Read Hadiyya Hizqi'eel Kitaaba 47 Bible Online

Hizqi'eel Kitaaba 47 - Hadiyya bible

Hizqi'eel Kitaaba 47

¹Ee lasage eese Keesammi Mine aagakkam gooc kolli massukko. Ee beyyonnem Keesammi Mi'n lugumiinsi wo'i eelliinchi firoo kollonne daadam hee'ukko. Oohim Keesammi Mi'nnek gooc eelliinchi fi'l kollonne daba'llaa hee'u bikkinatte. Oo wo'i Keesammi Miniinsi woroo'n qarinne yoo luguminnetti ihaa kiti'm beyyiinsi woroo'n qaranne daadam hee'ukko.

²Oo manchim hanaa'n qa'l ooxxi goocinne Keesammi Miniinsi eese fissaa massukko. Eelliinchi firanne yoo ooxxi gooc kollim dabarukko. Ee ooxxi goociinsi woroo'n qarinnem wo'i eelliinchi firanne daadam hee'ukko.

³Oo manchim amadaa hee'u usinne eelliinchi firanne daadoo wo'o awwonaa maraa 1,000 anga keenukko. Ee wo'i worinnem taakke'aa higoommisa issukko. Oo wo'im iikka moqonta afukko.

⁴Odim 1,000 anga keenaa taakke'oommisa issukko. Oo wo'im i gurubbo afukko. Odim 1,000 anga keenaa wo'i woronne taakke'oommisa issukko. Oo wo'im i lamado afukko.

⁵Odim higaa 1,000 anga keenukko. Wo'oom xillaalli ihu bikkina higeena xanoombee'i daajji ihukko; waachchimminnetti ihubeelas lokkinne higakkeena xanakkambee'an hee'ukko.

⁶Oo manchim iina «Manchi beeto, ka hundam qoossitaa moo'llaahinnihe?» yukko. Ee lasage oo manchi ee daajji gammala eese dabaraa massukko.

⁷Ee beyyo afummisam ee daajji makkinnee qeddinnee lobakat haqqi yookkoka moo'ummo.

⁸Oo manchim iina «Ku wo'i ka uullanne eelliinchi firanne, Yoordaanoos cebbannee Sooqixxi Dambalaqannee daadookko. Oo wo'i Sooqixxi Dambalaq kolli daadoo ammane oo wo'i fayye'ookko.

⁹Oo wo'i daadaa afoo beyyi hundannem annanni annanni soko'ii qurxumme'ii dutookko. Ku wo'i daadaa afoo bikkina Sooqixxi Dambalaq wo'im fayye'ookko; oo wo'i daadaa afoo beyyi luwwi hundim foorinne hee'ookko.

¹⁰Engadiinsi ki'aa Eni'eegilaayim afeebe'e manni qurxumme'e qaashookko; shikkuwwam fitiisookko. Meedeteraaniyaa'n dambalaqaannisam dut shumo'i qurxumme'im fikkaannookko.

¹¹Ihukkaarem leepho'ii leerii sooqid wo'mmaakkoohan ihookko bagaan xaliil wo'i ihooyyo.

¹²Ee daajji lamem gammalinnem misha itakkam haqquwwi hee'ookko. Buyyim giggirooyyo; mishimmam uullisooyyo. Keesammi Mi'n lugumiinsi daadoo daajji wo'o siidoo bikkina agan hundannem haareechchi haareechchi misha mishookko. Ee haqquwwik mish hurbaatina buyyim jabbina qaraar ihookko» yukko.

¹³Moollanni Waa'i «Tomminaa lamem Isra'ee'l sullinam gulummi issitaa baxxansitoo uulli gabal kanniinsi woroon yoohane. Yooseef sullina lam suum ihona.

¹⁴An gaassi ki'nnuwwi anno'ina ka uulla ixxuwwi gulummi issaa uwweena hide'aa sagara aagaammo. Ee bikkina ki'nnuwwi hundim gudaanchonne baxxammehe. Ku uulli ki'nnuwwi gulummi ihookko.

¹⁵«Uulloo'mmek gabal kanniinsi woroon yoohane. Hanaa'n qa'l gabal Meedeteraaniyaa'n dambalaqiinsi ki'isaa Heetlooninne aa'aa Haamaata daba'llamakkam googo, Xeedaadiima,

¹⁶Damaasqo'inaa Haamaatinaa lambe'enne yoo Beerootikaa Siibiraayi'm beero'uwwaa Hawuraa'n tochchonne yoo Tiikoo'n beero'oo higaa eelliinchi firanne afeebe'e marookko.

¹⁷Ee'isinne hanaa'n qa'l gabal Meedeteraaniyaa'n dambalaqiinsi Haxaari'eenaana oohim Damaasqo'inaa Haamaatinaa gabalanne hanaa'n qarinne yoo beyyi afeebe'e afookko.

¹⁸«Eelliinchi fi'l gabalim Damaasqo'aanniinsii Hawuraa'n lambe'iinsi ki'isaa Yoordaanoosinne Gala'aadinaa Isra'eelinaa lambe'e higaa Sooqixxi Dambalaqaa Taamaar beero'oo afookko. Ookki eelliinchi fi'l gabala.

¹⁹«Woroo'n qa'l gabal Taamaariinsi ki'isaa Mariib Qaadeesinne aa'aa Gibxi cebbinne higaa Meedeteraaniyaa'n dambalaqa afookko. Ookki woro'n qa'l gabala.

²⁰«Eelliinchi aaggi gabalim Meedeteraaniyaa'n dambalaq ihaa Haamaata aagakkam illagenne afookko. Ookki eelliinchi aaggi gabala.

²¹«Ka uulla Isra'ee'l sulli hundim baxxammehe.

²²Ookki ki'nnuwwinaa ooso qatta'a ki'nnuwwi lambe'enne hee'llam allaggi keeninaa heer heerina gulummi ihona. Oo allaggi ayyi Isra'eelchisam ee uulla baxxantam Isra'ee'l sulluwwinne maqire saaminne baxxamim hasisookko.

²³Isra'ee'l uullanne hee'oo allaggina ayyenam maqire hee'oo Isra'ee'l sullinnem ixxi gaqqi sharad hee'ona. An Moollanni Waa'i kaka wocaammo» yoolla.