Read Hadiyya Hizqi'eel Kitaaba 41 Bible Online

Hizqi'eel Kitaaba 41 - Hadiyya bible

Hizqi'eel Kitaaba 41

¹Ee lasage oo manchi Keesammi Minenne yoo Keesammi beyyo eese massukko; ee Keesammi beyyo aagakkam illagenne yoo daba'llamakkam beyyom keenukkaare lamem midaaxxekim qeeraa'lloom loh loh angi ihukko.

²Dufaachchim tommi anga hee'ukko; makkinnee qeddinnee yoo gortannik gumu'llaalloom annannichchikim onti anga hee'ukko. Ee Keesammi beyyom keenukkaare qeeraa'lloom sor anga dufaachchoomim lamiyyi anga ihukko.

³Ee beyyiinsim higaa woro'l mi'n baxxancha aagukko. Ee mi'n goocanne yoo daba'llamakkam beyyo keenukkaare qeeraa'lloom lam anga dufaachchim loh anga ihukko. Makkinnee qeddinnee yoo gortannik gumu'llaalloom annannichchikim lamar anga ihukko.

⁴Ee lambe'i mi'n baxxanchiinsi ekkeen yoo woro'l mi'n baxxancha lamejjiinsi lamejji afeebe'e keenukkaare qeeraa'lloom lamiyyi anga dufaachchim lamiyyi anga ihukko. Ee lasage «Kuk Keesammiinsi Keesammi beyyo» yukko.

⁵Oo manchi ee Keesammi Mi'n worinne yoo gortanna keenukkaare gumu'llaalloom loh anga ihukko. Ee gortannanne hincaa Keesammi Mi'n kululleetanne baxamaakkoo minneewwik annannichchikim dufaachchi soor anga ihoo lobakat minneewwi hee'ukko.

⁶Oo minneewwi sas fooq yoohan ihaa annannichchonnem sad baxxanchuwwi yoohan hee'ukko. Ee Keesammi Mi'n biiree'n kolli gortanni woroo'n fooqanne yoo gortanniinsi loboka caraq hee'ukko. Oohim Keesammi Mi'n gortannannetti ihoo'n fooqquwwi uullukkok lob gortannannetti ihu bikkinatte.

⁷Woroo'n gortanni hanaa'nnaanniinsi gumu'llaalla. Ihukkaarem biiree'n kollinne moo'akkamaare ludiinsi lugum afeebe'e gumu'llaalloom gudaancho labookko. Oo gortannuwwim worooniim caraqukkuuyyi maroo bikkina hanaa'n fooqik baxxanchuwwi haraarukkuuyyi marookko. Hanaa'n fooqanne firakkamokim lambe'e fooq gardabbinnette.

⁸Keesammi mi'nnek shooto'i loh anga iim qoffaa baxamaakkoohan hee'ukko; biiree'n kollinne yoo minneewwikim qoffit eehannisam hee'ukko.

⁹Biiree'n kollinne yoo minneewwik gortanni gumu'llaalloom onti angi hee'ukko. Keesammi mi'nnaannonnee qeessuwwi mi'n lambe'ennee biir beyyi hee'ukko. Ee beyyikim haraaroom Keesammi Mine kululaahim lamiyyi angi hee'ukko.

¹¹Keesammi Mi'n midaadonne yoo minneewwik gooccuwwi ee biir ihaa yoo beyyi kolli daba'llaakkoohan ihaa mat hanaa'n qaranne mat woroo'n qaranne fooqoohane. Oo bon beyyi kululaahim onti angi hee'ukko.

¹²Ee bon beyyi tochchonne eelliinchi aagginne mat min hee'ukko; ee mi'n gortannik gumu'llaalloom onti anga; dufaachchi lamarayyi anga; qeeraa'lloomim honsayyi anga hee'ukko.

¹³Oo manchi Keesammi Mine keenukkaare mat xibbi anga ihukko; ee'isam Keesammi Miniinsi afareen bon ihaa yoo biir beyyiinsi illagenne eelliinchi aagginne yoo mi'n tochchi afeebe'e keenukkaare qeeraa'lloom mat xibbi anga ihukko.

¹⁴Odim Keesammi Miniinsi eelliinchi firinne yoo beyyik qeeraa'lloom lamem kollinnem kora'am yoo biir beyyuwwa edaa xibbi anga ihukko.

¹⁵Keesammi miniinsi eelliinchi aagginne yoo mi'nneka qeeraa'llooma keenukkaare lamem kollinnem yoo daba'llamakkam beyyuwwam edaa mat xibbi anga ihukko. Keesammi Mi'n goocanne yoo daba'llamakkam beyyi, Keesammi beyyii Keesammiinsim Keesammi beyyii

¹⁶sasim woronne aagaakkoohan ihaa ixxuwwi kululleetannem goolabamaakkoo maskoottuwwi yoohan hee'ukko. Ixxuwwi gortannuwwim gaxiinsi ki'isaa maskoottuwwanne afeebe'e haqqinne goolabamaakoohane. Ee maskoottuwwikim xuffuwwi goolabamaakkoohan hee'ukko.

¹⁷Ee'isam bii'l kollinne Keesammi Mi'n woro'l baxxancha aagakkam goociinsi hanaan yoo beyyim goolabamaakkoohan hee'ukko. Woro'llaannonnee lambe'i baxxanchi kululleetannee yoo gortannuwwi haxar yoo goolabaanchinne goolabamaakkoohan hee'ukko.

¹⁸Ee goolabaanchonne yoo haxar dimbaabaa kiruubeelaa laboohan hee'ukko. Ee baxxanchi kululleetannem dimbaaphphekii kiruubeel misilluwwii hamaaramaa baxamaakkoohan hee'ukko. Oo kiruubbuwwi annannichchim lam illi kolli yoohan hee'ukko.

¹⁹Kiruubik manni illi kollo labookkok mat dimbaaphphi kolli moo'ukkuuyyi hobbichchi illi kollo labookkok odim mulli dimbaaba moo'am hee'ukko. Oo misilluwwi Keesammi Mi'n kululleetanne hundannem baxamaa hee'ukko.

²⁰Gaxiinsi ki'isaa gooccuwwiinsi hanaan yoo beyyi afeebe'e ee gortannuwwi hanenne kuruubeelekii dimbaaphphekii misil baxamaa hee'ukko.

²¹Keesammi Mi'n goocikim gubannuwwi hundim gudaanchi ihaa soor ejjo'i yoohan hee'ukko.

²²Keesammiinsi keesammi beyyo aagakkam illagenne haqqinne baxamaakkoo kiti'm beyyi hee'ukko. Oohim gudaanchi ihaakkoo soor midaad yoohan ihaa oo midaadduwwi annannichchim lam angi hee'ukko. Uullichchim sas anga hee'ukko; midaado bakkiisoo utubbuwwi, shooho'ii midaadduwwii hundim haqqiinsi baxamaakkoohan hee'ukko. Oo manchim iina «Kuk Waa'i illagenne yoo xaraphpheeza» yukko.

²³Keesammi beyyikii Keesammiinsi Keesammi beyyikii gooc mat ihaa baxamaakkoo lam gooc hee'ukko.

²⁴Gooccuwwina annannichchinam lam xuffuwwi hee'ukko. Oohim gooccuwwa annannichchom goocam gafe'imminne te'im hixixaa'imminne lam kollonne fooqoo lam xuffuwwi yoohan hee'ukko.

²⁵Gortannanne baxamukkaannisam ee Keesammi beyyi goocannem kiruubeelikii dimbaaphphekii misil baxamaa hee'ukko. Aagakkam mi'n illagennem biiree'n kollinne haqqiinsi baxamaakkoo dum hee'ukko.

²⁶Aagakkam mi'n baxxanchi gortannanne lamem kollonnem yoo maskoottuwwanne dimbaaphphi misil hee'ukko.