Read Hadiyya Hizqi'eel Kitaaba 46 Bible Online

Hizqi'eel Kitaaba 46 - Hadiyya bible

Hizqi'eel Kitaaba 46

¹Moollanni Waa'i «Woro'l wixxixxi beyyo aagakkam eelliinchi firinne yoo gooc lohem bax ballannem xufamona. Ihukkaarem Usheexxaxxi Ayyaamonnee Aga'n Aaggannee fooqihona.

²Gassaanchi biiree'n koollinne mine aagakkam nafarinne aagaa ooxxi gooc gadanonne uullona. Qeessuwwim ixxi gudisu shokkiisakkamokaa gatimmikaa kitima hincaa'llona. Gassaanchi ee goocannem iina otossihona. Ee lasage ixxi firona. Ihukkaarem oo gooc hiimeebe'e xufamooyyo.

³Hundem Usheexxaxxi Ayyaammuwwannee Aga'n Aagguwwannee minaadab hundim eelliinchi fi'l goocanne ikka'a iina Waa'ina otossitona.

⁴«Gassaanchim Usheexxaxxi Ayyaamonne hundoomam shokkiisakka'a hincaa'akkam kitimina miiqakkam luwwi mahim bee'i gereebbika loh ambullichcha'aa mat gereechchi ambulaa iina hincaa'ona.

⁵Ee gereechchi ambulinne mat if xuffi hurbaata edaa eebona. Ee'isam hoffi ambulcha'inne annanchinnem xanu qax hurbaata edaa hincaa'ona. If xuffi hurbaaxxi kitiminne annannichchinnem hincoo sas liitir wee'l zayta eebona.

⁶Ee'isam Aga'n Aagganne annannichchonnem miiqakkam luwwi mahim bee'i mat labeena, loh gereebbi ambulcha'aa mat gereechchi ambulaa hincaa'ona.

⁷Labeeninnee gereechchi ambulinnee maqire mat mat if xuffi hurbaata hincaa'ona. Ee'isam ambulcha'inne annannichchinnem gassaanchi hincaa'eena xa'u qaxa uwwona. If xuffinne annanchinnem sas liitir wee'l zaya hincaa'ona.

⁸Oo gassaanchi aagoo ammane nafarinne aagaa eeheenim firona.

⁹«Ayyi ugudannem minaadab iina otosseena waaroo ammane hanaa'n qa'l ooxxi goocinne aagu keen woroo'n qa'l goocinne firona. Woroo'n qa'l ooxxi goocinne aagu keenim hanaa'n qa'l goocinne firona. Ayyi manchim aagu goocinne firoone. Ihukkaarem illaginne yoo mulli goocinne firona.

¹⁰Gassaanchim minaadab aagoo ammane aagaa firoo ammane ixxuwwinnem firona.

¹¹Lobaannonnee hoffi uguxxi ayyaammuwwannee, moorinnee gereechchi ambulinnee annanchinnem hincoo hurbaaxxi kitim mat if xuffi ihona. Iina otossoo manchi gereebbi ambulcha'inne annannichchinnem uwweena hasu qaxa hincaa'ona. If xuffi hurbaatinne annanchinnem sas liitir wee'l zayti exxaa hincihona.

¹²«Gassaanchi hundoomam shokkiisakka'a hincaa'akkamoka te'im gatimmina hincoo kitima ixxi gaqqi doo'llinne iina hincaa'eena hasulas woro'l wixxixxi beyyo aagakkam eelliinchi fi'l gooc fooqihona. Ee kitimam Usheexxaxxi balla hincaa'oohaannisam hincaa'ona. Ixxi firaa maraa lasagem oo gooc xufamona» yoolla.

¹³Waa'i «Gassaanchi balli hundam shokkiisakka'a iina hincaa'akkam miiqakkam luwwi mahim bee'i mat hiinchi gereechchi ambula hincaa'ona. Eeham dar dara hincaa'ona.

¹⁴Ixxenne maqirem dar dara lam kiilo'o ihoo qaxa hurbaaxxi kitimaa doo'l qama qufisimmina ihoo mat liitir wee'l zaytaa gudisona. Oohim hundi ammanem iina hincoo kiti'm seer ihookko.

¹⁵Gereechchi ambulchi, hurbaaxxi kitimii wee'l zaytii hundi ammanem dar dara iina shokkoo kitim ihaa hincihona» yoolla.

¹⁶Moollanni Waa'i «Gassaanchi ixxi gaqqi uulliinsi qoroshaa ixxi oosiinsi matina sharad issaa uwwulas oo uulli ee beetinaa ixxi abaroosinaa gulummi ihookko.

¹⁷Ihukkaarem oo gassaanchi ixxena sharad ihu uulliinsi qoroshaa ixxi awwaadaaniinsi matina uwwulas ontayyi hiinchonne mataagge ihoo wolabba'n hiinchi ugudanne ee gassaanchinam daba'llona. Amaxxoom ixxan ihu bikkina oo uulli heer heerinam xale'i ixxanee ixxi oosanee ihimmi hasisookko.

¹⁸Gassaanchi minaadaphpheka uulla hooraa ixxi gagina aa'immi hasisooyyo. Ixxi oosina baxxansaa uwweena xanookkok xale'i ixxena qoodamu uulliinsette. Ixxuwwi uulla hoorimminne i minaadaba wor amadoone» yoolla.

¹⁹Ee lasage oo manchi gooc gadaninne aagakkam beyyi hanaa'n qarinne yoo qeessuwwan ihu keesammi minneewwi kolli massukko. Eelliinchi aagginne ee minneewwi lasaanchonne mat beyyo moo'ummo.

²⁰Ixxim iina «Ku beyyi baaxiilinaa hawwojji haafitinaa kitim ihaa hincu maaraa hurbaaxxi kitimaa qeessuwwi saroohane. Ee'isinne minaadabanne hawwodanchi afoobee'isa keesammi kitimiinsi mahim bii'l wixxixxi beyyo firooyyo» yukko.

²¹Ee lasage oo manchi bii'l wixxixxi beyyo eese massaa soorem lamejjam do'isaa moo'isukko. Lamejjuwwanne annannichchonnem mat wixxixxi beyyi hee'ukko.

²²Soorem lamejjuwwannem yoo hoffi wixxixxi beyyuwwi hundim gudaanchi hee'ukko. Annannichchikim qeeraa'lloom sor anga; dufaachchim sad angi hee'ukko.

²³Ee soorem wixxixxi beyyi kululleetannem woro'l kollinne gundi ki'n gorte'i hee'ukko. Ee gorte'uwwi lugumonnem midachchuwwi hee'ukko.

²⁴Oo manchim «Ku keen Keesammi Mi'n awwaadaan minaadab hincaa'oo kiti'm maara saroo beyyuwwa» yukko.