Read Hadiyya Hizqi'eel Kitaaba 42 Bible Online

Hizqi'eel Kitaaba 42 - Hadiyya bible

Hizqi'eel Kitaaba 42

¹Ee lasage oo manchi hanaa'n qarinne biiree'n kollinne yoo wixxixxi beyyo eese massaa Keesammi Mi'n wixxixxi beyyi illagennee biir beyyi illagennee yoo minneewwa iina moo'isukko.

²Ee hanaa'n qarinne yoo mi'nnek qeeraa'lloom xibbi anga; dufaachchim ontayyi angi hee'ukko.

³Lamiyyi anga ihoo woro'l wixxixxi beyyiinsi ekkeen biiree'n wixxixxi beyyi illagenne baxamu minneewwi fooqiinsi fooqanne saxxi fooq afeebe'e baxamaakkoohan hee'ukko.

⁴Ee minneewwiinsi illagenne woro'l kollinne dufaachchi tommi angi qeeraa'lloomim xibbi anga ihoo mat daba'llamakkam beyyi hee'ukko; ee minneewwikim gooccuwwi hanaa'n qarinnetti hee'ukko.

⁵Saxxi fooqik minneewwi la'mmaanniinsii luxxaanniinsii xuqqi hee'ukko; oohim fooqquwwi iim qeeraa'llu qaxanne daba'llamakkam beyyi haraaraa baxxanchuwwa xuqqisoo bikkinatte.

⁶Oo minneewwi sas fooq ihaa bii'l wixxixxi beyyi minneewwisa utubbuwwi yoohan hee'ukkoyyo; ee bikkina saxxi fooqik baxxanchuwwi la'mmaanniinsii luxxi fooq baxxanchuwwiinsii lophphaa xuqqi hee'ukko.

⁷Ee minneewwinaa bii'l wixxixxi beyyinaa illagenne qeeraa'lloom ontayyi anga ihoo oot hee'ukko.

⁸Bii'l wixxixxi beyyinne ogoranne yoo minneewwik qeeraa'lloom ontayyi angi ihaa Keesammi Mi'n illagenne yoo minneewwik odim xibbi angi hee'ukko.

⁹Biiree'n wixxixxi beyyiinsi woroo'n minneewwa aagakkam gooc eelliinchi firinne hee'ukko.

¹⁰Odim woroo'n qarinne bii'l wixxixxi beyyi midaadinne yoo bon beyyinaa Keesammi Mininaa illagenne minneewwi hee'ukko.

¹¹Ee minneewwiinsim illagenne daba'llamakkam beyyi hee'ukko; ee minneewwik qeeraa'lloom, dufaachchi, gooccuwwii nafarii baxamukkis hanaa'n qaranne hee'u minneewwaannisam hee'ukko.

¹²Ee bikkina woroo'n qarinne yoo minneewwa aagakkamok eelliinchi firinne yoo ooxxi tochchonne yoo daba'llamakkam beyyinnette hee'ukko.

¹³Oo manchim iina «Keesammi Mi'n gadanonne bon beyyiinsi illagenne hanaa'n qarinnee woroo'n qarinnee yoo minneewwi keesamaakkoo keeno; oo minneewwi Waa'i illagenne hincitam qeessuwwi lobakata keesamaakkoo hurbaata ittam minneewwa. Oo minneewwi keesammi ihu bikkina qeessuwwi ee minneewwanne hurbaaxxekaa baaxii'l bikkinaa hawwojji bikkinaa hincoo kitimaa dissitaman hee'ukko.

¹⁴Qeessuwwi ee keesammi beyyo awwaadina aagga'a awwaaxxi eddechcha edde'lla'a lasage ee eddechcha sheelaxxitoo'n biireen yoo wixxixxi beyyo fitteena xantamoyyo. Oo eddechchuwwi keesamaakkoohan ihu bikkina ee keesammi minneewwiinsi fitta'a minaadabanne exxiteena gaassita'a mulli eddechcha edde'immi hasisookko» yukko.

¹⁵Oo manchi Keesammi Mi'nneka woro'l baxxancha keenaa guullaa lasage eelliinchi firanne yoo ooxxi gooc kollinne eese biira fissukko. Ee lasage bii'l kollo keenukko.

¹⁶Ee leeginnem eelliinchi firanne yoo kollo keenukkaare onti xibbi anga ihukko.

¹⁷Ee lasage hanaa'n qaranne yoo kollo ee leeginne keenukkaare onti xibbi anga ihukko.

¹⁸Woroo'n qarinnem ee onti xibbi angam ihukko.

¹⁹Eelliinchi aaggi kollinnem keenukkaare onti xibbi anga ihukko.

²⁰Keesammi beyyoo mulli beyyoo annanni issimmina Keesammi Mine baanoo kininne baxamu gortannik qeeraa'lloom onti xibbi anga; dufaachchoomim onti xibbi anga ihukko.