Read Hadiyya Hizqi'eel Kitaaba 48 Bible Online

Hizqi'eel Kitaaba 48 - Hadiyya bible

Hizqi'eel Kitaaba 48

¹Uulla baxxanto'i sulluwwi kanniinsi woroon yo'i keeno. Daan sulli sharad hanaa'n qarinne yoohane. Oohim Heetlooniinsi Haamaata aagakkam googinne aa'aa Haxaari'eenaaniinsii Damaasqo'iinsii hanaa'n qarinne eelliinchi firiinsi eelliinchi aaggi afeebe'e Daan gabal ihookko.

²Aseer sullik sharad mat ihaa Daan sulli gabaliinsi ki'isaa eelliinchi firiinsi eelliinchi aaggi afeebe'e afoohane.

³Niftaaleem sullik sharad mat ihaa Aseer sulli gabaliinsi ki'isaa eelliinchi firiinsi eelliinchi aaggi afeebe'e afoohane.

⁴Minaas sullik sharad mat ihaa Niftaaleem sulli gabaliinsi ki'isaa eelliinchi firiinsi eelliinchi aaggi afeebe'e afoohane.

⁵Efireem sullik sharad mat ihaa Minaas sulli gabaliinsi ki'isaa eelliinchi firiinsi eelliinchi aaggi afeebe'e afoohane.

⁶Roobeel sullik sharad mat ihaa Efireem sulli gabaliinsi ki'isaa eelliinchi firiinsi eelliinchi aaggi afeebe'e afoohane.

⁷Yihud sullik sharad mat ihaa Roobeel sulli gabaliinsi ki'isaa eelliinchi firiinsi eelliinchi aaggi afeebe'e afoohane.

⁸Yihuxxi sulli uullinne gaba'llamoo annanni beyyo eelliinchi firiinsi eelliinchi aaggi afeebe'e annanni issitakka'a dissehe. Ee beyyikim dufaachchi 25,000 anga; qeeraa'lloomim mulli sulluwwaannisam eelliinchi firiinsii eelliinchi aagga afoohane. Keesammi Min ihookkokim ee beyyi lambe'ennette.

⁹Ee beyyi lambe'ennem qeeraa'lloom 25,000 anga; dufaachchim 20,000 anga ihoo beyyo Waa'ina annanni issehe.

¹⁰Ee keesammi beyyiinsi qoodamaakkoo qax qeessuwwan ihona. Oohim qeeraa'lloom eelliinchi firiinsi eelliinchi aaggi afeebe'e 25,000 anga; dufaachchim hanaa'n qariinsi woroo'n qar afeebe'e 10,000 angi ihona. Keesammi Minim ihookkok ee lambe'ennette.

¹¹Oo beyyi Saadooq shumo'iinsetti ikko'i keesanto'oo qeessuwwina ihona. Isra'ee'l oosii Leewe'i oosiinsi gatu qaxii hundim eese lagu ammane Saadooq oos i ijaajjuwwa egetto'oo keen hee'llo'o.

¹²Ee keesammi beyyiinsi ixxuwwi sharad eehane; oohim hore'em keesammi ihaa Leewe'i oosaanninne gaba'llamaakkoohane.

¹³Qeessuwwi baxxanchi midaadonne qeeraa'lloom 25,000 anga, dufaachchim 10,000 anga ihoo beyyi Leewe'i oosane. Qeessuwwi sharadam edaa hundoomikim qeeraa'lloom 25,000 anga dufaachchim 20,000 angi hee'ukko.

¹⁴Waa'ina annanni ihoo beyyi ee uullanne yoo beyyi hundiinsim e'lloo doo'l beyyo. Ee beyyiinsi maham biteesimmi, dabassimmii te'im ayyenam lagaa'isimmii xansiisooyyo. Oo beyyi Waa'ina annanni ihaa keesamaakkoo beyyo.

¹⁵Annanni ihaa gatu beyyi illagenne yoo beyyik qeeraa'lloom 25,000 anga; dufaachchim 5,000 anga. Ee beyyo minaadab annanni annanni luwwina awwaaxxeena xanookko. Mine baxeenaa diinate allaareenaa xanookko. Beero'im ee lambe'enne ihookko.

¹⁶Ee beero'ikim qeeraa'lloom gudaanchi ihaakkoo soor midaad yoohan ihaa midaaxxek annannichchikim qeeraa'lloom 4,500 angaa ihookko.

¹⁷Ee beero'i soorem qarannem allaachchi beyyi hee'ookko. Soorem qaranne annannichchonnem yoo allaachchi beyyik haraaroom hundem kollim gudaanchi ihaa lam xibbee ontayyi angaa ihookko.

¹⁸Ee keesammi beyyiinsi eelliinchi firinne 10,000 anga, eelliinchi aagginnem 10,000 anga haraaroo beyyonne beero'i baxamaa lasonne gatoo beyyi ee beero'onne hee'oo minaadabina abuulli uulli ihookko.

¹⁹Ee beero'onne hee'oo hinka'i sulliinsem ihu ayyim ee uulla abuulleena xanookko.

²⁰Ee bikkina ee uulli lambe'iinsi annanni ihaa keesamu beyyikii beero'i baxamu beyyikii hundikim qeeraa'lloom gudaanchi ihaa 25,000 angaa ihookko.

²¹Ee keesammi beyyiinsii beero'i beyyiinsii eelliinchi firinnee eelliinchi aagginnee gatu beyyi gassaanchina sharad ihookko. Ee beyyik annannichchikim qeeraa'lloom eelliinchi firinnee aagginnee keesammi beyyinne gaba'llamoohan ihaa ee uulli tochchi afeebe'e 25,000 angaa ihookko. Gassaanchi berechchik qeeraa'lloom mulli sulluwwi berechchinne gudaanchome. Ee'isinne keesammi beyyii Keesammi Minii lambe'ennette ihookko.

²²Ee'isam Leewe'i oosikii beero'ikii beyyi eelliinchi firinnee eelliinchi aagginnee gassaanchi berechchi ihu beyyuwwi lambe'ennette. Ee'isam hanaa'n qarinne Yihuxxi berechchinne woroo'n qarinnem Biiniyaam berechchinne gaba'llamookko.

²³Gatu sulluwwinam uulli kanniinsi woroon yoo'isanne baxxansamaakko. Biiniyaam sullik sharad mat ihaa eelliinchi firiinsi eelliinchi aaggi afeebe'e yoohane.

²⁴Simi'oon sullik sharad mat ihaa eelliinchi firiinsi eelliinchi aaggi afeebe'i ihaa Biiniyaam berechchinne gaba'llamoohane.

²⁵Yisaakoor sharad mat ihaa eelliinchi firiinsi eelliinchi aaggi afeebe'i ihaa Simi'oon sharadinne gaba'llamoohane.

²⁶Zaabiloon sharad mat ihaa eelliinchi firiinsi eelliinchi aaggi afeebe'i ihaa Yisaakoor sharadinne gaba'llamoone.

²⁷Gaad sharad mat ihaa eelliinchi firiinsi eelliinchi aaggi afeebe'i ihaa Zaabiloon sharadinne gaba'llamoohane.

²⁸Gaad sullik woroo'n qarinne yoo gabal Taamaar beero'i woroo'n qariinsi ki'isaa Mariiphphi Qaadeesanne yoo wo'i bu'onne afookko. Ee beyyiinsim Gibxi uullina gabal ihu daajje awwonaa Meedeteraaniyaa'n dambalaqa afookko.

²⁹Moollanni Waa'i «Ee'isinne Isra'ee'l sulli hundinam sharad issitakka'a baxxansitakkam uulli kane» yukko.

³⁰Beero'iinsi firakkam soorem midaadduwwannem yoo gooccuwwi kanniinsi woroon yoo keeno. Midaadonne annanchonnem sas sas gooc yoohan ihaa annanchim mat mat sulli summinne weeshamaakko. Hanaa'n qa'l ooxxi qeeraa'lloom 4,500 angaa. Ee kolli sasem goocim Roobeelaanninne, Yihudaanninnee Leewe'i sulli summinnee weeshamaakko.

³²Eelliinchi fi'l kolli ooxxi qeeraa'lloom 4,500 angaa. Ee kolli sasem goocim Yooseefaanninne, Biiniyaamaanninnee Daan sulli summinnee weeshamaakko.

³³Woroo'n qa'l kolli ooxxi qeeraa'lloom soor kumaa onti xibbi angaa. Ee kolli sasem goocim Simi'oonaanninne, Yisaakkooraanninnee Zaabiloon sulli summinnee weeshamaakko.

³⁴Eelliinchi aaggoo kolli ooxxi qeeraa'lloomim 4,500 angaa. Ee kolli sasem goocim Gaadaanninne, Aaseeraanninnee Niftaaleem sulli summinnee weeshamaakko.

³⁵Soorem qarinnem yoo ee beero'ik ki'n ooxxi qeeraa'lloom hundim 18,000 angaa ihookko. Ee lasage ee beero'ik summi «Waa'i eekke'e yookko» yoohan ihookko.