Read Hadiyya Hizqi'eel Kitaaba 39 Bible Online

Hizqi'eel Kitaaba 39 - Hadiyya bible

Hizqi'eel Kitaaba 39

¹Moollanni Waa'i «Manchi beeto, Meesheekaannonnee Tuubaal minaadabinaa gassaanchi ihu Googanne hiraago woce. Ixxonne ki'ummisam kure.

²Ixxo laso dabaraa gosaasoommo; qee'l ihu hanaa'n qariinsi woraa Isra'ee'l duunnuwwanne gaadoo'isa issoommo.

³Ee lasage ixxo aphphisaa ixxeka tokkaashshe'e qeddi angiinsi xiyyam makki angiinsi ubbuusisoommo.

⁴Googii ixxi gogotii ee'isam ixxenne maqir ikko'i o'l beshii hundim leta'a Isra'ee'l duunnuwwanne ubbamo. Ixxuwwi leesham iima'n ammarinaa uulli moochchinaa hurbaat ihoo'isa issoommo.

⁵Biir uullanne ubba'a gattamo. An Moollanni Waa'i kaka wocaammo.

⁶Maagoogannee dambalaq tochchonnee qulit bee'em hee'oo manni uulluwwanne hundannem giira xanqisoommo. Ee ammane hundim an Waa'i ihummisa laqqamo.

⁷I keesammi summi i minaadab ikko'i Isra'ee'l beyyonne la'amoo'isa issoommo. Ka lasage i summi duumamona cawwoommoyyo. Ee lasage minaadab hundim an Waa'i Isra'ee'l keesammi ihummisa laqqamo» yukko.

⁸Moollanni Waa'i «Gaassi doolle ‹Waaroolla; hanqo'isam wo'mmookko› yaa hee'ummi balli kane.

⁹Isra'ee'l beero'uwwanne hee'llam minaadab hundim fitta'a ubu o'l mu'ut hundam giirina wixxaa'llamo. Agira, xiyya, tokkaashshe'e, bagadoo mugaa hundam wixxaa'lla'a shokkiissamo. Ixxuwwinam lamar hiinchina ihoo gii'l haqqi ihookko.

¹⁰Ee bikkina beyyi hundiinsim gii'l haqqa wixxaa'immam ihukko haqqor hundiinsim haqqa murimmi hasisooyyo. Mashka'oomim ubaa gatu o'l mu'ut hundam wixxaa'lla'a giittam bikkinatte. Gaassi ixxuwwiinsi boggo'i keeniinsii baqqo'i keeniinsii kaba korina boggeenaa baqqeenaa xantamo» yoolla. Kaka wocukkok Moollanni Waa'a.

¹¹Odim Waa'i «Ku hundim ihoo ammanenne Isra'ee'l uullanne yoo Sooqixxi Dambalaqiinsi eelliinchi firanne hee'oo araaxxi cebbi woronne Googina waammi beyyo uwwoommo. Ixxim dut ihoo bikkina daba'llamakkam googo ifiisookko. Googii ixxi gogotii hundim ee beyyonne waammantamo. Ee bikkina oo cebbi ‹Goog gogoxxi cebba› yamamookko.

¹²Ee lasage Isra'ee'l minaadab ee leesha hundam waammita'a uulla eraa'llisanne muccussiteebe'e lamar agan hasisookko.

¹³Ee uulli minaadabim leesha waammaa hara'mmookko; i lombi caakkaa la'amoo balla ixxuwwinam lombi ihookko. An Waa'i kaka wocaammo.

¹⁴Lamor aganiinsi lasonne uullanne gatu leesha beyyi hundannem hassu'uuyyi waammimminne uullooma muccussitam manni doo'llantamo.

¹⁵Ee uullanne do'llu'uuyyi mannika miqe siiddam ammane midaadonne mare'e issita'a higgamo. Waammi bare hintam keenim waatta'a Hamoon Goog cebbanne waammitamo.

¹⁶Ee waammi gadanonnem Hamoona yakkam beero'i hee'ookko. Ee'isinnem uulli odim muccurookko» yukko.

¹⁷Moollanni Waa'i iina «Kaa manchi beeto, annanni annanni ammarinaa moochchinaa hundinam ‹Isra'ee'l duunnuwwanne ki'nnuwwina gudisoommi lob kiti'm ugudanne maara ittakkeenaa xiiga aggakkeenaa kolli hundinnem wixxitakka'a waallehe› yihe.

¹⁸Akkamu Baasaa'n gereebbi ambulluwwisaa geexxuwwisa, fella'i ambu'lluwwisaa moo'lluwwisaa ikko'i malaayyaam manni maara ittakkamo. Uulli adilluwwikam xiiga aggakkamo.

¹⁹An gudisoommi kiti'm ugudanne godditakkeebe'i afeebe'e di'ira ittakkamo. Dimbitakkeebe'i afeebe'em xiiga aggakkamo.

²⁰An gudisoommi maaddiinsi faraxxanem ihukko faradaa'nneka, gaadaa'nnanem ihukko mulli o'l mannika maara godditeebe'e ittamo» yukko. Kaka wocukkok Moollanni Waa'a.

²¹Odim Waa'i «I lomba mulli minaadaphphi lambe'enne la'isoommo. Minaadab hundim eekka baxonne hosisummi i oogatoo ixxuwwa guzumo'ummi i malaayyee moo'llamo.

²²Isra'ee'l minaadabim ee ammaniinsi ki'issa'a an Waa'i ixxuwwina Moollanni ihummisa laqqamo.

²³Isra'ee'l minaadab qeefadanta'a matto'okim eese hawwoddo'i bikkinatte ihukkisa mulli minaadab hundim laqqamo. An ixxuwwa uraa urummaare ixxuwwi diina'i orinne kaa'lla'a hundam shito'ookko.

²⁴Ixxuwwi haashaaranchisaa ixxuwwi baaxii'llisaa ixxuwwanne issummo. Ixxuwwinam hara'mmato issummoyyo» yukko.

²⁵Moollanni Waa'i «Ihukkaarem kaba Yaaqoob oos ikko'i Isra'ee'l minaadabina haafoommo. Odim ixxuwwa goddaan issoommo. Iikki keesammi summim duumamoobee'isa hooroommo.

²⁶Ixxuwwa baddisoo luwwi hee'oo'n ixxuwwi gaqqi uullanne xumminne hee'llam hee'llo'i ammane issito'i tuusiisoo baxoo iina amma'nnancha hooggo'isaa hundam xaddamo.

²⁷Ixxuwwa mulli minaadaphphi lambe'iinsi dabaroommaaree ixxuwwi diina'i uulliinsim lobakat minaadab moo'llu'uuyyi wixxaa'oommaaree ixxuwwanne ihaa an keesammi ihummisa la'isoommo.

²⁸Qeefadanta'a yaayyantamisa issummok anette ihummaarem kaba ixxuwwiinsi mat manchim laso gatoo'n ixxuwwi gaqqi uulla daba'llitamisa issaammo. Ee bikkina i minaadab an Waa'i Moollanna ihummisa laqqamo.

²⁹I Ayyaana Isra'ee'l minaadaphphi hanenne dunoommo. Od ixxuwwa uroommoyyo» yoolla. Kaka wocukkok Moollanni Waa'a.