaadabii womoo'llisa gugga'a waattamo; duuphphisam uulla ifiissamo» yukko.

¹⁰Moollanni Waa'i Googina «Oo doolli afoo ammane at sawwitaa jor qoodo'o qooddootto.

¹¹At ‹Oot bee'i olla'uwwa amadoommo; oot, laqqo'ii goocii bee'em quloo'n xumminne hee'oo minaadabam qasoommo.

¹²Mulli minaadaphphi lambe'iinsi daba'llita'a waatto'oo mannim uulli lambe'enne yo'o; ixxuwwinam fooraam diinaxxekii annanni annanni mu'uxxekii amaxxi yoohane. Udma'i hee'u uullim kaba manni hee'oohan ihaakko; ee bikkina qeefado'o qeefadeenaa amaxxa bogeenaa ee minaadabam qaseenaa sawwaammo› yitootto.

¹³Saaba'ikii Deedaanikii ee'isam Tarsees daddaraanii harde'i gaadaanii ‹Qeefado'o massiteena waattittonnihe? Biraa worqaa, fooraam diinatee annanni annanni mu'utaa oohim lobakat qeefado'o gugguttam manna wixxaa'llittonnihe? yitamo» yoolla.

¹⁴Ee bikkina manchi beeto, Googina «Moollanni Waa'i ‹Ee ammane i minaadab Isra'eel xumminne hee'oo'isa moo'llaa ki'llootto.

¹⁵Hanaa'n qaranne qee'llonne hee'lloo beyyiinsi hundim faradonne saa'llaakkoo dut minaadaphpheka malaayyaam gogota awwonsitaa waattootto.

¹⁶I minaadab Isra'eelanne uulla ifiisoo duuphphisa ikkaa waattootto. Googa, lasaanchi doollenne i uullanne waattoo'isa issoommok ixxuwwi illagenne iikka keesammooma la'isoommi ammane uulli minaadab hundim la'onatte› yoolla yitaa hiraago woce» yukko.

¹⁷Moollanni Waa'i «I minaadabanne Isra'eelanne at ki'lloo'isa issoomman ihukkisa iina awwaadaan ikko'i Isra'ee'l hiraagaaninne gaassi doollenne dut ammane hiraago wocaammo» yoolla.

¹⁸Moollanni Waa'i «Goog Isra'eela qaseena ki'oo ammane iikka malaayyaam quunqa ixxonne dilliisoommo.

¹⁹Ee ammane Isra'eelanne kee'mmaalli uulli huxechchi ihoo'isa i to'achchinnee gii'llisa aphphoo quunqinnee alallaatoommo.

²⁰Danbalaq qurxumme'i, iima'n cii'i, uulli moochchi, annanni annanni diinatii uullanne hee'oo mannii i illagenne huxe'ookko. Duunnuwwi tigookko; baalluwwi toroshamookko; kininne ootamu oottuwwi gindamookko.

²¹I duunnuwwanne hundannem Googanne bisa'i ki'oo'isa issoommo; ixxi gogotik annannichchikim bisa'i ixxi beshichchom qasookko.

²²Boobaninnee lehinnee guzumo'oommo; ixxonne, ixxi gaadaanonnee maqire hee'llo'i mulli minaadabannee malaayyaam xeena, baradaa gii'l hiramaxaa ga'nnisoommo.

²³Ee'isinne an lobanee keesammaa ihummisa la'isoommo; lobakat mulli minaadabinam i gaga la'isoommo. Ee lasage ixxuwwi an Waa'i ihummisa laqqamo» yoolla.