Read Hadiyya Hizqi'eel Kitaaba 40 Bible Online

Hizqi'eel Kitaaba 40 - Hadiyya bible

Hizqi'eel Kitaaba 40

¹Qeefadammummi lamiyyennee onti hiinchonnee Yerusaaleemim diina'i anganne ubu tommonnee soo'l hiinchi luxxi aganannee ee aga'nnaannonnem tommi ballanne Waa'ik malaayyi eesenne dillukko. Oo malaayyim eese ki'isaa Yerusaaleema massukko.

²Oo malaayyim Waa'i kaaltinne eese Isra'ee'l uulla massaa mat qeeraa'l duunanne dissukko. Eehe'em lobakat min yoo beero'o labookkoka ee duuniinsi woroo'n qarinne moo'ummo.

³Odim kaaltinne ee beyyi kolli hincaa'ukkaare naas xaa'llisa belecce'oo mat mancho moo'ummo; oo manchim talbi fatirinne dadamaakkoo usaa mat anganne keenimmina ihoo leegaa mulli anganne amadaa mat gooc gadanonne uullaa hee'ukko.

⁴Oo manchim iina «Manchi beeto, keyye waattittok an kiina moo'isoommi luwwi hundam laqqonatte ihu bikkina qoossitaa moo'ee macceesee; moo'lloo luwwi hundam Isra'ee'l minaadabina kure» yukko.

⁵Keesammi Mi'n kululleetanne oot hee'ukko; oo manchi amadaa hee'u keenakkam leeqqek qeeraa'lloom ee manchi anganne loh anga. Oo manchim ee qasha keenukkaare haraaroom mat leega uullichchim mat leega ihukko. Ihukkaarem ixxek angi mulli manni anganne mat angaa taachcho'oo ihoohane.

⁶Ee lasage eelliinchi firinne yoo ooxxi gooc kolli marukko; gardabbam firaa guba'nneka gaxa tochchiinsi ki'isaa keenukkaare mat leega ihukko.

⁷Ee gooc lamem shiinennem yoo waardiyyuwwi minneewwik uullichchi mat leeg ihaa dufaachchim mat leeg hee'ukko; ee waardiyyuwwi minneewwi lambe'uwwanne yoo qee'lloom oonti anga hee'ukko. Ee goocanne yoo gubanim Keesammi Mine aagakkeena daba'llamakkam beyyi tochchi afeebe'e mat leeg hee'ukko.

⁸Oo manchi odim ee goocika daba'llamakkam beyyo keenukkaare sadeenti anga ihukko; ee beyyi utubbuwwik geejjoom lam anga; ee goocanne yoo daba'llamakkam beyyim Keesammi Mi'n nafarannetti hee'ukko.

⁹

¹⁰Oo waardiyyuwwi minneewwi sas sas ihaa hundikim haraaroom gudaanchi hee'ukko. Oo minneewwim daba'llamakkam beyyi lamem midaadinnette hee'ukko; ee minneewwi lanbe'enne yoo hundem utubbuwwi geejjoomim gudaanchi hee'ukko.

¹¹Ee lasage oo manchi ee goocika daba'llamakkam beyyo keenukkaare qeeraa'lloom tommoo sas anga midaadim tommi anga ihukko.

¹²Ee minneewwi illagenne annannichchonnem uullichchi mat anga geejjoomim mat anga ihoo gundi utubbuwwi hee'ukko. Ee minneewwina hundinam soor lamejji yoohan ihaa lamejjuwwik annannichchi qeeraa'lloom loh angi hee'ukko.

¹³Ee lasage oo manchi daba'llamakkam beyyo waardiyyuwwi miniinsi afaree'n kollo mat mi'n gorte'iinsi la'm mi'n gorte'i afeebe'e keenukkaare lamiyyee onti angaa ihukko.

¹⁴Ee daba'llamakkam beyyi tochchonne yoo min wixxixxi beyyi kolli moo'isoohan hee'ukko; ee minem keenukkaare lamiyyi anga ihukko.

¹⁵Aagakkam goociinsi firakkam gooc afeebe'e yoo daba'llamakkam beyyi qeeraa'lloom ontayyi angi hee'ukko.

¹⁶Waardiyyuwwi minneewwiinsii utubbuwwiinsii worinne kululaahim maskoottuwwii hoffi afo'uuwwii hee'ukko. Lasaanchi minneewwannem worinne kululleetannem maskoottuwwi hee'ukko. Utubbuwwannem dimbaaphphi hagaranne baxamaakkoo misilluwwi hee'ukko.

¹⁷Ee lasage oo manchi biiree'n kollinne yoo wixxixxi beyyo eese worukko; ee wixxixxi beyyi kululleetanne mu'uta dissakkam minneewwii kina dahamaakkoo gaxii hee'ukko; ee gaxannem mu'uta dissakkam sad min hee'ukko.

¹⁸Woroo'n gax mine aagakkam gooca afoohan hee'ukko; gaxoo'm qeeraa'lloomim gooccuwwi qaxam qeeraa'lloohan hee'ukko.

¹⁹Ee woroo'n goociinsi ki'isaa woro'l wixxixxi beyyi illag afeebe'e yoo dufaachcha keenukkaare mat xibbi anga ihukko.

²⁰Oo manchi hanaa'n qaranne biiree'n wixxixxi beyyi illagenne yoo ooxxi gooca keenukko.

²¹Ee beyyonne qeddinnee makkinnee yoo waardiyyi usheexxoo sas sas min, ee minneewwi lambe'enne yoo utubbuwwii daba'llamakkam beyyi tochchonne yoo goocii eelliinchi fi'l ooxxi goocanne yoo kee'nnaanninne gudaancho. Ee ooxxi goocik qeeraa'lloom ontayyi anga, dufaachchoomim lamiyyee onti angaa hee'ukko.

²²Daba'llamakkam beyyi, maskoottuwwii dimbaaphphi hagaranne baxamu misilluwwii eelliinchi firinne yoo ooxxi goocaanninne kobi'llamoohane; ee goocannem lamar gardabbuwwi hee'ukko. Ee daba'llamakkam beyyi worinne yoo kolli wixxixxi beyyi gardabbuwwi illaginnette hee'ukko.

²³Eelliinchi fi'l goocanne yoohaannisam hanaa'n qarinne yoo goocannem worinne yoo wixxixxi beyyo aagakkam gooc hee'ukko; oo manchim mat goociinsi mulli gooc afeebe'e keenukkaare mat xibbi anga ihukko.

²⁴Ee lasage oo manchi eese woroo'n qaranne massukko; eehe'em mat gooc hee'ukko. Oo manchim ee goocika gortanni utubbuwwaa daba'llamakkam beyyi tochchonne yoo goocaa keenukko; haraaroomim mulli gooccuwwaannisam hee'ukko.

²⁵Qeeraa'lloom ontayyi anga dufaachchim lamiyyee onti angaa ihoo gooc daba'llamakkam beyyinnem mulli beyyuwwaannisam maskoottuwwi yoohan hee'ukko.

²⁶Ee goocinam lamar gardabbuwwi yoohan ihaa ee gardabbuwwi illaginnem daba'llamakkam beyyi heeukkoo; eekke'em lamem kollinnem yoo utubbuwwanne dimbaaphphi hagaranne wereeggisakka'a axisakko'oo misil hee'ukko.

²⁷Ka beyyonnem woro'l wixxixxi beyyo massoo gooc hee'ukko; illagenne mulli goocim hee'ukko; oo goocim worinne yoo wixxixxi beyyo massoohan hee'ukko. Oo manchim lamem gooc lambe'ennem yoo beyyo keenukkaare mat xibbi anga ihukko.

²⁸Oo manchi woroo'n qarinne yoo ooxxi goociinsi worinne yoo wixxixxi beyyo eese massukko. Ixxim ee qa'l gooca keenukkaare haraaroom mulli gooccuwwinne gudaanchi hee'ukko.

²⁹Waardiyyuwwi minneewwik, gortanni utubbuwwikii daba'llamakkam beyyikii haraaroom mulli gooccuwwaannisam hee'ukko. Goocikii ee daba'llamakkam beyyikii qeeraa'lloom ontayyi anga dufaachchoomim lamiyyee onti anga hee'ukko. Ee daba'llamakkam beyyi kululleetanne hundannem maskoottuwwi hee'ukko.

³⁰Ee goocanne yoo daba'llamakkam beyyuwwik qeeraa'lloom lamiyyee onti angaa ihaa dufaachchoom odim onti angi hee'ukko.

³¹Oo gooc biiree'n wixxixxi beyyi illagenne yoohane; utubbuwwannem dimbaaphphi hagaranne baxamaakkoo misilluwwi hee'ukko; gooc kolli massoo gardabbuwwim sadeenti hee'ukko.

³²Oo manchim eelliinchi fi'l goocinne woro'l wixxixxi beyyo massukko; Ixxim ee qa'l gooca keenukkaare haraaroom mulli gooccuwwinne gudaanchi hee'ukko.

³³Waardiyyuwwi minneewwik, gortanni utubbuwwikii daba'llamakkam beyyikii haraaroom mulli kee'nnaannisame. Goocikii ee daba'llamakkam beyyikii qeeraa'lloom ontayyi anga dufaachchoomim lamiyyee onti anga hee'ukko. Ee daba'llamakkam beyyi kululleet hundannem maskoottuwwi hee'ukko.

³⁴Oo gooc biiree'n wixxixxi beyyiinsi illagenne yoohan hee'ukko; gortanni utubbuwwanne lamem kollinnem dimbaaphphi hagaranne baxamaakkoo misilluwwi hee'ukko. Ee gooc kolli massoo garadabbuwwim sadeenti hee'ukko.

³⁵Oo manchi eese hanaa'n qa'l gooc kolli massukko; ee gooc haraaroomam keenukkaare mulli kee'nnaannisam ihukko.

³⁶Waardiyyuwwi minneewwik, gortanni utubbuwwikii daba'llamakkam beyyikii haraaroom mulli kee'nnaannisame. Ee daba'llamakkam beyyik qeeraa'lloom ontayyi anga; dufaachchoomim lamiyyee onti angaa hee'ukko. Ee daba'llamakkam beyyi kululleet hundannem maskoottuwwi hee'ukko.

³⁷Oo gooc biiree'n wixxixxi beyyi illagenne yoohane; gortanni utubbuwwanne lamem kollinnem dimbaaphphi hagaranne baxamaakkoo misilluwwi hee'ukko. Ee gooc kolli massoo garadabbuwwim sadeenti hee'ukko.

³⁸Biiree'n wixxixxi beyyiinsi hanaa'n qarinne woro'l goocinne edansamaa baxamaakkoo mat mu'uxxi min hee'ukko; oo minim wixxixxi beyyi illagenne yoo mine aagakkam mulli goocim yoohane. Shokkiisakka'a hincaa'akkam kiti'm diinaxxi maara aanshakkamokim ee minennette.

³⁹Aagakkam goocanne yoo daba'llamakkam beyyi makkinnee qeddinnee shokkiisakka'a hincaa'akkamaanninaa baaxii'l bikkinaa hawwojji bikkinaa hincoo kiti'm diinate durakkam lam lam xaraphpheez hee'ukko.

⁴⁰Ee aagakkam goocanne daba'llamakkam beyyiinsi biireen hanaa'n qarinne yoo ooxxi gooc gadanonne makki kollinnee qeddi kollinnee lam lam xaraphpheez hee'ukko.

⁴¹Ee bikkina kitimina hincoo diinate durakkam xaraphpheezzuwwi sadeenti ihaa soor worinne soor biirinne hee'ukko.

⁴²Ee'isam shokkiisakka'a hincaa'akkam kiti'm awwaadina kina cabbarakka'a axisakko'oo soor xaraphpheez hee'ukko; ee kee'n qeeraa'lloomim mat angaa kolloo; dufaachchim mat angaa kolloo ihaa uullichchi odim mat anga hee'ukko. Oo xaraphpheezzuwwi shokkiisakkam kiti'mmekaa mulli kiti'mmekaa diinate durakkam mu'uttuwwa dissakkam keen hee'ukko.

⁴³Ee'isam mat mat mu'uta dissimmina awwaaxxakkam mat taachcho'o ihoo lam qaf yoo sinxilluwwi gorte'i kululleetanne woro'l kollinne kaaxxaa hee'ukko. Xaraphpheezzuwwim kiti'm maara dissimmina awwaadoohan hee'ukko.

⁴⁴Ee lasage oo manchi eese woro'l wixxixxi beyyo massukko. Ee beyyonnem lam min hee'ukko. Ee keeniinsi mat hanaa'n qarinne yoo ooxxi gooc gadanonnetti ihaa gooc woroo'n qaranne daba'llaakkoohane. La'mmekim woroo'n qaranne yoo ooxxi gooc gadanonnette ihaagooc hanaa'n qaranne daba'llaakkoohane.

⁴⁵Oo manchim iina «Woroo'n qaranne gooc daba'llaa yoo min Keesammi Minenne awwaaddam qeessuwwane.

⁴⁶Hanaa'n qaranne gooc daba'llaa yoo min kiti'm beyyonne awwaaddam qeessuwwane. Oo keen hundim Waa'i illagenne uullita'a awwaaddam Leewe'i shumo'i ikka'a Saadooq oos hee'llo'o» yukko.

⁴⁷Oo manchi woro'l wixxixxi beyyo keenukkaare qeeraa'lloom xibbi anga dufaachchim xibbi anga ihukko; Keesammi Mi'n illagennem mat kiti'm beyyi hee'ukko.

⁴⁸Ee lasage eese Keesammi Mine aagakkam gooc kolli massukko; ee goocanne yoo utubbuwwa keenukkaare lamem midaadduwwim onti onti anga ihukko. Ee goocik dufaachchi tommoo soor anga; utubbuwwi gumu'llaalloomim sas sas anga.

⁴⁹Ee daba'llamakkam beyyikim qeeraa'lloom lamiyyi anga; dufaachchim tommoo lam angaa ihukko; Keesammi Mi'n kolli massoo gardabbuwwim tommi hee'ukko. Ee gardabbuwwi midaadduwwannem utubbuwwi hee'ukko.