Read Hadiyya Hizqi'eel Kitaaba 4 Bible Online

Hizqi'eel Kitaaba 4 - Hadiyya bible

Hizqi'eel Kitaaba 4

¹Waa'i «Manchi beeto, cukkamaakkoo dora eebbaa ki illagenne disse; ixxonnem Yerusaalee'm beero'o moo'isoo kaarta'a baxe.

²Mat beero'isa issitaa kobi'llisimminne ee cukkamu dora aphphisseena gude. Lud afeebe'e buchcha tuubbaa eehannonne iim firakkamisa issitaa baxxaa ee xuuba diina'i gaadaaninne kibbamoohaannisa kobi'llissaa kibbe. Hundem kollinnem haqqi utuba baxxaa ee beero'ika ooxxi gooca ginditoohaannisa isse.

³Xaa'l mixaada ki lambe'ennee beero'i lambe'ennee ooxxisa uullise; ki illem beero'i kollonne dabare; beero'oomim kibbamukkoka labona; kibbitoottokim atetteme; ookkim Isra'ee'l minaadabina mare'i ihookko.

⁴«Ee lasage Isra'ee'l minaadaphphi baaxii'l bikkina qeddi midaadonne iinse'e; ee midaadinne iinse'lloo ayyaammuwwi xigonne ixxuwwi baaxiilo at iyyitootto.

⁵Isra'ee'l minaadab baaxiilo baxxo'i qax hiinchi xigonne ayyaammuwwa kiina qoodaammo; oohim mat balli mat hiincho bikkoo'isa issaatette. Ee bikkina 390 ballaa Isra'ee'l baaxiilo iyyitootto.

⁶Eekka guullitaa lasage Yihuxxi minaadaphphi baaxii'l bikkina makki midaadonne sor balla iinse'llootto. Oohim an ixxuwwa guzumo'oommi hiinchuwwa bikkoohane.

⁷«Yerusaalee'm kibbancha xishshitaa moo'e; ki angam ki'issaa hiraago woce.

⁸Oo kibbanchi beeddeebe'i afeebe'e mulli midaadonne daba'llitoobee'isa keese usinne karoommo.

⁹«Kabadem arasaa so'oo, baaqeelaa mishiraa, sarataa gardaammaa eebbaa hundam mateeyyoominne hamaattaa qorosho'o sare. Oohim qeddi midaadonne iinse'lloo sas xibbennee honsayyi balli woronnee ittoohane.

¹⁰Ballina ballina mat kiilo'i soo'l suume ihoo hurbaata ittootto. Oohim waaroo ballinam ihoo'isa issimminne qoodamu ammanenne ittootto.

¹¹At aggoo wo'im keenamaakkoohan ihimmi hasisoo bikkina mat ballanne xale'i lam kubbaayyi wo'o aggootto.

¹²Manni hundim keese moo'oo beyyonne mannika gogaalli qoxxaalli shuma giirina awwaaxxitaa ee qama so'i qorosho'isa sattaa ittootto» yukko.

¹³Waa'im «Oohim Isra'ee'l minaadaba allaggi uullanne hundannem binnaa'oommaare seeranne hooramu haashaarammi hurbaattuwwa ittaman ihukkisa moo'isookko» yukko.

¹⁴Anim «I Moollanni Waa'a! Ookki hore'em ihoone! An hore'em haashaaramaa la'oommoyyo; ciiloommaniinsi ki'isaa baytukkoka te'im moochchi shu diinaxxi maara itummi amman bee'e; haashaarammi maaram itummoyyo» yaa dabarummo.

¹⁵Waa'im «Erane, eehid ihukkaa'lleensi manni shu'm bikkenne koboota feettaa giittaa hurbaata sare» yukko.

¹⁶Ee lasage odim «Manchi beeto, Yerusaaleemina hincoo hurbaat hundim gatoo'isa issoommo. Ee beyyonne hee'llam minaadab baddimminnee baa'imminnee wo'mmita'a ittam hurbaataa aggam wo'oo keentu'uuyyi ittamisaa aggamisaa issoommo.

¹⁷Ittam luwwii aggam luwwii bee'immiinsi ki'ukkok ixxuwwina'i ixxuwwim neeyyato mutta'a illi ille moo'aqqantamo. Ixxuwwi baaxiiliinsi ki'ukkok jiitta'a letamo.