Read Hadiyya Hizqi'eel Kitaaba 44 Bible Online

Hizqi'eel Kitaaba 44 - Hadiyya bible

Hizqi'eel Kitaaba 44

¹Oo manchi eelliinchi firanne yoo Keesammi Mi'n bii'l gooc kolli eese massukko. Oo goocim xufamaa hee'ukko.

²Waa'im iina «Ku gooc xufamukkisam hee'ookko bagaan hore'em fooqooyyo; an Isra'ee'l Moollanni Waa'i aagummi gooc ihu bikkina ayyim ka goocinne aageena xanooyyo. Ee bikkina xufamukkisam hee'ookko.

³Ihukkaarem gassaanchi keesammi daabbo'o i illagenne iteena ee beyyonne afuureena xanookko. Ixxim daba'llamakkam beyyi goocinne aagaa eeheenim firona» yukko.

⁴Ee lasage oo manchi eese hanaa'n qaranne yoo ooxxi goocinne Keesammi Mi'n nafaranne massukko. Anim ee nafaranne ihaa Keesammi Min lombinne wo'mmaakkoo moo'aa miininne uulla nakkaa otossummo.

⁵Waa'im iina «Manchi beeto, moo'lloottokaa macceessoottokaa hundam erisa qoosse. Oono'o, Keesammi Mi'n seeraa ogoraa hundam kiina kuroommo. Ee mine aageenaa fireenaa xanookkok hinkido'i manda'i ihukkisa qoosse.

⁶«Ee boqqi Isra'ee'l minaadabina ‹Isra'ee'l minaadaba, ki'nnuwwika shigigaa'oo baxo hundam ullehe. An Moollanni Waa'i kaka wocaammo.

⁷Di'iraa xiigaa hurbaaxxi kitim issitakka'a iina hincaa'llakkam hee'llakko'i ammane iina ijaajamoobee'i ballachchamoo'n yoo allaggi manna Keesammi beyyo aagissakka'a Keesammi i mine haashaassitakko'ookko. Haashaaramaakkoo ki'nnuwwi bax hundinnem iikka hidi'l sagara ginditakko'ookko.

⁸Iina keesamaa kitim ihu luwwa ki'nnuwwi egerimmi bikkenne allaggi manninne egessissakko'o› yihe» yukko.

⁹Ee bikkina Moollanni Waa'i «Isra'ee'l minaadaphphi lambe'enne hee'oo keenom edaa iina ijaajamoobee'i ballachchamubee'i allaggi hundim Keesammi i Mine aagoone» yoolla.

¹⁰Waa'i iina «Iinniinsi qee'llita'a huushanto'i Isra'ee'l oosinnem qophpha'n waa'uwwina otossito'i Leewe'i ooso guzumo'oommo.

¹¹Ihukkaarem ixxuwwi Keesammi Mi'n waardiyyuwwi ihimminne, shokkoo kitiminaa mulli kitiminaa hincoo diinate durimminnee manni illagenne uullita'a ee mannina awwaaddeena xantamo.

¹²Ixxuwwi i minaadab qophpha'n waa'uwwina otossaa baaxiilo baxoo'isa issito'i bikkina guzumo'antaman ihukkisa an Moollanni Waa'i i gaganne hide'oommo.

¹³Qeessoomaninne awwaaddeena i kolli hincitamoyyo; hore'em keesammi ihu kiti'm kollim hincitamoyyo. Ixxuwwi baxxo'i shigigaa'oo bax bikkinam xa'mmantamo.

¹⁴Ee bikkina qeessoomaninnette ihoo'n Keesammi Minenne mulli baxo hundam baxxamisa issoommo» yukko.

¹⁵Moollanni Waa'i «Isra'ee'l oos iinniinsi qee'llita'a huushanto'i ammane Keesammi i minenne amma'nnanchinne qoxxita'a iina awwaaddo'i qeessuwwi Leewe'i sulliinsetti ihu Saadooq shumo'i qeessuwwa. Ee bikkina di'iraa xiigaa kitim issita'a hincaa'imminne i illagenne uullita'a awwaaddeena xantamok ixxuwwa.

¹⁶Iina awwaaddeena Keesammi Mine aaggamok, iina kitim hincoo xaraphpheezanne hinciteena xantamokii otossaxxi seera awwonsitamokii xale'i ixxuwwa.

¹⁷Wixxixxi beyyi goocinne aaggam ammane talbi fatirinne baxamaakkoo eddechcha edde'llona; woro'l wixxixxi beyyonnee Keesammi Minennee awwaaddam ammane gereebbi oddinne dadamu ayyi luwwam edde'lloone.

¹⁸Ixxuwwi horoorennem talbi fatirinne dadamaakko shaashsha xaaxxona; talbi fati'l sure'em lade'llona. Biince'isoo eddechcha maham edde'lloone.

¹⁹Minaadab yoo bii'l wixxixxi beyyo fitteena illage awwaadina edde'llo'i eddechcha sheelaxxita'a mu'uta dissakkam keesammi minneewwanne dissita'a mulli eddechcha edde'immi hasisookko. Eehid issitamokim minaadabina uwwamubee'i ixxuwwika keesammi eddechcha manni nakkaa hawwodamoobee'isinatte.

²⁰«Qeessuwwi ixxuwwika horoore gudaanchisanne axisiissona bagaan hogoossiisimmi te'm qeeraa'llisimmi hasisooyyo.

²¹Qeessuwwi woro'l wixxixxi beyyo aaggam ammane woyi'n diqaasa maham aggoone.

²²Qeessuwwi buubbeesaano te'im aro'i lehu meento eebimmi hasisooyyo; ihukkaarem Isra'eeliinsi baajaam landa te'im lehu qeessuwwika meento eebbeena xantamo.

²³«I minaadab keesammaa keesamubee'ekaa haashaarammaa haashaaramubee'eka annanni issita'a laqqona qeessiwwi losissona.

²⁴I minaadaphphi lambe'enne wocanchi hee'oo ammane i see'llisanne oogattona; annanni annanni i ugudduwwaa Usheexxaxxi Ayyaamoo i see'llisannee ogo'llisannee keesimminne egettona.

²⁵«Ixxi annane, amane, ixxi oosan, abbaayyane te'im mine issitobee'i ixxi aayyan ihubeelas mulli leesha hinkam nakkaa mat qeessichchi ixxi gaga haashaassimmi hasisooyyo.

²⁶Leeshamdu nakkulas mat qeessichchi ixxi gaga muccussukkaanniinsi ki'isaa lamar balli afeebe'e egerimmi hasisookko.

²⁷Oo qeessichchi awwaadina woro'l wixxixxi beyyoo Keesammi Minee aagoo balla ixxi baaxiilina kitima hincaa'ona. An Moollanni Waa'i kaka wocaammo.

²⁸«An gagim ixxuwwina gulummi ihummi bikkina Isra'eelanne ixxuwwina uulla uwwitakkotte; an ixxuwwina gulumma.

²⁹Hurbaaxxi kitimii baaxii'l bikkinaa hawwojji bikkinaa hincoo kitimii ixxuwwina hurbaat ihona; Isra'eelanne iina annanni ihaa keesamu ayyi kitimim ixxuwwane.

³⁰Atoot hundiinsim ludoo iina annanni issakka'a uwwakkam luwwaa qeessuwwi a'llitona; minaadabim hurbaata liittam ammane doo'llammi qamiinsi ludo qeessuwwina annanni issita'a uwwitona. Anim eehid issitam minaadaphpheka mine maassinne wonshoommo.

³¹Bii'l moochchi shukkoka te'im baytu mikmikoo soko'ika maara qeessuwwi ittoone» yukko.