Read Hadiyya Hizqi'eel Kitaaba 45 Bible Online

Hizqi'eel Kitaaba 45 - Hadiyya bible

Hizqi'eel Kitaaba 45

¹Uulla sulli sullinne ki'nnuwwi gulummi issitakka'a baxxantakkam ammane mat sharada Waa'ina annanni issehe; ee uullik qeeraa'lloom 25,000 anga dufaachchoomim 20,000 angi ihona; beyyoomim keesammi ihona.

²Ee keesammi beyyi lambe'enne soorem midaadim gudaanchi ihaakkoo annannichchikim qeeraa'lloom onti xibbi anga ihoo beyyo Keesammi minina annanni issehe; ee beyyi kululleetannem haraaroom ontayyi anga ihoo bon beyyo gatissehe.

³Waa'ina annanni issitakka'a gatissakko'i beyyi lambe'enne qeeraa'lloom 25,000 anga dufaachchoomim 10,000 anga ihoo beyyo Keesammi Minina oohim Keesammiinsi Keesammi Mine baximmina gatissehe.

⁴Oo beyyi Isra'ee'l uullanne lophphaa keesamaakkoo beyyi ihaa Keesammi Minenne Waa'i illagenne awwaaddam qeessuwwina qoodamaakkoohane; ixxuwwi hee'llam minii Keesammi minii baxamoohim ee beyyonnette.

⁵Qeeraa'lloom 25,000 anga, dufaachchim 10,000 ihoo beyyi odim Keesammi Minenne awwaaddam Leewe'i oos hee'llam beero'o baximmina ihoo ixxuwwi gulumma.

⁶Waa'ina annanni ihaa keesamu baxxanchiinsi ki'isaa qeeraa'lloom 25,000 anga dufaachchim 5,000 anga ihoo uulli Isra'ee'l sulli hundinam ihoo beero'ina hee'ona.

⁷Isra'ee'l gassaanchina keesammi beyyiinsii beero'i beyyi gabaliinsii ki'isaa eelliinchi aagginnee eelliinchi firinnee Isra'ee'l uulli tochchi afeebe'e sharad ihaa uwwamookko. Ee sharaxxi qeeraa'lloomim mat sullina afoo uulli berechchi qax ihookko.

⁸Oo uulli Isra'eelanne doo'llamoo gassaanchina berechchi ihona; ee bikkina gassaan minaadaba wor amadimmi hasisooyyo. Ihukkaarem odo'i qax uulla hundam Isra'ee'l sulluwwina fatakimmi hasisookko.

⁹Hundam xanoo Waa'i «Isra'ee'l gassaano, oono'o, ki'nnuwwi lobakat ammane baaxiilo baxxakko'ookko. Ihukkaarem kaba damigoo wor amadimmaa uullehe! Xabbeenaa hanqo'anee ihu baxo baxxehe; i minaadab od ixxi gaqqi uulla fatakaa dooyyoo'isa issitakkotte! Kaka wocummok an Moollanni Waa'a.

¹⁰«Ki'nnuwwina annannichchinam hanqo'anee gudaanchoo ihaakkoo keennaanchi hee'ona.

¹¹«Ki'nnuwwi hundikim keennaanchi gomor ihona. Gogaalli luwwa keentakkam if daadoo luwwa keenakkam baatinne gudaanci ihona. Ee'isinne mat gomor tommi ifinnee tommi baatinnee gudaanchi ihookko.[2]

¹²Ki'nnuwwi keennaanchim, lamiyyi geeraah mat saqila lohayyi saqil mat minaana ihona.

¹³«Ki'nnuwwi hincaa'llakkam kitim mat gomor arasiinsi lohiinsi mat suum ifa, eeiisam annannichchiinsim gomor so'iinsi lohiinsi mat suum if ihona.

¹⁴Zaytiinsi qoodamukkokim qooroosiinsi annannichchiinsim tommiinsi mat suum baata. (Mat qooroos mat gomora te'im tommi baata).

¹⁵Ee'isam Isra'ee'l gereebbi allaachchiinsi lam xibbiinsi mato uwwitakkamo. Oohim ixxuwwina baaxii'l haafitina ihona hurbaaxxi kitiminnem shookkiisakka'a hincaa'akkamanee gatimmi kitimaa ihaa hincoohane. An Moollanni Waa'i kaka wocaammo.

¹⁶Ka uullanne hee'oo manni hundim Isra'eelanne gassaanchi ihoo manchina uwwookko.

¹⁷Gassaanchim shokkiisakkam kitimina, hurbaaxxi kitiminaa aggi kitiminaa aga'n aagganne, Usheexxaxxi Ayyaamonnee qoodamaakkoo Isra'ee'l minaadaphphi ugudduwwannee hincimmi hasisoo luwwa gudisimmi hasisookko. Ee'isam Isra'ee'l minaadaphphi baaxii'l haafitina ihoo baaxii'l bikkina hincoo kitima, hurbaaxxi kitima, shokkiisakka'a hincaa'akkam kitimaa gatimmi kitimaa gudisimmi hasisookko» yukko.

¹⁸Moollanni Waa'i «Luxxi agan aagu luxxi ballanne miiqakkam luwwi mahim bee'i mat labeena kitimtaa Keesammi Mine muccusse.

¹⁹Qeessichchi baaxii'l haafitina hincu kiti'm xiigiinsi hofqaxam aa'aa Keesammi Mi'n gubannuwwanne, kiti'm beyyi qooxo'uwwi soorem ejjo'onnee woro'l wixxixxi beyyo aagakkam ooxxi gooc gubannawwannee labona.

²⁰Ayyim sawwoo'n te'im la'oo'n baxu baaxiil hundinam lama'l ballanne ee'isa isse. Ee'isinnem Keesammi Mine keese.

²¹«Luxxi agan aagu tommonnee soo'l ballannee Shaashshiqqi Uguda lonsehe. Ee ugudanne lamar balli afeebe'e xale'i qorosho'o ittehe.

²²Ee uguxxi ballanne minaadaphphi gassaanchi ixxi gaqqaanninaa minaadaphphi baaxii'l haafitinaa mat moora gudisona.

²³Ee Uguda lonsakkam lamarem ballannem miiqakkam luwwi mahim bee'i lamar mooraa lamar gereebbi ambulluwwaa shokkiisakka'a iina hincaa'akkam kitimina gudisona. Ee'isam lamarem ballannem baaxii'l haafitina kitim ihaa hincoo fella'i ambulluwwika mat mato gudisookko.

²⁴Annannichchinnem Moorinnee gereebbi ambulluwwinnee maqire hurbaatik mat mat Eefii wee'l zaytik sas sas liitirii hincihona.

²⁵«Ee'isam lam'l agan aagu tommonnee ontonnee asheeroo Godo'i Uguxxi lamarem ballannem gassaanchi baaxii'l haafitinaa hundoomam shokkiisakka'a hincaa'akkamaanninaa kitima gudisona. Hurbaaxxekaa zayxekam kitima hanaa'nnannisam hincaa'ona» yukko.