Read Hadiyya Hizqi'eel Kitaaba 43 Bible Online

Hizqi'eel Kitaaba 43 - Hadiyya bible

Hizqi'eel Kitaaba 43

¹Oo manchi eese eelliinchi firanne yoo ooxxi gooca massukko.

²Ee beyyonnem Isra'ee'l Waa'ik lombi eelliinchi firoo kollinne waarukkuuyyi moo'ummo. Sagaroomim malaayyaam womoo'llis hee'ukko. Ixxi lombikim belellaat uullanne caakkukko.

³Ku kaalti illageen Waa'i Yerusaaleema bi'iseena waaru ammane moo'ummoka laboohan hee'ukko. Keebaa'l daajji gadanonne moo'ummi kaaltinne kobi'llamoohane. Ee ammanenne miininne uullanne aad otossummo.

⁴Waa'ik lombi eelliinchi firinne yoo ooxxi gooc kollinne higaa Keesammi Mine aagukko.

⁵Waa'i Ayyaan eese iim ki'isukko. Massaakkatim woro'l wixxixxi beyyo afisukko. Keesammi Minim Waa'i lombinne wo'mmaa hee'ukko.

⁶Ee beyyonnem oo manchi i gadanonne uullaa hee'ukko. Waa'im ixxi Keesammi Minennetti ihaa iina

⁷«Manchi beeto, kuk Isra'ee'l minaadaphphi lambe'enne heer heerina hee'oommi adilla'n barcumaa i lokko usheexxisoommi beyyo. Isra'ee'l minaadabii ixxuwwi adilluwwii ka lasage qophpha'n waa'uwwina otossimminnee ixxuwwi adilluwwi lehoo ammane issitam luwwinnee iikka keesammi summa duunsiissamoyyo.

⁸Adilluwwi ixxuwwi adilla'n mi'n goocaa gubannuwwaa i Keesammi Mi'n goocannee gubanannee hincaa'lla'a baxxo'i bikkina i minee ixxuwwi minee annanna issookkok xale'i mat ki'n oot ihaakko. Ixxuwwi shigigaa'oo luwwi hundinnem iikka keesammi summa duunsiisso'ookko. Ee bikkina i quunqinne ixxuwwa bi'isummo.

⁹Ihukkaarem kanniinsi eehid qophpha'n waa'uwwina otossimma uullisimmii ixxuwwi adilluwwi leesha i illagiinsi qeessimmii hasisookko. Eehidemdu issitolas an ixxuwwi lambe'enne heer heerinam hee'oommo» yaa wocookkoka macceesummo.

¹⁰Waa'i odim iina «Manchi beeto, ixxuwwi baaxii'l bikkina tuuttona Isra'ee'l minaadabina Keesammi Mine moo'ise; baxamu duuha'am qoossita'a laqqona.

¹¹Baxxo'i bax hundannem tuuttaman ihulas Keesammi Min hinkid baxamuda'e oohim gooccuwwi bikkina, see'l bikkinaa ogolluwwi bikkinaa ixxuwwina la'isseenaa awwonatami ixxuwwi illagenne kitaabe.

¹²Keesammi Mi'n seer kane. Duu'n ludonne yoo Keesammi Mi'n kululleet hundim hore'em keesammi ihookko. Eeyya, kuk Keesammi Mi'n won seera» yukko.

¹³Kiti'm beyyi qeeraa'l angi keennaanchonne qeeraa'lloom mat anga; dufaachchoomim mat angi ihaa suu'm kululleetim taachcho'i hee'ukko. Oo qeeraa'l angi mulli anganne mat angaa oobbaa ihoohane; kiti'm beyyik uullichchi eehane.

¹⁴Ee kiti'm beyyik uullichchi uulliinsi ki'isaa lanbe'enne yoo qooxo'onne afeebe'e lam anga; dufaachchim mat anga hee'ukko. Hoffi qooxo'iinsi lob qooxo'onne afeebe'e yoo uullichchi soor anga; dufaachchim mat anga hee'ukko.

¹⁵Kitima shokkiisakkam oo hanaan yoo lasaanchi midachchik uullichchi soor anga hee'ukko. Ee kiti'm beyyi soorem ejjo'onnem yoo buudduwwi kiti'm beyyi ludonne yoo goominaanchiinsi iim shiqaakkoohane.

¹⁶Ee midachchina soor midaad yoohan ihaa midaaxxek annannichchikim qeeraa'lloom tommoo lam angaa hee'ukko.

¹⁷Hanaa'n qooxo'im mulli qooxo'uuwwaannisam gudaanchi ihaakkoo soor midaad yoohan hee'ukko. Ee midaadduwwikim qeeraa'lloom tommoo soor anga; dufaachchim tommoo soor angaa ihaa kululleetanne yoo gamma'llek haraaroom taachcho'i hee'ukko. Oo kiti'm beyyi yoo kululleetik haraaroom mat anga hee'ukko; kiti'm beyyo firakkam gardabbim eelliinchi firinnette hee'ukko.

¹⁸Oo manchim iina «Manchi beeto, Moollanni Waa'i ‹Shokkiisakka'a hincaa'akkam kitima hincaa'imminaa ixxonnem xiiga kifimminaa ku kiti'm beyyi baxamaa lasage ka kiti'm beyyonne ihimmi hasisoo seer kanniinsi woroon yoohane.

¹⁹Iina awwaaddeena i illagenne hincitam Leewe'i sulliinsi ikko'i Saadooq shumo'ina mat labeena baaxii'l haafitina kitim issita'a hincaa'llona uwwe.

²⁰Ee labee'n xiigiinsi hoffokam aa'llaa kiti'm beyyi ludonne soorem lamejjannem yoo buudduwwanne, soorem midaadonnem yoo qooxo'uwwannee gammalluwwannee hundannem labe. Ee'isinne kiti'm beyyo muccussitaa keessootto.

²¹Baaxii'l haafitina kitim ihaa hincu labeena massitaa Keesammi Mi'n gadanonne bii'l koollinne annanni ihaa qoodamu beyyonne shokkiise.

²²La'm balla miiqakkam luwwi mahim bee'i mat fella'ichchi ambula baaxii'l haafitina kitim issitaa hincaa'e; labee'n xiiginne issittisam fella'ichchi xiiginnem kiti'm beyyo muccusse.

²³Ee'isinne muccussitaa lasage miiqakkam luwwi mahim bee'i mat labeenaa gereechchi ambulaa allaachchiinsi massitaa

²⁴lamom iina Waa'ina hincaa'e. Qeessuwwi lamonnem sooqido binnaa'lla'a lasage shokkiisakka'a hincaa'akkam kitim issita'a iina Waa'ina hincaa'llona.

²⁵Lamar balla ballina ballina miiqakkam luwwi mahim bee'i mat fella'ichchi ambula, mat labeenaa mat gereechchi ambulaa baaxii'l haafitina kitim issitaa hincaa'e.

²⁶Lamar ballina qeessuwwi kiti'm beyyo muccussita'a keesamaakkoohan issitona.

²⁷Ee lasage qeessuwwi sadeenti balliinsi asheetta'a ki'nnuwwi eebbakko'i shokkiisakka'a hincaa'akkam kitimaa gatimmi bikkina hincoo kitimaa hincaa'llona; anim ee ki'nnuwwi kitima aa'oommo› yoolla» yukko.